wo pas kya zara sa muskura ke baiTh gaya

wo pas kya zara sa muskura ke baith gaya
main is mazaq ko dil se laga ke baith gaya
jab us ki bazm mein dar-o-rasan ki baat chali
main jhat se uth gaya aur aage aa ke baith gaya
darakht kat ke jab thak gaya lakad-haara
to ek darakht ke sae mein ja ke baith gaya
tumhaare dar se main kab uthna chahta tha magar
ye mera dil hai ki mujh ko utha ke baith gaya
jo mere waste kursi lagaya karta tha
wo meri kursi se kursi laga ke baith gaya
phir us ke baad kai log uth ke jaane lage
main uth ke jaane ka nuskha bata ke baith gaya

waise tu mere makan tak tu chala aata hai

waise tu mere makan tak tu chala aata hai
phir achanak se tere zehn mein kya aata hai
aahen bharta hun ki puchhe koi aahon ka sabab
phir tera zikr nikalta hai maza aata hai
tere khat aaj latifon ki tarah lagte hain
khub hansta hun jahan lafz-e-wafa aata hai
jate-jate ye kaha us ne chalo aata hun
ab yahi dekhna hai jata hai ya aata hai
tujh ko waise to zamane ke hunar aate hain
pyar aata hai kabhi tujh ko bata aata hai

pahle muft mein pyas baTegi

pahle muft mein pyas bategi
baad mein ik-ik bund bikegi
kitne hasin ho masha-allah
tum pe mohabbat khub jachegi
zalim bas itna batla de
kya rone ki chhut milegi
aaj to patthar bandh liya hai
lekin kal phir bhuk lagegi
main bhi pagal tu bhi pagal
hum donon ki khub jamegi
yar ne pani pher diya hai
khak hamari khak udegi
duniya ko aise bhulunga
duniya mujh ko yaad karegi

dil phir us kuche mein jaane wala hai

dil phir us kuche mein jaane wala hai
baithe-bithae thokar khane wala hai
tark-e-talluq ka dhadka sa hai dil ko
wo mujh ko ek baat batane wala hai
kitne adab se baithe hain sukhe paude
jaise baadal sher sunane wala hai
ye mat soch sarae par kya bitegi
tu to bas ek raat bitane wala hai
inton ko aapas mein milane wala shakhs
asl mein ek diwar uthane wala hai
gadi ki raftar mein aai hai susti
shayad ab station aane wala hai
aakhri hichki leni hai ab aa jao
baad mein tum ko kaun bulane wala hai

bhare hue jam par surahi ka sar jhuka to bura lagega

bhare hue jam par surahi ka sar jhuka to bura lagega
jise teri aarzu nahin tu use mila to bura lagega
ye aisa rasta hai jis pe har koi barha ladkhada raha hai
main pahli thokar ke baad hi gar sambhal gaya to bura lagega
main khush hun us ke nikalne par aur itna aage nikal chuka hun
ke ab achanak se us ne wapas bula liya to bura lagega
ye aakhiri kanpkanpata jumla ki is talluq ko khatm kar do
bade jatan se kaha hai us ne nahin kiya to bura lagega
na jaane kitne ghamon ko pine ke baad tabish chadhi udasi
kisi ne aise mein aa ke hum ko hansa diya to bura lagega