buton ko bhul jate hain KHuda ko yaad karte hain

buton ko bhul jate hain khuda ko yaad karte hain
barahman jab safar su-e-allahabad karte hain
na gardan marte hain wo na dete hain kabhi phansi
hasinon ko ye sab mashhur kyun jallad karte hain
sitam-ijad kahte hain ye kyun mashuq ko shair
sitam bhi kya koi shai hai jise ijad karte hain
hamein batla na den aashiq jo hain ru-e-kitabi par
sabaq hai kya koi mashuq jis ko yaad karte hain

ghuncha-dahan wahi hai ki gunga kahen jise

ghuncha-dahan wahi hai ki gunga kahen jise
hai sarw-qad wo asl mein langda kahen jise
mashuq chahiye ki ho aisa siyah-fam
majnun miyan bhi dekh ke laila kahen jise
mai ko jo istilah mein kahte hain dukht-e-raz
wo mughbacha hai rindon ka sala kahen jise
sab jaanwar na hazrat-e-insan se kyun daren
paida hain us ke pet se hawwa kahen jise
sab ungliyan jhuka ke angutha uthaiye
ban jaegi wo shakl ki thenga kahin jise

ilm mein jhengar se baDh kar kaamran koi nahin

ilm mein jhengar se badh kar kaamran koi nahin
chat jata hai kitaben imtihan koi nahin
zulm hai ba-wasf mehr is ko kahen na-mehrban
aasman se badh ke sachcha mehrban koi nahin
lucknow dilli inhin shahron pe kya mauquf hai
har jagah ahl-e-zaban hain be-zaban koi nahin
hai masal mashhur dast-e-khud-dahan-e-khud 'zarif'
hotalon mein mehman-o-mezban koi nahin

karenge sab ye dawa naqd-e-dil jo haar baiThe hain

karenge sab ye dawa naqd-e-dil jo haar baithe hain
khafifa mein tumhaare aashiq-e-nadar baithe hain
ajab kya aashiqon ko dil mein ye mashuq kahte hon
ye kyun ghar gher kar mera khuda ki mar baithe hain
shab-e-furqat ka ek dariya-e-gham hai beach mein hail
jo main is par baitha hun to wo us par baithe hain
koi hai ittilaa is waqt kar de ja ke thane par
wo mere qatl par khinche hue talwar baithe hain
safedi khana-e-dil mein siyah-karon ke pherenge
nahin mimbar pe waiz pad par meamar baithe hain
pakad kar kan apna dars-gah-e-ishq mein aashiq
hazaron bar utthe hain hazaron bar baithe hain
kaha karte the walid qais ke fart-e-mohabbat mein
nahin malum kis jangal mein bar-khurdar baithe hain
'zarif' ab faeda kya shairon ko sardi khane se
ghazal hum padh chuke ghar jaen kyun be-kar baithe hain

mahsharistan-e-junun mein dil-e-nakaam aaya

mahsharistan-e-junun mein dil-e-nakaam aaya
nala hangama-nawazi pe sar-e-sham aaya
mehr az-ru-e-mualla jo lab-e-baam aaya
dekhiye dekhiye ab dhup gai gham aaya
barq ki shoala-nawazi sabab-e-tul-e-hayat
fitrat-e-maut teri zist ka hangam aaya
muntashir ho gae jis waqt sab ajza-e-hayat
qatra dariya mein ba-andaza-e-anjam aaya
tausan-e-umr-e-gurezan ki subuk-raftari
kaam deti nahin jab maut ka paigham aaya
markaz-e-ruh ye hai kashmakash-e-maut-o-hayat
phir bhi waraftagi-e-shauq pe ilzam aaya
main wo aasuda-e-soz-e-khalish-e-mizgan hun
jis ko rah-e-talab-e-shauq mein aaram aaya
tur se ek kashish-e-mashq thi surat-gar-e-shauq
tujh par ai wadi-e-aiman abas ilzam aaya
sard-mehri se kisi ko jo hui hajat-e-ghusl
garm-joshi ko baghal mein liye hammam aaya
zulf ke jal mein mashuq ka sar hai khud bhi
qaidiyon muzhda ki sayyaad tah-e-dam aaya
qabr se rasta sidha hai khuda ke ghar ka
jo udhar jaane laga bandh ke ehram aaya
hai agar nam isi ka adbiyat-e-latif
to 'zarif' is ko kahen kya jise ye kaam aaya