tere honTon pe saja hai kya hai

By

tere honton pe saja hai kya hai
tera har rang dua hai kya hai
tere aangan mein luta hai kya hai
wo bhi barish mein khula hai kya hai
rang chadhte hain utar jate hain
mausam-e-hijr pata hai kya hai
log alfaz badal lete hain
aur chehron pe likha hai kya hai
apni barbaad nigahi ke sitam
ek dar aur khula hai kya hai
mere hathon ki lakiron pe na ja
tu ne khud hi to likha hai kya hai
khud se milta hun bichhad jata hun
khwab zanjir hua hai kya hai
naddiyan khushk hui jati hain
koi us par khada hai kya hai
meri aankhon se qayamat barse
jo bhi kuchh tu ne diya hai kya hai
apne waqton ki zaban bolta hun
phir ye bazar laga hai kya hai
meri basti mein udasi kaisi
shahar ki samt chala hai kya hai
kitni khush-posh faza hai 'khurshid'
teri aankhon ka nasha hai kya hai

tere honTon pe nazar baqi hai

By

tere honton pe nazar baqi hai
kis ke hone ki khabar baqi hai
kitne khush-rang badan dhul hue
waqt ki chaal magar baqi hai
aaj bhi gham ki salami ke liye
dil ka aabaad nagar baqi hai
shab ki qindil uthane wale
dekh chehron pe sahar baqi hai
dard ka chehra tha barbaad hua
dasht mein sukha shajar baqi hai
khun jawan khun se holi khelo
chand qadmon ka safar baqi hai

mere wajud ke aangan mein KHwab raushan tha

By

mere wajud ke aangan mein khwab raushan tha
sawad-e-hijr mein taza gulab raushan tha
kali kali ki zaban par azab raushan tha
ai ham-safar dil-e-khana-kharab raushan tha
ye kis hisab mein jheli hai main ne dar-ba-dari
tere sawal-e-badan par jawab raushan tha
main apni aag se khela main apne aap jala
hisar-e-lams mein utra sahab raushan tha
tu rat-jagon ki masafat mein gum hua 'khurshid'
ek aaftab pas-e-aftab raushan tha

kis se dil bahlaun main

By

kis se dil bahlaun main
kis ke naz uthaun main
nind bhari in aankhon mein
khwab kahan se laun main
meri baaten teri hain
kaun si baat chhupaun main
shahr ne puchha ganw ka
us ko kya batlaun main
rah mein kaise der hui
kis kis ko samjhaun main
sahra sahra barish hai
dhup kidhar se laun main

yak jaan do qalib

By

donon ek hi zat mein gum the
baaten karte hanste khelte
chalte chalte ik-duje ko
dekh bhi lete
aab-o-hawa aur mitti ek
ek uthan
donon apne waqton ki aawaz bane the
dhun dariche chehra-mohra
ek tha un ka
ek si rangat ek hi rang mein range hue the
phir bhi donon alag alag the