ja laDi yar se hamari aankh

ja ladi yar se hamari aankh
dekho kar baithi faujdari aankh
shokhiyan bhul jae aahu-e-chin
dekh pae agar tumhaari aankh
lakh inkar mai-kashi se karo
kahin chhupti bhi hai khumari aankh
howega ranj ya khushi hogi
kyun phadakne lagi hamari aankh
jaanib-e-dar nigah-e-hasrat hai
kis ki karti hai intizari aankh
kar ke iqrar ho gaya munkir
samne aa ke kis ne mari aankh
murgh-e-dil par nigah hai un ki
aisi dekhi nahin shikari aankh
hai sitam nok-jhonk chitwan mein
lad rahi hai chhuri katari aankh
dil jigar donon ho gae majruh
ban gai hai chhuri katari aankh
koi dam mein ubhaarte hain use
us ne dekha ki hum ne mari aankh
'agha' sahab tumhaare dilbar ki
kya rasili hai kya hai pyari aankh

maza hai imtihan ka aazma le jis ka ji chahe

maza hai imtihan ka aazma le jis ka ji chahe
namak zakhm-e-jigar par aur dale jis ka ji chahe
jigar maujud hai to wo bana le jis ka ji chahe
gala hazir hai khanjar aazma le jis ka ji chahe
agar hai husn ka dawa mah o khurshid donon mein
kaf-e-pa se tumhaare munh mila le jis ka ji chahe
ye musht-e-ustukhwan apne kisi ke kaam mein aaen
huma ho ya sag-e-dildar kha le jis ka ji chahe
agar hai zindagi baqi to hum hasrat nikalenge
dil-e-pur-arzu par khak dale jis ka ji chahe
faqiron ko nahin kuchh zinat-e-duniya se matlab hai
main khush kambal mein hun odhe doshaale jis ka ji chahe
jo raushan dil mein un ki raushni chhupti nahin hargiz
mah-e-taban pe sahab khak dale jis ka ji chahe
shikayat mujh ko donon se hai naseh ho ki waiz ho
na samjha hun na samjhun sar phira le jis ka ji chahe
main hun barg-e-khizan-uftada main mardud dahqan hun
gira hun un ki nazron se utha le jis ka ji chahe
nahin hota kabhi aab-e-rawan par shak najasat ka
mere ashkon ke dariya mein naha le jis ka ji chahe
chaman mein gul ke murjhane se 'agha' ho gaya sabit
bisan-e-ghuncha dam bhar muskura le jis ka ji chahe

hamare samne kuchh zikr ghairon ka agar hoga

hamare samne kuchh zikr ghairon ka agar hoga
bashar hain hum bhi sahab dekhiye nahaq ka shar hoga
na mud kar tu ne dekha aur na main tadpa na khanjar
na dil howega tera sa na mera sa jigar hoga
main kuchh majnun nahin hun jo ki sahra ko chala jaun
tumhaare dar se sar phodunga sauda bhi agar hoga
chaman mein lai hogi to saba-mashshatgi kar ke
jo gul se aage lipta hai kisi bulbul ka par hoga
tari ka bhi wahi malik hai jo malik hai khushki ka
madad-gar apna har mushkil mein shah-e-bahr-o-bar hoga
tasawwur zulf ka gar chhod dun mizhgan ka khatka hai
jo sar ke dard se fursat mili dard-e-jigar hoga
tabibo tum abas aae main kushta hun firangan ka
meri tadbir karne ko muqarrar doctor hoga
kisi ko koste kyun ho dua apne liye mango
tumhaara faeda kya hai jo dushman ka zarar hoga
maza aaega diwanon ki baaton mein pari-zado
jo 'agha' ka kisi din dasht-e-majnun mein guzar hoga