us se ummid-e-wafa ai dil-e-nashad na kar

us se ummid-e-wafa ai dil-e-nashad na kar
zindagi apni is arman mein barbaad na kar
gila-e-zaur na kar shikwa-e-bedar na kar
zulm sahne ka maza ye hai ki fariyaad na kar
khalwat-e-dil hai tere aa ke thaharne ki jagah
teri marzi use barbaad kar aabaad na kar
baghban tak mein hai ghat mein sayyaad hai dekh
sair-e-gulshan abhi ai bulbul-e-nashad na kar
kuchh tadapne ka sisakne ka maza lene de
itni tajil mere qatl mein jallad na kar
ab mujhe taqat-e-parwaz nahin ai sayyaad
rahne de qaid qafas se mujhe aazad na kar
upri dil se sahi kuchh to tasalli ho jae
saf inkar se zalim mujhe nashad na kar
dar-e-mahbub tak ai bakht mujhe pahuncha de
aur kuchh us se siwa tu meri imdad na kar
be-dhadak jaan sabhi ahl-e-wafa dete hain
tu faqat midhat-e-jabazi-e-farhad na kar
gham-e-dildar ne rag rag ka lahu chus liya
mujh se ab chhed tu ai nashtar-e-faulad na kar
lakh dushwar sahi zabt-e-fughan ai bulbul
magar ek uf bhi to be-marzi-e-sayyaad na kar
sadma-e-hijr ke shikwon pe wo bole shab-e-wasl
gai guzri hui baaton ko tu ab yaad na kar
ai dil us shokh ki taswir tasawwur mein to khinch
kaam mani se na rakh minnat-e-bahzad na kar
'asi'-e-be-sar-o-saman ko pada rahne de
apne kuche se utha kar use nashad na kar

kabhi ai haqiqat-e-dilbari simaT aa nigah-e-majaz mein

kabhi ai haqiqat-e-dilbari simat aa nigah-e-majaz mein
ki tadap rahe hain hazaron dil rah-e-ishq-e-sina-gudaz mein
ye kashish ye jazb ye moajiza nigah-e-yatim-e-hijaz mein
ki pade the saikdon ghaznawi bhi jahan libas-e-majaz mein
faqat ek nuqta gunah ka sar-e-charkh abr-e-siyah bana
nazar aain mujh ko jo wusaten teri afw-e-banda-nawaz mein
ye nahin ki hum mein nahin hain wo ye nahin ki ain hami hain wo
magar ek haqiqat-e-manawi hai nihan libas-e-majaz mein
na ana ghalat tha na haq-e-ghalat magar itni si ghalati hui
ye jo raaz tha use chahiye tha chhupana parda-e-raaz mein
jise pi ke pir bane jawan jise pi ke chikh uthe jawan
ye wo mai hai saqi-e-mai-kashan teri chashm-e-baada-nawaz mein

jabin-e-shauq ko kuchh aur bhi izn-e-saadat de

jabin-e-shauq ko kuchh aur bhi izn-e-saadat de
ki zauq-e-zindagi mahdud sang-e-astan tak hai
nawed-e-rustagari par abas dil-shad hota hai
abhi sad dam ai bulbul-e-qafas se aashiyan tak hai
ye ehsas-e-talluq mujh ko mitne bhi nahin deta
ki teri dastan ka rabt meri dastan tak hai
tarana chhed wo mutrib ki ruh-e-ishq chaunk utthe
kharosh-e-nala-e-gham kya jo soz-e-jism-o-jaan tak hai
sarapa aarzu ban kar kamal-e-muddaa ho ja
wo nang-e-ishq hai jo aarzu aah-o-fughan tak hai
zamana chahiye takmil-e-zauq-e-lazzat-e-gham ko
abhi duniya-e-dil mahdud zikr-e-in-o-an tak hai
bayaban-e-mohabbat ki nawazish puchhna kya hai
ummid-o-bim ki haalat faqat sud-o-ziyan tak hai
kahan se laegi duniya hamari himmaten 'asi'
mohabbat mein qadam apna faqat kaun-o-makan tak hai

apni hasti se tha KHud main bad-guman kal raat ko

apni hasti se tha khud main bad-guman kal raat ko
kuchh na tha andesha-e-sud-o-ziyan kal raat ko
chandni barsat sehn-e-gulistan dilkash hawa
thin hujum-e-gham mein ye ranginiyan kal raat ko
wusat-e-takhil ke halqe mein tha arsh-e-barin
dekhti thin chashm-e-dil kaun-o-makan kal raat ko
mil rahe the dast-e-ulfat se mujhe jam-e-sharab
mehrban tha wo but-e-na-mehraban kal raat ko
wo mohabbat ki nigahen wo mohabbat ke kalam
han do-baala thi ada-e-dil-satan kal raat ko
har nazar paigham har andaz mein raqsan ummid
aur hi tha us ka tarz-e-imtihan kal raat ko
iffat-e-ulfat se thi aaina-e-dil ki jila
warna tha jazbaat ka dariya rawan kal raat ko
zauq se wo sun rahe the dastan-e-gham meri
ho raha tha inqilab-e-asman kal raat ko
dil ki ek aawaz thi is bazm mein tafsir-e-gham
ho chuke the wo bhi majbur-e-fughan kal raat ko
tafarqe be-aitmadi dushmani makr-o-fareb
thi teri tabir ai hindostan kal raat ko
so chuke the chand hi ghanton mein arbab-e-nashat
subh tak tha sath wo aaram-e-jaan kal raat ko
rang-e-sahba chashm-e-nargis mein tha 'asi' waqt-e-subh
jagne se ho rahi thin khun-fishan kal raat ko

jabin-e-shauq ko kuchh aur bhi izn-e-saadat de

jabin-e-shauq ko kuchh aur bhi izn-e-saadat de
ki zauq-e-zindagi mahdud sang-e-astan tak hai
nawed-e-rustagari par abas dil-shad hota hai
abhi sad dam ai bulbul-e-qafas se aashiyan tak hai
ye ehsas-e-talluq mujh ko mitne bhi nahin deta
ki teri dastan ka rabt meri dastan tak hai
tarana chhed wo mutrib ki ruh-e-ishq chaunk utthe
kharosh-e-nala-e-gham kya jo soz-e-jism-o-jaan tak hai
sarapa aarzu ban kar kamal-e-muddaa ho ja
wo nang-e-ishq hai jo aarzu aah-o-fughan tak hai
zamana chahiye takmil-e-zauq-e-lazzat-e-gham ko
abhi duniya-e-dil mahdud zikr-e-in-o-an tak hai
bayaban-e-mohabbat ki nawazish puchhna kya hai
ummid-o-bim ki haalat faqat sud-o-ziyan tak hai
kahan se laegi duniya hamari himmaten 'asi'
mohabbat mein qadam apna faqat kaun-o-makan tak hai