naqsh-e-dil hai sitam judai ka

naqsh-e-dil hai sitam judai ka
shauq phir kis ko aashnai ka
chakhte hain ab maza judai ka
ye natija hai aashnai ka
un ke dil ki kudurat aur badhi
zikr kijiye agar safai ka
dekh to sang-e-astan pe tere
hai nishan kis ki jabha-sai ka
tere dar ka gada jo hai ai dost
aish karta hai baadshai ka
dukhtar-e-raz ne kar diya baatil
mujh ko dawa tha parsai ka
karte hain ahl-e-asman charcha
mere nalon ki na-rasai ka
kat dalo agar zaban pe mere
harf aaya ho aashnai ka
kar ke sadqe na chhod den 'nassakh'
dil ko dhadka hai kyun rihai ka

piri mein shauq hausla-farsa nahin raha

piri mein shauq hausla-farsa nahin raha
wo dil nahin raha wo zamana nahin raha
kya zikr-e-mehr us ki nazar mein hai dil wo khwar
shayan-e-jaur-o-zulm dil-ara nahin raha
jhagda mita diya but-e-kafir ne din ka
ab kuchh khilaf-e-momin-o-tarsa nahin raha
ushshaq-o-bul-hawas mein nahin karte wo tamiz
wan imtiyaz-e-nek-o-bad asla nahin raha
kyun bahr-e-sair aane lage gul-rukhan-e-dahr
piri mein dil saza-e-tamasha nahin raha
kah do ki qabr-e-nash bhi ki us ki paemal
nam-o-nishan-e-ashiq-e-ruswa nahin raha
ab tak yahan hai ijz o niyaz o wafa ki dhum
wan lutf o iltifat o madara nahin raha
kashti baghair dasht-nawardi ho kis tarah
ashkon se bahr ho gaya sahra nahin raha
masti mein raat wo na khule mujh se ham-nashin
kuchh e'tibar-e-nashsha-e-sahba nahin raha
kyun jaen phir ke kabe se 'nassakh' dair ko
wo sar nahin raha wo sauda nahin raha