zalzale saKHt aate rahe raat-bhar

zalzale sakht aate rahe raat-bhar
ghar ko dhate giraate rahe raat-bhar
aap han aate jate rahe raat-bhar
waza-dari nibhate rahe raat-bhar
sara din naqsh un ka banate rahe
ban gaya to mitate rahe raat-bhar
koi bhi hum ko hatim nahin kah saka
garche moti lutate rahe raat-bhar
din mein sarmaya-kari jo ki dard ki
hum khasare chukate rahe raat-bhar
subh-dam ju-e-khun kaise wo ban gae
hum jo aansu bahate rahe raat-bhar
dekhiye sadgi aap ki dastan
aap hi ko sunate rahe raat-bhar
teri yaadon ka sawan barasta raha
gulistan hum khilate rahe raat-bhar
qamat-e-yar par aarzu ki qaba
dil ke hathon sajate rahe raat-bhar
lamha lamha mite hum koi gham nahin
aap ko to banate rahe raat-bhar
hum bisat-e-tamanna bichhate rahe
aate aate wo aate rahe raat-bhar
teri yaadon ke lamhe bhi bedard the
tujh ko mujh se churaate rahe raat-bhar
aasman par sitare larazte rahe
ashk 'tarzi' bahate rahe raat-bhar

subh safar aur sham safar

subh safar aur sham safar
hasti ka anjam safar
unche nam se kya hota hai
karna hai be-nam safar
suniye khizan se kya kahti hai
gul gulshan gulfam safar
chand-sitare aur hawa
kis ko hai aaram safar
bachiye bachiye us se bachiye
kar de jo badnam safar
gahe kaam bigade bhi hai
gahe aawe kaam safar
khil nahin pae aur murjhae
hae re be-hangam safar
kaisa sauda sar mein samaya
sal-o-mah-o-ayyam safar
shikwa hai be-baal-o-pari ka
dekhiye zer-e-dam safar
tum bhi raho tayyar hi 'tarzi'
'ghaalib' aur 'khayyam' safar

pursish hai chashm-e-ashk-e-fasha par na aae harf

pursish hai chashm-e-ashk-e-fasha par na aae harf
duben bhi hum to sail-e-rawan par na aae harf
donon hi apni apni jagah la-jawab hain
apne yaqin pe un ke guman par na aae harf
ai rashk itna wahm-o-guman bhi baja nahin
ehsas-e-qurbat-e-rag-e-jaan par na aae harf
dil na-murad shoala-e-ariz se jal gaya
darte the hum ki soz-e-nihan par na aae harf
hushiyar bazm-e-ghair mein nam un ka aa na jae
ai naghma-sanj josh-e-bayan par na aae harf
tir-e-nigah dil mein taraazu hua to ho
ab tere abruon ki kaman par na aae harf
hum un ke ru-ba-ru rahe is maslahat se chup
mahfil mein apne ijz-e-bayan par na aae harf
ud jae tegh se to rahe sarfaraaz sar
kat jae baat par to zaban par na aae harf
is kashmakash mein teri gali se pare rahe
aae kahan pe harf kahan par na aae harf
'tarzi' tawaf-e-khana-e-khali se khush nahin
bas jao tum to dil ke makan par na aae harf

pa ke tufan ka ishaara dariya

pa ke tufan ka ishaara dariya
tod deta hai kinara dariya
kaise dubegi bhanwar mein kashti
kaise dega na sahaara dariya
sail-e-himmat hain hamare bazu
dub jaega tumhaara dariya
band afkar ne bandhe lekin
chadh ke utra na hamara dariya
ahl-e-himmat ne duboya sab ko
na-khudaon se na haara dariya
ai asir-e-gham sahil idhar aa
beach dhaare se pukara dariya
himmat-e-tark-e-wafa dub gai
kis ne aankhon mein utara dariya
mauj ne puchh liya kal 'tarzi'
kashti pyari hai ki pyara dariya