diwali

ram ke hijr mein ek rose bharat ne ye kaha
qalb-e-muztar ko shab-o-roz nahin chain zara
dil mein arman hai ki aa jaen watan mein raghubir
yaad mein un ki kaleje mein chubhe hain nashtar
koi bhai se kahe zakhm-e-jigar bhar den mera
khana-e-dil ko ziyarat se munawwar kar den
ram aaen to diye ghi ke jalaun ghar ghar
dip-mala ka saman aaj dikhaun ghar ghar
tegh-e-furqat se jigar pash hua jata hai
dil gham-e-ranj se pamal hua jata hai
dagh hain mere jale dil pe hazaron lakhon
gham ke nashtar jo chale dil pe hazaron lakhon
kah rahe the ye bharat jabki siri-ram aae
dhum duniya mein machi nur ke baadal chhae
arsh tak farsh se jai jai ki sada jati thi
khurrami ashk har ek aankh se barsati thi
jalwa-e-rukh se hua ram ke aalam raushan
pur umidon ke gulon se hua sab ka daman
mohni shakl jo raghubir ki nazar aati thi
aankh tazim se khilqat ki jhuki jati thi
muddaton baad bharat ne ye nazara dekha
kaamyabi ke falak par tha sitara chamka
dil khushi se kabhi pahlu mein uchhal padta tha
ho mubarak ye kabhi munh se nikal padta tha
hote raushan hain charagh aaj jahan mein yaksan
gul hua aaj hi par ek charagh-e-taban
hai murad us se wo bhaarat ka charagh-e-raushan
nam hai jis ka dayanand jo tha fakhr-e-watan
jis dayanand ne bhaarat ki palat di qismat
jis dayanand ne duniya ki badal di haalat
jis dayanand ne gulzar banae jangal
jis dayanand ne qaumon mein macha di halchal
aaj wo hind ka afsos dulara na raha
gham-nasibon ke liye koi sahaara na raha
yaad hai us ki zamane mein har ek su jari
us ki furqat ki lagi tegh jigar par kari
dil ye kahta hai ki is waqt zabanen kholen
aao mil mil ke dayanand ki hum jai bolen

bhagwan kirshn ke charnon mein shardha ke phul chaDhane ko

ek prem pujari aaya hai charnon mein dhyan lagane ko
bhagwan tumhaari murat par shardha ke phul chadhane ko
wo prem ka tufan dil mein utha ki zabt ka yara hi na raha
aankhon mein ashk umand aae premi ka haal batane ko
tum nand ko nain ke tare ho tum din dukhi ke sahaare ho
tum nange pairon dhane ho bhagton ka man badhane ko
aankhon se khun tapakta hai sine par khanjar chalta hai
man-mohan jald khabar lena dinon ki jaan bachane ko
furqat mein tumhaari qalb ke tukde aankhon se bah jate hain
ai kirshn murari aao bhi raaton ko dher bandhane ko
phir sanwli chhab dikhla do zara phir prem ka rang jama do zara
gokul mein shyam nikal aao murli ki ter sunane ko
updesh dharam ka de kar phir balwan bana do bhagton ko
ai mohan jald zaban kholo gita ke raaz batane ko

hindostan

go khak ho chuka hai hindostan hamara
phir bhi hai kul jahan mein palla garan hamara
munh tak raha hai ab tak sara jahan hamara
hai nam kishwaron mein wird-e-zaban hamara
zarkhez hai sarasar ye gulistan hamara
hai tair-e-tilai hindostan hamara
bhaarat mein dekhte the hum sanaten jahan ki
mashhur thi jahan mein karigari yahan ki
wo baat hindiyon ne ghairon ke darmiyan ki
jis par jhuki hai gardan amboh-e-sarkashan ki
milta tha ilm-o-fan mein ham-sar kahan hamara
hai tair-e-talai hindostan hamara
taslim kar rahe hain espen aur japan
sab mante hain loha german france-o-yunan
america mein hai charcha is mulk ka numayan
bhaarat ki saltanat par bartaniya hai nazan
uncha hai aasman se ye aastan hamara
hai tair-e-tilai hindostan hamara
parbat ki chotiyan hain darban hamare dar ki
daman mein jis ke pinhan kanen hain sim-o-zar ki
gang-o-jaman pe jis dam sayyaad ne nazar ki
sarsabz wadiyon se is ki nazar na sar ki
kya ghairat-e-iram hai ye bostan hamara
hai tair-e-tilai hindostan hamara
paida kiye the jis ne arjun kanad gautam
aaghosh mein pale the jis ki byas-o-bikram
godi mein jis ki khele the bhim ram bhisham
jin ke sabab se ab tak hai hindiyon mein dam-kham
wo mulk-e-be-badal hai jannat-nishan hamara
hai tair-e-tilai hindostan hamara

chaDha diya hai bhagat-singh ko raat phansi par

giri hai barq-e-tapan dil pe ye khabar sun kar
chadha diya hai bhagat-singh ko raat phansi par
utha hai nala-e-pur-dard se naya mahshar
jigar pe madar-e-bhaarat ke chal gae khanjar
shikasta-haal hua qaum ke habibon ka
badan mein khushk lahu ho gaya gharibon ka
abhi to qaum ne 'nehru' ka gham uthaya tha
abhi to das ki furqat ne hashr dhaya tha
abhi to hijr ka bismil ke zakhm khaya tha
abhi to koh-e-sitam charkh ne giraya tha
chale hain nawak-e-bedad phir kalejon par
ki aaj uth gae afsos naujawan rahbar
adu watan ko tashaddud se kya dabaenge
wo apne hath se fitne nae jagaenge
jo mulk-o-qaum ki dewi pe sar chadhaenge
nisar ho ke shahidon mein nam paenge
girega qatra-e-khun bhi jahan saputon ka
fida-e-hind wahan honge sainkadon paida
jahan se mulk-e-adam naunihaal jate hain
numayan kar ke sitam-kash ka haal jate hain
gira ke hind mein koh-e-malal jate hain
watan ko chhod ke bhaarat ke lal jate hain
tadap rahe hain judai mein be-qarar-e-watan
chale hain aalam-e-baala ko jaan-nisar-e-watan