ek jalwe ki hawas wo dam-e-rehlat bhi nahin

By

ek jalwe ki hawas wo dam-e-rehlat bhi nahin
kuchh mohabbat nahin zalim to murawwat bhi nahin
us ke kuche mein kahan kashmakash bim-o-raja
khauf-e-dozakh bhi nahin khwahish-e-jannat bhi nahin
zauq-e-masti ki mazammat na kar itni ai shaikh
kya tujhe nashsha-e-zauq-e-mai-e-ulfat bhi nahin
be-niyazi bhi utha lun main tere naz ki tarah
kya wo taqat na rahi mujh mein to himmat bhi nahin
kis tarah kahiye ki didar dikhaya us ne
bagh-e-jannat bhi nahin roz-e-qayamat bhi nahin
zohd-o-taqwa o islah-e-dar-husn-e-amal
kuchh nahin mujh mein magar kya teri rahmat bhi nahin
jazb-e-kaamil se use khinch lo ai hazrat-e-dil
kaise darwesh ho kuchh tum mein karamat bhi nahin
kabhi 'asi' se ham-aghosh na dekha tujh ko
asar-e-jazba-e-dil ahl-e-mohabbat bhi nahin

qatra wahi ki ru-kash-e-dariya kahen jise

By

qatra wahi ki ru-kash-e-dariya kahen jise
yani wo main hi kyun na hun tujh sa kahen jise
wo ek nigah ai dil-e-mushtaq is taraf
aashob-gah-e-hashr-e-tamana kahen jise
bimar-e-gham ki chaaragari kuchh zarur hai
wo dard dil mein de ki masiha kahen jise
ai husn-e-jalwa-e-rukh-e-jaanan kabhi kabhi
taskin-e-chashm-e-shauq-e-nazara kahen jise
is zoaf mein tahammul-e-harf-o-sada kahan
han baat wo kahun ki na kahna kahen jise
ye bakhshish apne banda-e-nachiz ke liye
thodi si punji aisi ki duniya kahen jise
ham-bazm ho raqib to kyun-kar na chhediye
aahang-e-saz-e-dard ki nala kahen jise
paimana-e-nigah se aakhir chhalak gaya
sar josh-e-zauq-e-wasl-e-tamanna kahen jise
'asi' jo gul se gal kisi ke hue to kya
mashuq wo ki sab se nirala kahen jise

ai junun phir mere sar par wahi shamat aai

By

ai junun phir mere sar par wahi shamat aai
phir phansa zulfon mein dil phir wahi aafat aai
mar ke bhi jazb-e-dil-e-qais mein tasir ye thi
khak udati hui laila sar-e-turbat aai
masjiden shahr ki ai pir-e-mughan khali hain
mai-kade mein to jamaat ki jamaat aai
wo hai khidki mein udhar bhid nazar-bazon ki
aaj us kuche mein sunte hain qayamat aai
kabhi ji bhar ke watan mein na rahe hum 'asi'
roz-e-milad se taqdir mein ghurbat aai