zarf se baDh ke ho itna nahin manga jata

By

zarf se badh ke ho itna nahin manga jata
pyas lagti hai to dariya nahin manga jata
chand jaisi bhi ho beti kisi muflisi ki to
unche ghar walon se rishta nahin manga jata
dosti kar ke hawa se jo jala den ghar ko
un charaghon se ujala nahin manga jata
apne kamzor buzurgon ka sahaara mat lo
sukhe pedon se to saya nahin manga jata
pet bharte hain jo mange hue tukde kha kar
un ke hathon se niwala nahin manga jata
bhik bhi mango to tahzib ka kasa le kar
hath phaila ke khazana nahin manga jata
hai ibaadat ke liye shart aqidat 'dana'
bandagi ke liye sajda nahin manga jata

ye baat sach hai ki tera makan uncha hai

By

ye baat sach hai ki tera makan uncha hai
tu ye na soch tera khandan uncha hai
kamal kuchh bhi nahin aur shohraton ki talab
sambhal ke tir chalana nishan uncha hai
kahin azab na ban jae us ka saya bhi
sutun tute hue saeban uncha hai
mujhe yaqin hai tu shart haar jaega
ki dastaras se teri aasman uncha hai
wo qatilon ko chhuda laega adalat se
hai us ki baat mudallal bayan uncha hai
qubul karta nahin ye dilon ke rishton ko
samaj tere mere darmiyan uncha hai
isi ghurur mein 'dana' saron se chhat bhi gai
tere makan se mera makan uncha hai

wahi dard hai wahi bebasi tere ganw mein mere shahr mein

By

wahi dard hai wahi bebasi tere ganw mein mere shahr mein
be-ghamon ki bhid mein aadmi tere ganw mein mere shahr mein
yahan har qadam pe sawal hai wahan har qadam pe malal hai
badi uljhanon mein hai zindagi tere ganw mein mere shahr mein
kise dost apna banaen hum kise dil ka haal sunaen hum
sabhi ghair hain sabhi ajnabi tere ganw mein mere shahr mein
hain sabhi ki apni zaruraten koi kaise bante mohabbaten
na khulus hai na hai dosti tere ganw mein mere shahr mein
na wo husn hai na hijab hai na wo ishq mein tab-o-tab hai
na wo aabru-e-wafa rahi tere ganw mein mere shahr mein
main ilaj-e-gham bhi na kar saka tera jam to bhi na bhar saka
hai har ek mod pe tishnagi tere ganw mein mere shahr mein
ye hasad jahan ki nazar mein hai gham-e-'dana' un ke jigar mein hai
hai sabhi ko pyar se dushmani tere ganw mein mere shahr mein

wafadari pe de di jaan ghaddari nahin aai

By

wafadari pe de di jaan ghaddari nahin aai
hamare khun mein ab tak ye bimari nahin aai
khuda ka shukr sohbat ka asar hota nahin hum par
adakaron mein rah kar bhi adakari nahin aai
amir-e-shahr ho kar bhi nahin koi teri izzat
tere hisse mein ghairat aur khuddari nahin aai
hamari dars-gahon ki nizamat aisi bigdi hai
kitaben padh ke bhi bachchon mein hushyari nahin aai
lagai aag us ne shahr mein itni safai se
ki us ke ghar pe ud ke ek bhi chingari nahin aai
abhi se kis liye bete ko bhejen naukri karne
hamare dast-o-pa mein itni lachaari nahin aai
main nadani pe apni aaj tak hairan hun 'dana'
ki duniya ko samajhne ki samajhdari nahin aai

uski wafa na meri wafa ka sawal tha

By

us ki wafa na meri wafa ka sawal tha
donon hi chup the sirf ana ka sawal tha
is kashmakash mein khatm hua raat ka safar
zid thi meri to us ki haya ka sawal tha
sab muntazir the aasman deta hai kya jawab
pyase labon pe kali ghata ka sawal tha
majbur hum the aur wo mukhtar tha magar
donon ke beach dast dua ka sawal tha
jaana tha mai-kade se hamein ku-e-yar tak
lekin hamari laghzish-e-pa ka sawal tha
taqsim karne nikla tha wo raushni magar
jalte hue diye ko hawa ka sawal tha
'dana' mujhe azal se ghazal ki talash thi
ye meri zindagi ki ada ka sawal tha

nam KHushbu tha sarapa bhi ghazal jaisa tha

By

nam khushbu tha sarapa bhi ghazal jaisa tha
chand se chehre pe parda bhi ghazal jaisa tha
sare alfaz ghazal jaise the guftar ke waqt
rang-e-izhaar-e-tamanna bhi ghazal jaisa tha
phul hi phul the kaliyan thin hasin galiyan thin
aap ke ghar ka wo rasta bhi ghazal jaisa tha
us ki aankhen bhi hasin aankh mein aansu bhi hasin
gham mein duba hua chehra bhi ghazal jaisa tha
wo jawani wo mohabbat wo shararat ka nasha
wo meri umr ka hissa bhi ghazal jaisa tha
fasle the na judai thi na tanhai thi
teri qurbat ka wo lamha bhi ghazal jaisa tha
wo na mera na main us ka tha magar ai 'dana'
dhundla dhundla sa wo rishta bhi ghazal jaisa tha