mathe ka jhumar

By

shahnai bajata hua ek nanha sa machchhar
pahuncha kisi maidan mein nale se nikal kar
maidan mein kuchh der bhatakta raha machchhar
kuchh kaam nahin tha to matakta raha machchhar
mausuf ne ek bail ko baitha hua paya
tab dil mein sawari ka zara shauq samaya
aaram se wo baith gaya sing ke upar
phir apne khayalat mein gum ho gaya machchhar
do ghante guzar jaane pe mausuf ne socha
is bail ko be-jurm-o-khata main ne dabocha
ye bail pichak jaega socha nahin main ne
ab kuchla gaya pisa gaya mere badan se
ye dabta raha surma bana tuti qayamat
lekin koi shikwa na kiya wah sharafat

ghar ki jhalak

By

jhalak to dekho hamare ghar ki yahan hain nani yahan hain tai
hamare man bap aur chacha hain yahan hain bahnen yahan hain bhai
hamara ghar hai hasin gulshan khushi ki kaliyan khili hui hain
wafa ki khushbu basi hui hai hui na hogi yahan ladai
hamare abbu ki dekho azmat har ek kurta hai in ki izzat
nazar mein in ki hain sab barabar inhin se milti hai rahnumai
kama rahe hain halal rozi bana diya hai hamein namazi
inhin se ghar mein hai khair-o-barkat kisi ki karte nahin burai
hamari ammi hain nek sirat hamein mili hai inhin se rahat
sada kitchen mein hai kaam un ka paka rahi hain chikan fry
labon pe un ke sada tabassum zaban un ki hai khub shirin
nahin hai kaamon se un ko fursat kabhi safai kabhi silai
hamein hai un se dili mohabbat unhin ke qadmon tale hai jannat
badi mohabbat se parwarish ki hai un ki fitrat mein parsai
ajib shai hain chacha hamare nahin kisi ki samajh mein aae
liye hain pyale mein murgh chhole usi mein dali hai ras-malai
jo mud ho to sunaen nama thumak thumak kar bajaen tabla
gae wo ek roz chhat ke upar wahan chacha ne patang udai
madad wo ammi ki kar rahe hain tawe pe chamcha chala rahe hain
sawere uth kar chacha hamare gali ki karte hain khud safai
wo sair karne gae hain bahar pahan ke banyan aur langoti
badi si pagdi hai sar ke upar latak rahi hai gale se tie
badi hain sab se hamari nani sunati hain wo hamein kahani
zaban pe zikr-e-khuda hai jari thikana un ka hai chaarpai
dakarti hain hamari tai hamesha piti hain wo dawai
bada sa takiya hai sar ke niche badan ke upar hai ek razai
badi bahan ka hai nam raziya wo nowelon ki bahut hai rasiya
kashidakari mein hai mahaarat maze se khati hai wo mithai
bahan surayya ne laya gudda bahan ruqayya ne lai gudiya
saheliyon ko bula ke shadi khushi se dalan mein rachai
hamara anwar hai das baras ka musawwiri se use hai raghbat
bana ke taswir jab dikhai to bhai bahnon se dad pai
hai sab se chhota miyan munawwar magar hai talim se mohabbat
dawat le kar wo likh raha tha gira di kapdon pe raushnai
zara sa apna bhi haal kah dun main ek collage mein padh raha hun
kitab se meri dosti hai kabhi na chhodunga main padhai

bachpan ka wo zamana

By

aata hai yaad mujh ko bachpan ka wo zamana
rahta tha sath mere khushiyon ka jab khazana
har roz ghar mein milte umda laziz khane
be-mehnat-o-mashaqqat hasil tha aab-o-dana
bachchon ke sath rahna khushiyon ke git gana
dil mein na thi kudurat tha sab se dostana
mehndi ke patte lana aur pis kar lagana
phir surkh hath apne har ek ko dikhana
aawaz dugdugi ki jun hi sunai deti
us ki taraf lapakna bachchon ka walihana
har sal pyare abbu late the ek bakra
chaara use khilana maidan mein ghumana
wo dur ja chuka hai aata nahin palat kar
bachpan ka wo zamana lagta hai ek fasana
dadi ko main ne ek din ye mashwara diya tha
chehre ki jhurriyon ko aasan hai mitana
chehre pe aap ke hain jo be-shumar shiknen
aaya meri samajh mein un se najat pana
kapde ki sari shiknen mitti hain istiri se
aasan sa amal hai ye istiri chalana
ek garm istiri ko chehre pe aap pheren
umda hai mera nuskha hai shart aazmana
ek roz walida se ja kar kaha kitchen mein
ab chhodiyega ammi ye rotiyan pakana
ek ped rotiyon ka dalan mein lagaen
us ped ko kahenge roti ka karkhana
shakhon se taza taza phir rotiyan milengi
todenge rotiyan hum khaenge ghar mein khana
kaisi ajib baaten aati thin mere lab par
aaj un ko kah raha hun baaten hain ahmaqana
wo pyari pyari baaten ab yaad aa rahi hain
bachpan ka wo zamana kya khwab tha suhana