ashk Dhalte nahin dekhe jate

ashk dhalte nahin dekhe jate
dil pighalte nahin dekhe jate
phul dushman ke hon ya apne hon
phul jalte nahin dekhe jate
titliyan hath bhi lag jaen to
par masalte nahin dekhe jate
jabr ki dhup se tapti sadken
log chalte nahin dekhe jate
khwab-dushman hain zamane wale
khwab palte nahin dekhe jate
dekh sakte hain badalta sab kuchh
dil badalte nahin dekhe jate
karbala mein rukh-e-asghar ki taraf
tir chalte nahin dekhe jate

chamka jo chand raat ka chehra nikhar gaya

chamka jo chand raat ka chehra nikhar gaya
mange ka nur bhi to bada kaam kar gaya
ye bhi bahut hai sainkadon paude hare hue
kya gham jo barishon mein koi phul mar gaya
sahil pe log yunhi khade dekhte rahe
dariya mein hum jo utre to dariya utar gaya
saya bhi aap ka hai faqat raushni ke sath
dhundoge tirgi mein ki saya kidhar gaya
hum jis ke intizar mein jage tamam raat
aaya bhi wo to khwab ki surat guzar gaya
hum ne to gul ki chand ki tare ki baat ki
sab ahl-e-ajnuman ka guman aap par gaya
ghar hi nahin raha hai salamat bataen kya
'jawed' ke baad sail-e-bala kis ke ghar gaya

chandni ka raqs dariya par nahin dekha gaya

chandni ka raqs dariya par nahin dekha gaya
aap yaad aae to ye manzar nahin dekha gaya
aap ke jate hi hum ko lag gai aawargi
aap ke jate hi hum se ghar nahin dekha gaya
apni sari kaj-kulahi dastan ho kar rahi
ishq jab mazhab kiya to sar nahin dekha gaya
phul ko mitti mein milta dekh kar mitti hue
hum se koi phul mitti par nahin dekha gaya
jism ke andar safar mein ruh tak pahunche magar
ruh ke bahar rahe andar nahin dekha gaya
jis gada ne aap ke dar par sada di ek bar
us gada ko phir kisi dar par nahin dekha gaya
aap ko patthar lage 'jawed' ji dekha hai ye
aap ke hathon mein go patthar nahin dekha gaya

chandni raat mein har dard sanwar jata hai

chandni raat mein har dard sanwar jata hai
jaane kya kya sar-e-ehsas bikhar jata hai
dekhte hum bhi hain kuchh khwab magar hae re dil
har nae khwab ki tabir se dar jata hai
maut ka waqt muayyan hai to phir baat hai kya
kaun hai mujh mein jo har sans pe mar jata hai
dil mein gad jati hai jab saat-e-mazi ki salib
waqt ruk jata hai insan guzar jata hai