aangan mein chhoD aae the jo ghaar dekh len

aangan mein chhod aae the jo ghaar dekh len
kis haal mein hai in dinon ghar-bar dekh len
jab aa gae hain shahr-e-tilismat ke qarib
kya chahti hai nargis-e-bimar dekh len
hansna hansana chhute hue muddaten huin
bas thodi dur rah gai diwar dekh len
arse se is dayar ki koi khabar nahin
mohlat mile to aaj ka akhbar dekh len
mushkil hai tera sath nibhana tamam umr
bikna hai na-guzir to bazar dekh len
aashuftagi hamari yahan lai bar bar
hai kya zarur tujh ko bhi har bar dekh len

aankhon ke band bab liye bhagte rahe

aankhon ke band bab liye bhagte rahe
badhte hue itab liye bhagte rahe
sone se jagne ka talluq na tha koi
sadkon pe apne khwab liye bhagte rahe
fursat nahin thi itni ki pairon se bandhte
hum hath mein rikab liye bhagte rahe
tezi se bitte hue lamhon ke sath sath
jine ka ek azab liye bhagte rahe
kuchh zindagi ki wajh samajh mein na aa saki
sochon ka ek nisab liye bhagte rahe

aankhon ke samne koi manzar naya na tha

aankhon ke samne koi manzar naya na tha
bas wo zara sa fasla baqi raha na tha
ab is safar ka silsila shayad hi khatm ho
sab apni apni rah len hum ne kaha na tha
darwaze aaj band samajhiye suluk ke
ye chalne wala dur talak silsila na tha
unchi udan ke liye par taulte the hum
unchaiyon pe sans ghutegi pata na tha
koshish hazar karti rahen tez aandhiyan
lekin wo ek patta abhi tak hila na tha
sab hi shikar-gah mein the khema-zan magar
koi shikar karne ko ab tak utha na tha
achchha hua ki gosha-nashini ki ikhtiyar
'ashufta' aur is ke siwa rasta na tha

aawara parchhaiyan

sare din ki thaki,
viran aur be-masraf raat ko
ek ajib mashghala hath aa gaya hai
ab wo!
sare shahr ki aawara parchhaiyon ko
jism dene ki koshish mein masruf hai
mujhe malum hai
agar gum-nam parchhaiyon ko
un ki pahchan mil gai
to shahr ke muazzaz aur ibaadat-guzar sharif-zade
ham-shakl parchhaiyon ke khauf se
parchhaiyon mein tabdil ho jaenge
aur
be-masraf din bhar ki thaki hui raat ko
ek aur mashghala mil jaega