apni nakaam tamannaon ka matam na karo

apni nakaam tamannaon ka matam na karo
tham gaya daur-e-mai-e-nab to kuchh gham na karo
aur bhi kitne tariqe hain bayan-e-gham ke
muskuraati hui aankhon ko to pur-nam na karo
han ye shamshir-e-hawadis ho to kuchh baat bhi hai
gardanen tauq-e-ghulami ke liye kham na karo
tum to ho rind tumhein mahfil-e-jam se kya kaam
bazm-e-jam ho gai barham to koi gham na karo
baada-e-kohna dhale saghar-e-nau mein 'fitrat'
zauq-e-fariyaad ko aazurda-e-matam na karo

ghunche ka jawab ho gaya hai

ghunche ka jawab ho gaya hai
dil khil ke gulab ho gaya hai
pa kar tab-o-tab soz-e-gham se
aansu dur-e-nab ho gaya hai
kya fikr-e-bahaar o mahfil-e-yar
ab khatm wo bab ho gaya hai
ummid-e-sukun ka zikr-e-rana
sab khwab-o-sarab ho gaya hai
marna bhi nahin hai apne bas mein
jina bhi azab ho gaya hai