wo hansti hai to uske hath rote hain

By

kisi ke baad
apne hathon ki bad-surati mein kho gai hai wo
mujhe kahti hai 'tabish'! tum ne dekha mere hathon ko
bure hain nan?
agar ye khubsurat the to in mein koi bosa kyun nahin thahra
ajab ladki hai
pure jism se kat kar faqat hathon mein zinda hai
surahi-dar gardan narm honton tez nazron se wo bad-zan hai
ki in apnon ne hi us ko sar-e-bazar phenka tha
kabhi aankhon mein dubi
aur kabhi bistar pe silwat ki tarah ubhri
ajab ladki hai
khud ko dhundti hai
apne hathon ki lakiron mein
jahan wo thi na hai, aainda bhi shayad nahin hogi
wo jab ungli ghuma kar
'faiz' ki nazmen sunati hai
to is ke hath se pure badan ka dukh jhalakta hai
wo hansti hai to us ke hath rote hain
ajab ladki hai
pure jism se kat kar faqat hathon mein zinda hai
mujhe kahti hai 'tabish'! tum ne dekha mere hathon ko
bure hain nan?
main shayad gir chuka hun apni nazron se
main chhupna chahta hun us ke thaile mein
jahan cigarette hain machis hai
jo us ka haal mazi aur mustaqbil!
ajab ladki hai
aae to khushi ki tarah aati hai
use mujh se mohabbat hai
ki shayad mujh mein bhi bad-surati hai us ke hathon ki!

use maine nahin dekha

By

wo kaisi hai
use main ne nahin dekha
suna hai wo zamin-zadi
dhanak se apne khwabon ke ufuq gul-rang rakhti hai
mere khashak se aage kisi manzar mein rahti hai
hawa ke ghar mein rahti hai
wo kis suraj ka hissa hai
wo kis tare ki mitti hai
use main ne nahin dekha
meri aankhon se le kar us ki aankhon tak kise malum hai
kitne sitare hain
mujhe kya ilm wo kis rang ke kapde pahanti hai
wo khali bartanon mein apna din kaise bitati hai
wo khushiyan dhundti hai aur khud ko band almari mein rakh kar
bhul jati hai
wo ghar ke lawn mein baithi bahut kuchh sochti hogi
ki mera rang kaisa hai
meri aankhon ke raushan qumqumon mein tab kitni hai
meri shiryan mein sahme hue bachchon pe kya guzri
wo kis raste pe chal nikle ki apne ghar nahin pahunche
wo akasr sochti hogi
mere kamre mein budhi fahisha tanhai ke hote
mere din kaise katte hain
meri be-khwab raaten kin khayalon mein guzarti hain
kahan ishq-e-gurezan ki kahani khatm hoti hai
wo ghar ke lawn mein baithi yahi kuchh sochti hogi
ki mere nam ke pichhe meri taswir kaisi hai
mere khat bhi nahin us ke tasarruf mein
ki un ko khol kar mere badan ke raaz tak pahunche
mujhe us ne nahin dekha
na main ne us ko dekha hai
na us ne mujh ko dekha hai
magar apni mohabbat mein ajab husn-e-tawazun hai
wo akasr sochti hogi
main kitna apne daftar mein hun kitna ghar ki khalwat mein
wo mujh ko mujh pe hi taqsim kar ke dekhti hogi
mujhe mahsus hota hai
koi dil chirti khushbu mujhe aawaz deti hai
magar aawaz ke pichhe koi chehra nahin hota
wo mujh ko dekh leti hai
magar meri basarat mein mahak chehra nahin pati
ki khushbu kis ne dekhi hai
sada ko kis ne pakda hai
makani duriyan kaisi? zamani qurbaten kaisi?
wo mera jism hai lekin use main ne nahin dekha

paron mein sham Dhalti hai

By

kahan jaana tha mujh ko
kis nagar ki khak baalon mein sajaana thi
mujhe kin tahniyon se dhup chunna thi
kahan khema lagana tha
meri mitti rah-e-sayyargan ki ham-qadam nikli
meri palkon pe tare jhilmilate hain
badan mein aag jalti hai
magar panw mein khun-asham raste ladkhadate hain
ye kya shiraaza-bandi hai
ye meri be-pari kis kunj se ho kar baham nikli
nazar mein din nikalta hai
paron mein sham dhalti hai
magar main to lahu ki munjamid sil hun
badan ki kisht-e-viran mein
ye kis ki ungliyon ne umr bhar mujh ko kureda hai
kahan shiryan mein chalta hua ye qafila thahra
ki main us hath ki rekhaon mein rang-e-hina thahra
kahan jaana tha mujh ko
kis jagah khema lagana tha

pagal

By

wo aaya shahr ki taraf
ek us ki chap ki khanak
qayam-e-roz-e-ishq ki pukar thi
ki barg-o-bar-e-khak ka fishaar thi
wo aaya shahr ki taraf
lapak ke int ki taraf
wo is tarah badha ki jaise nan-e-khushk par koi
sag-e-gurasua gir pade
wo galiyon bhari zaban gali gali chhalak padi
har ek jeb us ki ungliyon se tar tar thi
ki us ki thuthni se phutti gamak
qiyam-e-roz-e-ishq ki pukar thi
wo galiyon bhari zaban mera libas gandagi se bhar gai
na jaane kitne log
us ke dast-e-dashna-dar se guzar gae
hayat par kar gae
wo be-hunar subuk-tani se dar gaya
sab us ki rah se hat gae
to us ne apni ruh ki barahnagi
zamin-e-mah ki taraf uchhaal di
ki ye hunar usi ka tha

mujhe rasta nahin milta

By

mujhe rasta nahin milta
main jauhad mein khile phulon ke haq mein bol kar
daldal ki tah mein dhans gaya hun
mein nahin kahta ki ye kis aasman ka kaun sa sayyara-e-bad hai
magar ye tah zamin ki aakhiri chhat hai
yahan din hi nikalta hai na sham-e-umr dhalti hai
parinda bhi nahin koi ki jis ke panw se koi
nawishta bandh kar bhejun to samjhun us se milne ka
bahana hath aaya hai
sitara bhi nahin koi ki jis se guftugu thahre
nawah-e-jism mein phaili khizar-asar tanhai meri sansen badhati hai
mujhe is daldali goshe se jaane ka koi rasta nahin milta
san ai meri khizar-asar tanhai
meri khatir bhi thoda sa taraddud kar
mujhe bhi to 'sikandar' ke janaze mein pahunchna hai
mujhe bhi aab-e-haiwan se chhalakti maut ka nauha sunana hai
mujhe bhi dur jaana hai
san ai meri khizar-asar tanhai
mujhe is tukhm-e-imkan ke dariche se nikalne de
numu ki chaal chalne de
mujhe rasta nahin milta

andesha-e-visal ki ek nazm

By

shafaq ke phul thaali mein sajae sanwli aai
charaghon se lawen khinchin darichon mein nami aai
mein samjha us se milne ki ghadi aai
hawa jarub-kash thi aasman-asar tinkon ki
jise apni suhulat ke liye duniya ye tan-asan duniya ek murawwat mein
hujum-e-khalq kahti hai
meri aankhen tahi gul-dan ki surat munderon par
gali se uthne wali gard ko titli batati hain
ye manzar munjamid ho kar safar aaghaz karta hai
lahu ki barq-raftari tanaben khench leti hai
ye kaisi sham-e-shahzadi
shafaq ke phul thaali mein sajae zina-e-shab se utar aai
mein samjha us se milne ki ghadi aai
salakhon se lahu phuta lahu mein raushni aai