allah nazar koi Thikana nahin aata

allah nazar koi thikana nahin aata
aane ko chale aate hain jaana nahin aata
kah dun to maze par ye fasana nahin aata
thahrun to palat kar ye zamana nahin aata
yun roz hua karte the be-sakhta chakkar
ab aaj bulaya hai to jaana nahin aata
tadbir si tadbir duaon si duaen
sab aata hai taqdir banana nahin aata

hamin ne unki taraf se mana liya dil ko

hamin ne un ki taraf se mana liya dil ko
wo karte uzr to ye aur bhi garan hota
samajh to ye ki na samjhe khud apna rang-e-junun
mizaj ye ki zamana mizaj-dan hota
bhari bahaar ke din hain khayal aa hi gaya
ujad na jaata to phulon mein aashiyan hota
dimagh arsh pe hai tere dar ki thokar se
nasib hota jo sajda to main kahan hota

qismat mein KHushi jitni thi hui aur gham bhi hai jitna hona hai

qismat mein khushi jitni thi hui aur gham bhi hai jitna hona hai
ghar phunk tamasha dekh chuke ab jangal jangal rona hai
hasti ke bhayanak nazzare sath apne chale hain duniya se
ye khwab-e-pareshan aur hum ko ta-subh-e-qayamat sona hai
dam hai ki hai ukhda ukhda sa aur wo bhi nahin aa chukte hain
qismat mein ho marna ya jina ab ho bhi chuke jo hona hai
dil hi to hai aakhir bhar aaya tum chin-ba-jabin kyun hote ho
hum tum ko bhala kuchh kahte hain taqdir ka apni rona hai
gham kahe ka yaro matam kya badloge nizam-e-alam kya
marna tha 'raza' ko marta hai ye kahe ka rona dhona hai