zang-KHurda lab achanak aaftabi ho gae

zang-khurda lab achanak aaftabi ho gae
us gul-e-khush-rang ko chhu kar gulabi ho gae
is ghazal par aayat-e-paighambari utri hai kya
log kahte hain ki sab misre sahabi ho gae
jhumne lagte hain us ko dekhte hi bagh mein
aise lagta hai parinde bhi sharabi ho gae
ab to mujh par bhi nahin khulta hai darwaza mera
tum to aate hi mere kamre ki chabi ho gae
dost aadam-khor chidiyon se abhi hai wasta
kya karunga jab kabutar bhi uqabi ho gae

tumhein gila hi sahi hum tamasha karte hain

tumhein gila hi sahi hum tamasha karte hain
magar ye log bhi kya kam tamasha karte hain
dikhai dete nahin awwalan mere darwesh
kahin milen to ba-raqsam tamasha karte hain
ye khas bhid hai marhum baadshahon ki
yahan sikandar-e-azam tamasha karte hain
sharik-e-kar-e-ibaadat nahin rahe ki ye log
darun-e-majlis-e-matam tamasha karte hain
bas ek panw thirakta hai raat-din mujh mein
chahaar-su kai aalam tamasha karte hain
khula hai aaj bhi us khanqah-e-ishq ka dar
malang aaj bhi paiham tamasha karte hain
tuyur dekhne aate hain meri ek jhalak
hazar bargad-o-shisham tamasha karte hain
ye shahr majma-e-khali se gar nahin hai khush
to aao mil ke azizam tamasha karte hain
kuchh aise log hain mere bhi milne wale log
jo bar-janaza-o-chihlum tamasha karte hain

itna hi bahut hai ki ye barud hai mujh mein

itna hi bahut hai ki ye barud hai mujh mein
angara-numa shakhs bhi maujud hai mujh mein
poron se nikal aai hai ek barf ki tahni
ai dost yahi aatish-e-namrud hai mujh mein
har gend ke pichhe koi aata hai hamesha
ye kaun se bachche ki uchhal-kud hai mujh mein
gali nahin achchhi to tumhein pesh karun kya
ek aur bhi jumla sukhan-alud hai mujh mein
main dekhta rahta hun ki wo khidki hai khali
ta-haal yahi raunaq-e-be-sud hai mujh mein
yunhi to nahin log guzarte mere dil se
lagta hai koi manzil-e-maqsud hai mujh mein

hawa aai na indhan aa raha hai

hawa aai na indhan aa raha hai
charaghon mein naya-pan aa raha hai
jamal-e-yar tere jhankne se
kuen se pani raushan aa raha hai
main galiyon mein nikalna chahta hun
mere raste mein aangan aa raha hai
mujhe shahtut ki khwahish bahut thi
magar mujh par to jaman aa raha hai
miyan main apni jaanib aa raha hun
khabar kar do ki dushman aa raha hai
mujhe khairaat banti ja rahi hai
mere hathon mein bartan aa raha hai
gale mein haar aana chahiye tha
gale mein tauq-e-gardan aa raha hai