ab tumko hi sawan ka sandesa nahin banna

ab tum ko hi sawan ka sandesa nahin banna
mujh ko bhi kisi aur ka rasta nahin banna
kahti hai ki aankhon se samundar ko nikalo
hansti hai ki tum se to kinara nahin banna
mohtat hai itni ki kabhi khat nahin likhti
kahti hai mujhe auron ke jaisa nahin banna
taswir banaun to bigad jati hai mujh se
aisa nahin banna mujhe waisa nahin banna
is tarah ke lab kaun tarashega dobara
is tarah ka chehra to kisi ka nahin banna
chehre pe kisi aur ki palken nahin jhukti
aankhon mein kisi aur ka naqsha nahin banna
main soch raha hun ki main hun bhi ki nahin hun
tum zid pe adi ho ki kisi ka nahin banna
main raat ki inten to bahut jod raha hun
par mujh se tere din ka daricha nahin banna
inkar to yun karti hai jaise ki kabhi bhi
chhanw nahin banna use saya nahin banna
is dard ki tahwil mein rahte hue hum ko
chup-chap bikharna hai tamasha nahin banna
us ne mujhe rakhna hi nahin aankhon mein 'amir'
aur mujh se koi aur thikana nahin banna

ada hai KHwab hai taskin hai tamasha hai

ada hai khwab hai taskin hai tamasha hai
hamari aankh mein ek shakhs be-tahasha hai
zara si chae giri aur dagh dagh waraq
ye zindagi hai ki akhbar ka tarasha hai
tumhaara bolta chehra palak se chhu chhu kar
ye raat aaina ki hai ye din tarasha hai
tere wajud se bara-dari damak utthi
ki phul pallu sarakne se irtiasha hai
main be-zaban nahin jo bolta hun likh likh kar
meri zaban tale zahr ka batasha hai
tumhaari yaad ke charkon se lakht lakht hai ji
ki khanjaron se kisi ne badan ko qasha hai
jahan bhar se jahan-gard dekhne aaen
ki putliyon ka mere mulk mein tamasha hai

saloni sardiyon ki nazm

purane boot hain tasme khule hain
abhi mitti ke chehre un-dhule hain
sharaben aur mashkiza sahar ka
abhi hai jism pakiza gajar ka
sute chehre pe istehza ka mausam
lahu nabzon se khali kar gaya hai
gale mein mulk ke tawiz dalo
bidesi barchhiyon se dar gaya hai
ghazal dalan mein rakkhi hai main ne
mahak hai sangtare ki qash jaisi
ye kaisi mai hai jo chakkhi hai main ne
mujhe ushshaq ye kahte hain 'amir'
bahut tanha sisakte dahr mein ho!
bade shaer ho chhote shahr mein ho
fareb-e-asr se madhosh kamra
nigodi titliyon se bhar gaya hai
samundar pindliyon tak aate aate
kisi patthar ki sil par mar gaya hai
saloni sardiyon se jhankte hain
wo abru kashtiyon ko hankte hain
sileti baadalon ka ye sahifa
meri mutthi mein padhta hai wazifa
main rota hun to ro padte hain tair
mere hujre mein kam aate hain zaer
ye poren nur-bafi kar rahi hain
mohabbat ko ghilafi kar rahi hain
tafakhur mein hai do honton ka kham bhi
abhi rakkha nahin main ne qalam bhi