aagahi mein ek KHala maujud hai

aagahi mein ek khala maujud hai
is ka matlab hai khuda maujud hai
hai yaqinan kuchh magar wazeh nahin
aap ki aankhon mein kya maujud hai
bankpan mein aur koi shai nahin
sadgi ki intiha maujud hai
hai mukammal baadshahi ki dalil
ghar mein gar ek boriya maujud hai
shauqiya koi nahin hota ghalat
is mein kuchh teri raza maujud hai
is liye tanha hun main garm-e-safar
qafile mein rahnuma maujud hai
har mohabbat ki bina hai chashni
har lagan mein muddaa maujud hai
har jagah har shahr har iqlim mein
dhum hai us ki jo na-maujud hai
jis se chhupna chahta hun main 'adam'
wo sitamgar ja-ba-ja maujud hai

aaj phir ruh mein ek barq si lahraati hai

aaj phir ruh mein ek barq si lahraati hai
dil ki gahrai se rone ki sada aati hai
yun chatakti hain kharabaat mein jaise kaliyan
tishnagi saghar-e-labrez se takraati hai
shola-e-gham ki lapak aur mera nazuk sa mizaj
mujh ko fitrat ke rawayye pe hansi aati hai
maut ek amr-e-musallam hai to phir ai saqi
ruh kyun zist ke aalam se ghabraati hai
so bhi ja ai dil-e-majruh bahut raat gai
ab to rah rah ke sitaron ko bhi nind aati hai
aur to dil ko nahin hai koi taklif 'adam'
han zara nabz kisi waqt thahar jati hai

aankhon se teri zulf ka saya nahin jata

aankhon se teri zulf ka saya nahin jata
aaram jo dekha hai bhulaya nahin jata
allah-re nadan jawani ki umangen!
jaise koi bazar sajaya nahin jata
aankhon se pilate raho saghar mein na dalo
ab hum se koi jam uthaya nahin jata
bole koi hans kar to chhidak dete hain jaan bhi
lekin koi ruthe to manaya nahin jata
jis tar ko chheden wahi fariyaad-ba-lab hai
ab hum se 'adam' saz bajaya nahin jata