lamha-dar-lamha teri rah taka karti hai

lamha-dar-lamha teri rah taka karti hai
ek khidki teri aamad ki dua karti hai
silwaten chikhti rahti hain mere bistar ki
karwaton mein hi meri raat kata karti hai
waqt tham jata hai ab raat guzarti hi nahin
jaane diwar-ghadi raat mein kya karti hai
chand khidki mein jo aata tha nahin aata ab
tirgi chaaron taraf raqs kiya karti hai
mere kamre mein udasi hai qayamat ki magar
ek taswir purani si hansa karti hai

jahan sare hawa banne ki koshish kar rahe the

jahan sare hawa banne ki koshish kar rahe the
wahan bhi hum diya banne ki koshish kar rahe the
hamein zor-e-tasawwur bhi ganwana pad gaya hum
tasawwur mein khuda banne ki koshish kar rahe the
zamin par aa gire jab aasman se khwab mere
zamin ne puchha kya banne ki koshish kar rahe the
unhen aankhon ne bedardi se be-ghar kar diya hai
ye aansu qahqaha banne ki koshish kar rahe the
hamein dushwariyon mein muskurane ki talab thi
hum ek taswir sa banne ki koshish kar rahe the

hum aise sar-phire duniya ko kab darkar hote hain

hum aise sar-phire duniya ko kab darkar hote hain
agar hote bhi hain be-intiha dushwar hote hain
khamoshi kah rahi hai ab ye do-aba rawan hoga
hawa chup ho to barish ke shadid aasar hote hain
zara si baat hai is ka tamasha kya banaen hum
irade tutte hain hausle mismar hote hain
shikayat zindagi se kyun karen hum khud hi tham jaen
jo kam-raftar hote hain wo kam-raftar hote hain
gale mein zindagi ke risman-e-waqt hai to kya
parinde qaid mein hon to bahut hoshiyar hote hain
jahan wale muqayyad hain abhi tak ahd-e-tifli mein
yahan ab bhi khilaune raunaq-e-bazar hote hain
gulu-e-khushk un ko bhejta hai de ke mashkiza
kuchh aansu tishna-kaamon ke alam-bardar hote hain
badan un ko kabhi bahar nikalne hi nahin deta
'qamar-abbas' to ba-qaeda tayyar hote hain

haalat-e-haal se begana bana rakkha hai

haalat-e-haal se begana bana rakkha hai
khud ko mazi ka nihan-khana bana rakkha hai
khauf-e-dozakh ne hi ijad kiya hai sajda
dar ne insan ko diwana bana rakkha hai
mimbar-e-ishq se taqrir ki khwahish hai hamein
dil ko is waste maulana bana rakkha hai
matam-e-shauq bapa karte hain har sham yahan
jism ko hum ne azan-khana bana rakkha hai
waqt-e-rukhsat hai mere chahne walon ne bhi ab
sans ko waqt ka paimana bana rakkha hai
jaante hain wo parinda hai nahin thahrega
hum ne us dil ko magar dana bana rakkha hai