zer-e-baam gumbad-e-KHazra azan

By

zer-e-baam gumbad-e-khazra azan
wo bilali saut wo samea kahan
khojta hai an-ginat masjud mein
qul-ho-allaho-ahad ka saeban
but-tarashi chaar-su hai jalwa-gar
de gai sab ki jabinon ko nishan
yasiyat ne karb ke dar wa kiye
khushk ummidon ka gulshan hai yahan
to rahin-e-khana-ha-e-iztirab
uth raha hai tere chilman se dhuan
zulmaten saya-fagan hain har taraf
baam-o-dar par raqs mein nau-midiyan
ruk zara padh kalma-e-la-taqnatu
khud-bakhud rauzan khulenge darmiyan
hauslon ke phir se ug aaenge par
azm-e-mohkam ko bana le saeban

waqt ke pas kahan sare hawale honge

By

waqt ke pas kahan sare hawale honge
zeb-e-qirtas faqat yas ke haale honge
khojta kya hai andheron mein tafahum ke diye
aa charaghon mein lahu dal ujale honge
dasht mein ja ke zara dekh to aae koi
zarre zarre ne mere ashk sambhaale honge
yun to maqdur nahin tujh ko teri qismat par
han magar tu ne kai sikke uchhaale honge
hum the khushbu ke kharidar magar kya malum
surkh phulon ne yahan sanp bhi pale honge

tum jo chhaalon ki baat karte ho

By

tum jo chhaalon ki baat karte ho
kyun himalon ki baat karte ho
kis ke hathon mein tha nahin patthar
sham walon ki baat karte ho
apne chehre pe pot kar kalak
tum ujalon ki baat karte ho
khushk roti to de nahin sakte
tar niwalon ki baat karte ho
jo namak hain hamare zakhmon par
un hawalon ki baat karte ho
chhin kar hum se jurat-e-izhaar
ab sawalon ki baat karte ho
jism jin ke hain bojh ruhon par
un jiyalon ki baat karte ho

Tek laga kar baiTha hun main jis buDhi diwar ke sath

By

tek laga kar baitha hun main jis budhi diwar ke sath
khauf hai mujh ko mit na jaun us ke har aasar ke sath
ghaza powder mal kar main bhi aa jata hun surkhi mein
bik jata hai chehra mera saste se akhbar ke sath
kyun na badh kar main pi jaun tere naqli sab tiryak
phir tu dhoka kar na pae basti mein bimar ke sath
hosh ke nakhun le to sain kyun ye ghaugha dala hai
dekh nahin ab lai ye chalti naghma-e-darbar ke sath
kis ne tujh ko saunpi bhai sardari is basti ki
sab ke sab mahshur ye honge apne apne yar ke sath
umr tamami shauq se hum ne ek hi titli pali thi
jab jab us ko khwab mein dekha udti hai aghyar ke sath

shuur-o-fikr se aage nikal bhi sakta hai

By

shuur-o-fikr se aage nikal bhi sakta hai
mera junun hawaon pe chal bhi sakta hai
mere guman pe uthao na ungliyan sahab
guman yaqin mein yaqinan badal bhi sakta hai
pahad apni qadamat pe yun na itraen
ubhar gaya koi zarra nigal bhi sakta hai
mere labon pe jami barf soch kar chhuna
tumhaare jism ka aahan pighal bhi sakta hai
koi asa bhi nahin aur hai akela tu
amir-e-shahr ka azhdar nigal bhi sakta hai
hamare sath jo chalna hai zad-e-rah le lo
kathin se mod hain panw phisal bhi sakta hai
karo na zid ki kisi shahr ki taraf jaun
mere aziz ye dil hai machal bhi sakta hai
kar apne sae se raaz-o-niyaz ki baaten
bahut udas hai lekin bahal bhi sakta hai
bas ek nazar jo karam ki wo us taraf phere
qadam bahak jo gaya hai sambhal bhi sakta hai

rahraw-e-rah-e-KHarabaat-e-chaman

By

rahraw-e-rah-e-kharabaat-e-chaman
aa ki phir ek bar ho ja kohkan
tesha-e-azm-e-jawan daman mein rakh
tu sawar-e-shauq-e-sultani mein fan
koi saya zindagi ka gar mile
chaak-e-gul ho kar pahan lena kafan
didani hai us ke hathon mein inan
shahr mein bante hai jo maghrib ka dhan
aa utha phir saghar-o-mina chalen
phir se ho jae wo pahle sa sukhan
jis mein thi tah-dari-e-mansuriyat
wo anal-haq ka kahan hai bankpan