aankh pe paTTi bandh ke mujhko tanha chhoD diya hai

aankh pe patti bandh ke mujh ko tanha chhod diya hai
ye kis ne sahra mein la kar sahra chhod diya hai
jism ki bori se bahar bhi kabhi nikal aaunga
abhi to is par khush hun us ne zinda chhod diya hai
zehn mera aazad hai lekin dil ka dil mutthi mein
aadha us ne qaid rakha hai aadha chhod diya hai
jahan dua milti thi allah jodi salamat rakkhe
main ne tere baad udhar se guzarna chhod diya hai
chaaron shane chit mitti par gira pada hun 'tabish'
jaane kis ne dusri jaanib rassa chhod diya hai

ab adhure ishq ki takmil hi mumkin nahin

ab adhure ishq ki takmil hi mumkin nahin
kya karen paigham ki tarsil hi mumkin nahin
kya use samjhaun kaghaz par lakiren khinch kar
jazba-e-benam ki tashkil hi mumkin nahin
aise mausam mein bhi sharh-e-dil kiye jata hun main
jab ki is ijmal ki tafsil hi mumkin nahin
kis jagah ungli rakhun kis harf ko kaise padhun
aayat-e-imkan teri tartil hi mumkin nahin
tohmat-e-ruswai kaise ishq par rakhta koi
aise kaamon mein to aisi dhil hi mumkin nahin
kunj-e-nisyan mein pade dhundla gae us ke nuqush
ab to us khush-rang ki tamsil hi mumkin nahin
aur bhi kuchh suraten ban jaengi ruswai ki
ishq mein 'tabish' faqat tazlil hi mumkin nahin

ab mohabbat na fasana na fusun hai yun hai

ab mohabbat na fasana na fusun hai yun hai
sahab-e-dasht to kahta tha ki yun hai yun hai
pas-e-girya koi deta hai tasalli tujh ko
ye jo ai dil tujhe be-wajh sukun hai yun hai
'mir'-sahib hi nahin us se pare baithte hain
jo bhi shaista-e-adab-e-junun hai yun hai
zindagi-bhar mein koi sher to aisa hota
main bhi kahta jo mera zakhm-e-darun hai yun hai
nist mein hast ka ehsas dilati hui aankh
shor karti hai ki hai kun-fayakun hai yun hai

ab parindon ki yahan naql-e-makani kam hai

ab parindon ki yahan naql-e-makani kam hai
hum hain jis jhil pe us jhil mein pani kam hai
ye jo main bhagta hun waqt se aage aage
meri wahshat ke mutabiq ye rawani kam hai
de mujhe anjum-o-mahtab se aage ki khabar
mujh se fani ke liye aalam-e-fani kam hai
gham ki talkhi mujhe nashsha nahin hone deti
ye ghalat hai ki teri chiz purani kam hai
ghaib ke bagh ka wo bhed khula hai mujh par
jis ka iblagh parindon ki zabani kam hai
hijr ko hausla aur wasl ko fursat darkar
ek mohabbat ke liye ek jawani kam hai
itna mushkil to na tha gum-shudagan ka milna
hum ne ai dasht teri khak hi chhani kam hai
is samay maut ki khushbu ke muqabil 'tabish'
kisi aangan mein khili raat-ki-rani kam hai