yun to shiraaza-e-jaan kar ke baham uThte hain

By

yun to shiraaza-e-jaan kar ke baham uthte hain
baithne lagta hai dil junhi qadam uthte hain
hum to is razm-gah-e-waqt mein rahte hain jahan
hath kat jaen to danton se alam uthte hain
sahl angar-tabiat ka bura ho jis se
naz uthte hain tere aur na sitam uthte hain
koi raunde to uthate hain nigahen apni
warna mitti ki tarah rah se kam uthte hain
nind jati hi nahin arz-e-hunar se aage
daftar-e-gham hi sada kar ke raqam uthte hain
din ki aaghosh-e-razaat se nikal kar 'tabish'
raat ki raat kaf-e-khak se hum uthte hain

ye wahime bhi ajab baam-o-dar banate hain

By

ye wahime bhi ajab baam-o-dar banate hain
hawa ki shakh pe khushbu ka ghar banate hain
kaf-e-khayal pe aks-e-nashat-e-rang tera
nahin banane ka yara magar banate hain
ye mashghala hai tere aashiyan paraston ka
ki zer-e-dam pade baal-o-par banate hain
wo apni marzi ka matlab nikal leta hai
agarche baat to hum soch kar banate hain
main jab bhi dhup ke sahra mein ja nikalta hun
wo hath mujh pe dua ka shajar banate hain
meri misal hai un sabz shakhchon jaisi
jo dhup kat ke malbus zar banate hain
hum us ko bhul ke karte hain shairi 'tabish'
kamal-e-be-hunari se hunar banate hain

ye hum jo hijr mein us ka KHayal bandhte hain

By

ye hum jo hijr mein us ka khayal bandhte hain
hawa ki shakh se bu-e-visal bandhte hain
hamare bas mein kahan zist ko sukhan karna
ye qafiya faqat ahl-e-kamal bandhte hain
ye ahd-e-jeb-tarashan ko ab hua malum
yahan ke log girah mein sawal bandhte hain
wo khub jaante hain ham-dua nihadon ko
hamare hath ba-waqt-e-zawal bandhte hain
sabhi ko shauq-e-asiri hai apni apni jagah
wo hum ko aur hum un ka khayal bandhte hain
tumhein pata ho ki hum sahilon ke parwarda
mohabbaton mein bhi mazbut jal bandhte hain
phir us ke baad kahin bhi wo ja nahin sakta
jise bhi bandhte hain hum kamal bandhte hain

ye dekh mere naqsh-e-kaf-e-pa mere aage

By

ye dekh mere naqsh-e-kaf-e-pa mere aage
aage bhi kahan jata hai rasta mere aage
ai tishna-labi tu ne kahan la ke duboya
is bar to dariya bhi nahin tha mere aage
aise nahin manunga main hasti ka tawazun
taqtia kiya jae ye misra mere aage
ai qamat-e-dil-dar-e-guzistha ki muafi
pahle koi mear nahin tha mere aage
kyunkar sukhan aaghaz kiya jae ki wo aankh
la rakhti hai ajdad ka likkha mere aage
hairat hai ki deti hain mujhe tana-e-wahshat
tartib se rakkhi hui ashya mere aage
main jaanta hun us ke sabhi bhed sabhi bhaw
duniya ne kabhi raqs kiya tha mere aage
main ishq ke aadab zara sikh lun pahle
baithegi adab se yahi duniya mere aage

yaad kar kar ke use waqt guzara jae

By

yaad kar kar ke use waqt guzara jae
kis ko fursat hai wahan kaun dobara aa jae
shak sa hota hai har ek pe ki kahin tu hi na ho
ab tere nam se kis kis ko pukara jae
saira tujh ko bahut yaad hain us ki baaten
kyun na kuchh waqt tere sath guzara jae
jis tarah ped ko badhne nahin deti koi bel
kya zaruri hai mujhe gher ke mara jae
ain mumkin hai ki ho us se ilaj-e-wahshat
shahr mein zor se ek nam pukara jae
us hasin shakhs ki khatir jo kaha hai 'tabish'
kam hai is sher ko jitna bhi sanwara jae