chand tare bana ke kaghaz par

chand tare bana ke kaghaz par
khush hue ghar saja ke kaghaz par
bastiyan kyun talash karte hain
log jangal uga ke kaghaz par
jaane kya hum se kah gaya mausam
khushk patta gira ke kaghaz par
hanste hanste mita diye us ne
shahr kitne basa ke kaghaz par
hum ne chaha ki hum bhi ud jaen
ek chidiya uda ke kaghaz par
log sahil talash karte hain
ek dariya baha ke kaghaz par
naw suraj ki dhup ka dariya
tham gae kaise aa ke kaghaz par
khwab bhi khwab ho gae 'adil'
shakl-o-surat dikha ke kaghaz par

din ke sine pe sham ka patthar

din ke sine pe sham ka patthar
ek patthar pe dusra patthar
ye suna tha ki dewta hai wo
mere haq hi mein kyun hua pathar
daere bante aur mitte the
jhil mein jab kabhi gira patthar
ab to aabaad hai wahan basti
ab kahan tere nam ka patthar
ho gae manzilon ke sab rahi
de raha hai kise sada patthar
sare tare zamin pe gir jate
zor se main jo phenkta patthar
nam ne kaam kar dikhaya hai
sab ne dekha hai tairta patthar
tu use kya uthaega 'adil'
'mir' tak se na uth saka patthar

do ajnabi

ek patti ke
tutne girne ki aawaz se
sihar utha hai
sahemta
ped
be-talluq shakh par baithi hai
chidiya
nak ke niche pada hai
ghonsla bikhra hua
jis ke girne aur bikharne ki
sada se
be-khabar hai
ped
muddaton se
wo hamari hi tarah hain
sath sath

ek ek lamhe ko palkon pe sajata hua ghar

ek ek lamhe ko palkon pe sajata hua ghar
ras aata hai kise hijr manata hua ghar
khwab ke khadshe se ab nind udi jati hai
main ne dekha hai use chhod ke jata hua ghar
gar zaban hoti to patthar hi batata sab ko
kis qadar tuta hai wo khud ko banata hua ghar
us ka ab zikr na kar chhod ke jaane wale
tu ne dekha hi kahan ashk bahata hua ghar
ab use yaad kahun yas kahun ya wahshat
mujh ko aata hai nazar khak udata hua ghar
thak gaya kya mere tulani safar se 'adil'
so gaya sath mere mujh ko sulata hua ghar