ham-nafaso ujaD gain mehr-o-wafa ki bastiyan

ham-nafaso ujad gain mehr-o-wafa ki bastiyan
puchh rahe hain ahl-e-mehr-o-wafa ko kya hua
ishq hai be-guzar kyun husn hai be-niyaz kyun
meri wafa kahan gai un ki jafa ko kya hua
ye to baja ki ab wo kaif jam-e-sharab mein nahin
saqi-e-mai ke ghamza-e-hosh-ruba ko kya hua
ab nahin jannat masham-e-kucha-e-yar ki shamim
nikhat-e-zulf kya hui baad-e-saba ko kya hua
tham gaya daura-e-hayat ruk gai nabz-e-kaenat
ishq-o-junun ki garmi-e-hamhama-za ko kya hua
dasht-e-junun mein ho gai manzil-e-yar be-suragh
qafila kis taraf gaya bang-e-dara ko kya hua
nala-e-shab hai na-rasa aah-e-sahar hai be-asar
mera khuda kahan gaya mere khuda ko kya hua

charagh-e-zindagi hoga farozan hum nahin honge

charagh-e-zindagi hoga farozan hum nahin honge
chaman mein aaegi fasl-e-bahaaran hum nahin honge
jawano ab tumhaare hath mein taqdir-e-alam hai
tumhin hoge farogh-e-bazm-e-imkan hum nahin honge
jiyenge jo wo dekhenge bahaaren zulf-e-jaanan ki
sanware jaenge gesu-e-dauran hum nahin honge
hamare dubne ke baad ubhrenge nae tare
jabin-e-dahr par chhatkegi afshan hum nahin honge
na tha apni hi qismat mein tulu-e-mehr ka jalwa
sahar ho jaegi sham-e-ghariban hum nahin honge
agar mazi munawwar tha kabhi to hum na the hazir
jo mustaqbil kabhi hoga darakhshan hum nahin honge
hamare daur mein dalin khirad ne uljhanen lakhon
junun ki mushkilen jab hongi aasan hum nahin honge
kahin hum ko dikha do ek kiran hi timtimati si
ki jis din jagmagaega shabistan hum nahin honge
hamare baad hi khun-e-shahidan rang laega
yahi surkhi banegi zeb-e-unwan hum nahin honge

gham ke hathon mere dil par jo saman guzra hai

gham ke hathon mere dil par jo saman guzra hai
hadisa aisa zamane mein kahan guzra hai
zindagi ka hai khulasa wahi ek lamha-e-shauq
jo teri yaad mein ai jaan-e-jahan guzra hai
haal-e-dil gham se ye hai jaise kisi sahra mein
abhi ek qafila-e-nauha-garan guzra hai
bazm-e-doshin ko karo yaad ki is ka har rind
raunaq-e-bar-gah-e-pir-e-mughan guzra hai
pa-ba-gul jo the wo aazurda nazar aate hain
shayad is rah se wo sarw-e-rawan guzra hai
nigrani-e-dil-o-dida hui hai dushwar
koi jab se meri jaanib nigaran guzra hai
haal-e-dil sun ke wo aazurda hain shayad un ko
is hikayat pe shikayat ka guman guzra hai
wo gul-afshani-e-guftar ka paikar 'salik'
aaj kuche se tere ashk-fishan guzra hai