un ko maine apna kaha hai

By

un ko main ne apna kaha hai
itni hi bas apni khata hai
rahi hairan dekh raha hai
rahzan hi ab rah-numa hai
ye dil un se jab se laga hai
un ke siwa sab bhul gaya hai
us jine se baz hum aae
jina kya hai ek saza hai
lab khulte hi phul hain jhadte
kitni pyari un ki ada hai

tujhe hum yaad har-dam ai sitam ijad karte hain

By

tujhe hum yaad har-dam ai sitam ijad karte hain
yunhi apne dil-e-nashad ko hum shad karte hain
basa kar ek duniya aaj ranj-o-yas-o-hirman ki
hum apne dil ke virane ko phir aabaad karte hain
asiri se hamein kuchh ho gai hai aisi unsiyyat
qafas se chhut kar bhi hum qafas ko yaad karte hain
hamari fitrat-e-mardana ki tafrih hoti hai
karam karte hain hum par aap gar bedar karte hain

sarshaar hun saqi ki aankhon ke tasawwur se

By

sarshaar hun saqi ki aankhon ke tasawwur se
hai koi gharaz mujh ko baada se na saghar se
is daur mein maikhane ka nazm nirala hai
pi kar koi bahke hum ek jura ko bhi tarse
kitne hain jo ek qatra se pyas bujhate hain
sairab nahin hote kuchh log samundar se
hushiyar bahut rahna hai aaj ke rahi ko
jitna nahin rahzan se dar utna hai rahbar se
jurat ke dhani jo hain mai-khana hi un ka hai
jurat na ho jis mein wo ek jam ko bhi tarse
us dil ko samajhna kuchh aasan nahin pyare
ye sakht hai patthar se nazuk hai gul-e-tar se
socha tha na paimana ab munh se lagaunga
kya khair ho tauba ki jab ghir ke ghata barse
un se koi kah de wo khud apna muqaddar hain
jo log gila karte hain apne muqaddar se

sar jhukae sar-e-mahshar jo gunahgar aae

By

sar jhukae sar-e-mahshar jo gunahgar aae
us ke andaz pe rahmat ko na kyun pyar aae
jam-o-paimana se mai-khana se kya kaam use
ho ke saqi ki nigahon se jo sarshaar aae
di sada dil ne zara aur bhi dushwar ho rah
raste jab bhi mere samne hamwar aae
zindagi kyun na mere maut pe un ki jo log
muskuraate hue zindan se sar-e-dar aae
main ne tazin-e-chaman ke liye khun apna diya
pae phul auron ne hisse mein mere khar aae
bankpan apni tabiat ka kabhi kam na hua
samne apne koi lakh tarah-dar aae
aise jaan-bazon ki ban jae na kyun maut hayat
muskuraate hue 'asi' jo sar-e-dar aae

manzil pe le ke pahunchega azm-e-jawan mujhe

By

manzil pe le ke pahunchega azm-e-jawan mujhe
kah do na sath le ke chale karwan mujhe
sunta hun phir chaman mein hui khema-zan bahaar
aae na kyun qafas mein bhi yaad aashiyan mujhe
khoya hua hun un ke tasawwur mein is tarah
jaise sunae un ki koi dastan mujhe
ye jab bhi aai lai nawed-e-bahaar bhi
phir kyun bahaar se na ho pyari khizan mujhe
main ho gaya hun kab se nasheman se be-niyaz
kah de koi darae na barq-e-tapan mujhe
ek waqt tha chaman ke liye mar mite the hum
rahne usi chaman mein na de baghban mujhe

manus ho gae hain gham-e-zindagi se hum

By

manus ho gae hain gham-e-zindagi se hum
hum ko khushi mile to na lenge khushi se hum
phulon ki aarzu na karenge kisi se hum
kante samet lae hain un ki gali se hum
hum sham-e-gham ko subh-e-masarrat ka nam den
suraj karen tulua na kyun tirgi se hum
sach ke liye hum aaj ke suqraat ban gae
pite hain jam zahr ka apni khushi se hum
hum mil ke khud se khud ko bhi pahchante nahin
apne liye bhi ban gae hain ajnabi se hum
gham khate khate ho gaya manus-e-gham mizaj
ho jate hain fasurda-o-mahwar khushi se hum
hum ko watan mein ab koi pahchanta nahin
apne watan mein phirte hain ab ajnabi se hum
ban jaen kyun na khud hi numud-e-sahar ki zau
'asi' ziya talab na karen tirgi se hum