aaj phir shab ka hawala teri jaanib Thahre

aaj phir shab ka hawala teri jaanib thahre
chand mazmun bane sharh-e-kawakib thahre
dad-o-tahsin ki boli nahin tafhim ka naqd
shart kuchh to mere bikne ki munasib thahre
nek guzre meri shab sidq-e-badan se tere
gham nahin rabta-e-subh jo kazib thahre
mukhlisi bais-e-tazhik zehanat dushman
ye mahasin to mere haq mein maaib thahre
main hun khud se mutaqabil mutabaadil mutazad
ruh thahre mera unwan kabhi qalib thahre
bat hi dil ke juda hon to bhala kaun aakhir
kis ka ham-wazn ba-mizan-e-matalib thahre

aarzu

meri ek khwahish hai
koi ek nuqta ho
jo wajud ki sari
sarhadon se bahar ho
jis pe ja ke main apna
ek jaeza le lun
apne-ap se hat kar
apne-ap ko dekhun
meri ek khwahish hai!

aawaz ke moti

sher ke jadugar sangit ke sahir
misron aur dhunon ke khali sipon ke kashkol uthae
afsurda maghmum khade hain
suni aankhon mein tuti ummid liye
aawaz ke un nauras qatron ki
jo khali sipon mein amrit ban kar tapken
aur izhaar guhar ban jae
lafz ki bandish tal ki sangat raqs ke tewar
be-harkat be-jaan dhare hain
un honton ki hasrat mein
jin ki pechida tarsil khamida jumbish
saut o bayan ko mani ki sau jihten bakhsha karti thi
yaad mein us pur-nur dahan ki
jis se ubalti tah-dar-tah aawaz ke raushan jadu se
shabd suron mein ghul jate the
nok-e-qalam se barbat ke taron tak jalte dagh
aab-e-sada se dhul jate the
(us ke dilkash git hawaon ke honton par sadiyon tak mahfuz rahenge)
shor bhari duniya ki dukhi tanhai mein
umr ki jis manzil pe jis jiwan ki dagar par
jazbon ki jis rahguzar par
dil ka musafir pal-do-pal ko thahrega
us ki sada ke hamdam hath
bujhi hui bezar samaat ke shane thapkenge
man ka dukh bantenge
ranj khushi mausam tyauhaar
wasl judai dard qarar
ummidon ki masti tute khwabon ki uljhan
zulm baghawat ganw watan
ahd-e-kuhan ke ramz nae yug ki tafsiren
ishq ibaadat aaina-khane tanwiren
har ghar har mahfil us ki aawaz ke moti
baam-e-hawa se barsenge
aah magar
alfaz ki bandish tal ki sangat raqs ke tewar
us ke dhun ke nae ujalon nae ufuq ko
rahti duniya tak tarsenge

abas hai raaz ko pane ki justuju kya hai

abas hai raaz ko pane ki justuju kya hai
ye chaak-e-dil hai use hajat-e-rafu kya hai
ye aaine hain ki ham-chehra lashkaron ki safen
ye aks aks koi surat-e-adu kya hai
mushabahat ke ye dhoke mumasalat ke fareb
mera tazad liye mujh sa hu-ba-hu kya hai
main ek halqa-e-be-samt apne markaz par
ye shash-jahat hain kaise ye chaar-su kya hai
ye lahm o khun ke kinae ye zehn ke uslub
mere wajud ka pairaya-e-numu kya hai
ye aasman se rag-e-jaan tak ek sargoshi
sukut-e-shab ka ye andaz-e-guftugu kya hai
ye rahguzar-e-nafas tangnae-mayusi
magar ye wusat-e-daman-e-arzu kya hai
hisar-e-jism o tilism-e-qaba aziz magar
nikal bhi aao meri jaan kabhu kabhu kya hai
khayal kya hai jo alfaz tak na pahunche 'saz'
jab aankh se hi na tapka to phir lahu kya hai