ai meri aankho ye be-sud justuju kaisi

ai meri aankho ye be-sud justuju kaisi
jo khwab khwab rahin un ki aarzu kaisi
ragon mein khun hai shakhon ki surkh-ru ghunche
khizan mein ab ke bahaaron ki rang-o-bu kaisi
tamam patton ko mausam ne zard zard kiya
ye ek shakh-e-tamanna hai sabz-ru kaisi
karo to yaad milan ke wo awwalin lamhe
ki chhid gai thi nigahon mein guftugu kaisi
ye shahr-e-dil mein bhala aaj kis ki aamad hai
ye mahw-e-raqs hain khushbuen ku-ba-ku kaisi
ufuq ka chehra 'sukhan' is kadar udas hai kyun
shafaq ke rang mein ye surkhi-e-lahu kaisi

hamein nasib koi dida-war nahin hota

hamein nasib koi dida-war nahin hota
jo dastaras mein hamari hunar nahin hota
main rose us se yahin ham-kalam hota hun
darun-e-ruh kisi ka guzar nahin hota
jala diye hain kisi ne purane khat warna
faza mein aisa to raqs-e-sharar nahin hota
mohabbaton ke kai ism main ne padh dale
ajab tilism hai wa is ka dar nahin hota
agar main shab ki siyahi na chir kar niklun
koi ujala mera ham-safar nahin hota
kisi ke naqsh-e-qadam ki thi justuju warna
main is tarah to 'sukhan' dar-ba-dar nahin hota

mahak raha hai tasawwur mein KHwab ki surat

mahak raha hai tasawwur mein khwab ki surat
khila khila sa wo chehra gulab ki surat
sawal us se ajab meri khamushi ne kiya
hansi labon pe thi us ke jawab ki surat
kitab-e-dil ka meri ek bab ho tum bhi
tumhein bhi padhta hun main ek nisab ki surat
pukara jab bhi mujhe tum ne dasht-e-imkan se
koi umid si ubhri sarab ki surat
ye us ke qurb ki padash mein 'sukhan' hum ko
nasib hijr hua hai azab ki surat

mujhe ehsas ye pal pal raha hai

mujhe ehsas ye pal pal raha hai
ki mere sar se suraj dhal raha hai
khusha sathi wo pichhle mausamon ke
ye tanhai ka aalam khal raha hai
bara-e-shab jalao mishal-e-jaan
thaka-manda ye suraj dhal raha hai
safar mein ye guman hai har qadam par
ki mere sath koi chal raha hai
raqam the jis pe lamhe besh-qimat
wo kaghaz aansuon se gal raha hai
tasawwur hai nasha hai dhadkanen hain
'sukhan' sheron mein koi dhal raha hai

sakin hai koi aur watan aur kisi ka

sakin hai koi aur watan aur kisi ka
ye ruh kisi ki hai badan aur kisi ka
surkhi hai kaho ki mere har sarw-o-saman mein
padhta hai qasida ye chaman aur kisi ka
taskin ka bais hai kisi aur ka pahlu
ehsas dilati hai chubhan aur kisi ka
aaina samajhte hain tujhe sab ye alag baat
hai tujh mein magar aaina-pan aur kisi ka
ye pyar ka jazba tere kuchh kaam to aae
mera nahin banta hai to ban aur kisi ka
kahte hain sukhnawar mujhe nisbat se teri sab
rahta hai mere lab pe 'sukhan' aur kisi ka

ye saneha bhi ho gaya hai raste mein

ye saneha bhi ho gaya hai raste mein
jo rahnuma tha wahi kho gaya hai raste mein
kisi bhi aabla-pa ko na mil saki taskin
ajib khar koi bo gaya hai raste mein
itab-e-jaan hui gard-e-safar kisi ke liye
kisi ko abr-e-karam dho gaya hai raste mein
hudi ki lai karo maddham ai qafile walo
thakan se chur koi so gaya hai raste mein
musafiran-e-wafa ki koi khabar na mili
na jaane kaun kidhar ko gaya hai raste mein
rahega sath kahan tak ye dekhna hai mujhe
wo ham-sukhan to mera ho gaya hai raste mein