wo ho kaisa hi dubla tar bistar ho nahin sakta

By

wo ho kaisa hi dubla tar bistar ho nahin sakta
ghalat hai aadmi is tarah laghar ho nahin sakta
kabhi aansu ka qatra misl-e-gauhar ho nahin sakta
ghalat hai abr-e-naisan dida-e-tar ho nahin sakta
miyan majnun hon chahe kohkan ho donon khabti the
kisi ka kuchh bhi un se khak patthar ho nahin sakta
kamar jis ke na ho wo bar se kyun kar chalega phir
khilaf-e-aql hai ye is tarah par ho nahin sakta
kaho phir ye kamar moti hai sar chhota hai dilbar ka
nahin to phir qad-e-jaanan sanobar ho nahin sakta
wo khatt-e-shauq ke jitne pulande chahe le jae
mulazim dak-khane mein kabutar ho nahin sakta
'zarif' aaina de kar darwin-sahab ko samjha do
na ho jab tak sharir insan bandar ho nahin sakta

wahshat mein har ek naqsha ulTa nazar aata hai

By

wahshat mein har ek naqsha ulta nazar aata hai
majnun nazar aati hai laila nazar aata hai
ai murgh-e-sahar kukdunkun bol kahin jaldi
tu bhi shab-e-furqat mein gunga nazar aata hai
dadhi ko teri waiz sab dekh ke kahte hain
wo qasr-e-taqaddus ka chhajja nazar aata hai
baz aae mohabbat se ai ishq khuda-hafiz
ulfat mein jise dekho andha nazar aata hai
kuchh tujh ko khabar bhi hai dekh aaine mein surat
o tirchhi nazar wale bhinga nazar aata hai
swaraj ke chakkar mein rahte the jo sargardan
un logon ko ab khali charkha nazar aata hai

tere rahne ko munasib tha ki chhappar hota

By

tere rahne ko munasib tha ki chhappar hota
ki na chaukhat teri hoti na mera sar hota
qismat-e-najd ka gar qais commissioner hota
lady-laila ki hawa-khori ko motor hota
ghair mil-jul ke utha lete ki the be-ghairat
go pahad aap ke ehsan ka chhappar hota
chae mein dal kar ushshaq use pi jate
dar-haqiqat lab-e-mashuq jo shakkar hota
malak-ul-maut pe jhalne ko banata main chanwar
taer-e-ruh ki dam mein jo koi par hota
le hi leta lab-e-dildar ka bosa ud kar
kash aashiq jo banaya tha to machchhar hota
thokaren ghair ke marqad pe lagata kyun kar
boot ki ja pe jo tu pahne sleeper hota
chatta sari kitabon ko baghair az-diqqat
ilm ka shauq jise hai jo wo jhengar hota
pas karta resolution ki hasinon pe ho tex
main kabhi municipality ka jo member hota
lucknow se shab-e-yak-shamba bareilly aate
panw mein gar na 'zarif' apne sanichar hota

tamanna hai kisi ki tegh ho aur apni gardan ho

By

tamanna hai kisi ki tegh ho aur apni gardan ho
phir us ke baad yarab sar kate nale mein madfan ho
hujum-e-am ho aur mujtama goron ki paltan ho
samajh lo laut aae hain jo station pe dan dan ho
kahen qatil ko hum mahbub agar hai ain nadani
hazar lazim hai aise shakhs se jo apna dushman ho
lab-e-shirin agar mashuq ka qand-e-mukarrar hai
jabhi jaanen ki baithen makkhiyan aur us pe bhan bhan ho
na turbat ki jagah kuche mein pai to shikayat kya
gali un ki koi takiya hai jis mein apna madfan ho
ye sab lakdi ke takhte khak mein mil jaen jal-bhun kar
ghazab ho jae gar sach-much lahad mein dagh raushan ho
yahi dahshat agar dast-e-junun ki hai to ai bhai
dupatta odh lo jis mein gareban ho na daman ho
nigah-e-shauq kya thahri wo goya belcha thahri
makan-e-yar ki diwar mein jis se ki rauzan ho
machae shor-o-ghul aah-e-sharar-afshan kare har-dam
yahi ausaf lazim hai to aashiq kyun ho engine ho
hamara jhonjh phulwari mein ho koi nahin kahta
yahi kahte hain yarab bagh mein apna nasheman ho
azal se ta-abad lambi yaqin hai tang bhi hogi
hasin shokh wo sahra-e-mahshar jis ka daman ho
'zarif' insaf se kah do wo aashiq hai ki chuha hai
zamin-e-qasr-e-jaanan mein jo ye chahe ki maskan ho

qais kahta tha yahi fikr hai din-raat mujhe

By

qais kahta tha yahi fikr hai din-raat mujhe
mar de naqa-e-laila na kahin lat mujhe
rukh-e-raushan pe fida aur na siyah-zulf ka khabt
na koi din hai mujhe aur na koi raat mujhe
maktab-e-ishq mein baitha hua hal karta hun
jaise algebra ke milte hain sawalat mujhe
botalen bechte nakhkhas mein dekha us ko
kis jagah ja ke mila pir-e-kharabaat mujhe
ghusl-khane mein ye ghassal se murda bola
jail hai qabr to ye ghar hai hawalat mujhe
rishta-e-umr hai kam aur meri rassi hai daraaz
aai charkhe se ye aawaz na tu kat mujhe
nai tahzib ne mashuq ka fashion badla
card bhejun to mayassar ho mulaqat mujhe
dard-e-dil ishq mein hai kahe se sekun main 'zarif'
na falalin hi milti hai na banat mujhe