guman toD chuka main magar nahin koi hai

guman tod chuka main magar nahin koi hai
sara-e-fikr mein baitha hua kahin koi hai
mere khayal ko deta hai nau-ba-nau chehre
hai aas pas koi lams-e-marmarin koi hai
mera yaqin ki duniya mein hun akela main
sada-e-dil mujhe kahti hai gham-nashin koi hai
teri tabahi mein shamil nahin hai ghair koi
use talash to kar mar-e-astin koi hai
nigah se nahin jata koi khayal-numa
hawas-o-hosh-o-khirad ke bahut qarin koi hai
mera tumhaara talluq bigad ke ban gaya hai
mere tumhaare khayalat ka amin koi hai
wara-e-zehn-o-zaman kis ne kaenat buni
tu kaise kahta hai koi nahin nahin koi hai

dil unki mohabbat ka jo diwana lage hai

dil un ki mohabbat ka jo diwana lage hai
ye aisi haqiqat hai jo afsana lage hai
aalam na koi puchhe meri wahshat-e-dil ka
ghar apne agar jaun to virana lage hai
badhte nahin kyun mere qadam aage ki jaanib
nazdik hi shayad dar-e-jaanana lage hai
waise to kisi ne mujhe aisa nahin jaana
diwana kaha tum ne to diwana lage hai
rudad-e-alam un se jo qasid ne bayan ki
farmane lage hans ke ye afsana lage hai
main ne to banai thi faqat aap ki taswir
dil mera magar aaj sanam-khana lage hai
ab apna bhi begana nazar aata hai 'wasfi'
begana to begana hai begana lage hai

fareb-e-zar mohabbat-nagar khula hua hai

fareb-e-zar mohabbat-nagar khula hua hai
tumhaare khwab ka mujh pe asar khula hua hai
main ud raha hun falak ta falak khumar mein yun
ki mujh pe ek jahan-e-digar khula hua hai
ajib sada-dili hai meri tabiat mein
chala safar pe hun rakht-e-safar khula hua hai
main jaanta hun ki kya hai ye aagahi ka azab
jo harf harf meri zat par khula hua hai
kahan khuli hain abhi us ki hairaten mujh par
jo ek jahan wara-e-nazar khula hua hai
ek intizar mein qaem hai is charagh ki lau
ek ehtimam mein kamre ka dar khula hua hai

adab mein muddai-e-fan to be-shumar mile

adab mein muddai-e-fan to be-shumar mile
magar na 'mir' ke 'ghaalib' ke wirsa-dar mile
junun-e-ishq ko daman to tar tar mila
maza to jab hai gareban bhi tar tar mile
bade maze se guzari hai zindagi main ne
khuda ke fazl se haalat sazgar mile
kisi ke dil pe bhala ikhtiyar kya hoga
bahut hai apne hi dil par jo ikhtiyar mile
ye kya sitam hai ki aada to paen hur-o-qusur
jo un ke chahne wale hain un ko dar mile
mere mizaj ko bakhsha hai inkisar agar
ba-qadr-e-zarf tabiat ko inkisar mile
har ek amal pe mukallaf bana ke farmaya
kahin se dekhna daman na dagh-dar mile
mera mazaq hai ikram-e-dostan 'wasfi'
wo dil hi pas nahin jis mein kuchh ghubar mile

gham se ghabra ke kabhi nala-o-fariyaad na kar

gham se ghabra ke kabhi nala-o-fariyaad na kar
izzat-e-nafs kisi haal mein barbaad na kar
dil ye kahta hai ki de int ka patthar se jawab
jo tujhe bhule use tu bhi kabhi yaad na kar
tod de band-e-qafas kuchh bhi agar himmat hai
ek rihai ke liye minnat-e-sayyaad na kar
apne haalat ko behtar jo banana hai tujhe
ahd-e-rafta ko kabhi bhul ke bhi yaad na kar
haal ko dekh samajh waqt ki qimat ai dost
fikr-e-farda mein kabhi waqt ko barbaad na kar
zindagi banti hai kirdar se kirdar bana
mukhtasar zist ke lamhat ko barbaad na kar
kabhi badla hai na badlega mohabbat ka mizaj
ahl-e-dil hai to kisi dil ko bhi nashad na kar
muddai ilm ka hai jehl-e-murakkab la-raib
qaul faisal hai faramosh ye irshad na kar

dil mein liye auham ko is ghar se uTha main

dil mein liye auham ko is ghar se utha main
khali kahan but-khana-e-azar se utha main
yun hai ki zabardasti uthaya gaya mujh ko
aise to nahin ku-e-sitamgar se utha main
ahbab mein dil khol ke ab jashn mana le
le aaj tere sahn-e-muattar se utha main
ek bojh uthae hue aankhon mein kati shab
ek ism ko padhte hue bistar se utha main
tu aalam-e-ruya mein mujhe chhod ke palta
phir chaunk ke khud apne barabar se utha main
thamunga nahin ab ke munajat ka daman
dil tujh se utha aur tere dar se utha main