nam-o-nang

bartari apni kya jatata hai
ye kamai to tu bhi khata hai
itna kahna dalil hai goya
aur tu bhi asil hai goya
do sharifon ki sun ke ye takrar
main khada rah gaya sar-e-bazar
aur hairat mein aisa gharq hua
kal-adam ek ek farq hua
nazish-o-asl-o-rang ke afsun
ghairat-e-nam-o-nang ke afsun
main yahan bhi sabhi qarinon mein
ek si dhadkanen hain sinon mein
kasb-e-majbur par bhi ye ehsas
izzat-e-nafs aur waza ka pas
aisa baatil tilism-e-rang hua
munhadim qasr-e-nam-o-nang hua
is tarah mit gain meri aqdar
qahqaha ban gae dar-o-diwar
khandani shanakhten mat puchh
izzaten aur sharafaten mat puchho

duniya kaise mujhko bhae

tan sukh ka ek sagar chahe
jis mein khub nahae
man ki hai ye chanchal aasha
jo chahe so pae
duniya chain nagar ban jae
tan bechain hai
man be-qabu
kaun unhen samjhae
das ghulam ki aasha kaisi
janam janam mar jae
man ki baat mein kah nahin sakta
man-marzi se rah nahin sakta
kuchh nahin mere bas mein
bas ghul gai jiwan ras mein
duniya
kaise mujh ko bhae

choT

ek roe chalae tadpe kalpe aur kalpae
ek ek se kahe ram-kahani
dil ka dard batae
man ki chot dikha bechaara saudai kahlae
ek jhallae taish mein aae
biphre aur bal khae
aansu pi pi kar rah jae
jaan pe dukh sah jae
tere sath ladai thane lekin munh ki khae
ek chhup chhup kar nir bahae
man ko ye samjhae
chup chup jaan pe sah ja pagle
ishwar ka annyae
apni aan bachae lekin wo papi ban jae
main teri karni par raazi
munh se na nikle hae
mere man ka ghaw phir bhi gahra hota jae
jag ki aankhen band kiye hai ye kaya ki ot
meri duni ho gai chot

bahaar

patti patti jhum rahi thi
mast hawa thi
mahak raha tha phulon ki khushbu se sara bagh
bagh-bahaar ko dekh ke bhaunra
mast hua lalchaya
us par kar de jaan nichhawar
us ke man mein aaya
shauq se be-khud ho kar wo ek phul ki jaanib lapka
itne mein mali ne badh kar tod liya wo phul
ji bhanwre ka tut gaya
aur ho gai khatm bahaar

choT

ek roe chalae tadpe kalpe aur kalpae
ek ek se kahe ram-kahani
dil ka dard batae
man ki chot dikha bechaara saudai kahlae
ek jhallae taish mein aae
biphre aur bal khae
aansu pi pi kar rah jae
jaan pe dukh sah jae
tere sath ladai thane lekin munh ki khae
ek chhup chhup kar nir bahae
man ko ye samjhae
chup chup jaan pe sah ja pagle
ishwar ka annyae
apni aan bachae lekin wo papi ban jae
main teri karni par raazi
munh se na nikle hae
mere man ka ghaw phir bhi gahra hota jae
jag ki aankhen band kiye hai ye kaya ki ot
meri duni ho gai chot