aao aaj hum donon apna apna ghar chun len
tum nawah-e-dil le lo khitta-e-badan mera

abhi gunah ka mausam hai aa shabab mein aa
nasha utarne se pahle meri sharab mein aa

abhi gunah ka mausam hai aa shabab mein aa
nasha utarne se pahle meri sharab mein aa
dhanak si khwab si khushbu si phir baras mujh par
nai ghazal ki tarah tu meri kitab mein aa
utha na der tak ehsan mausam-e-gul ka
main zindagi hun mujhe ji mere azab mein aa
wo mere lab ke parinde wo tera jhil-badan
bujha na pyas meri tu magar sarab mein aa
tere dariche se hai dur mera darwaza
agar tu dard hai mera to dil ke bab mein aa
main tujh ko jagti aankhon se chhu sakun na kabhi
meri ana ka bharam rakh le mere khwab mein aa

ana rahi na meri mutlaq-ul-inani ki
mere wajud pe ek dil ne hukmarani ki
karam kiya ki bikharne diya na us ne mujhe
mere junun ki hifazat ki mehrbani ki
pahad katna ek mashghala tha bachpan se
kade dinon mein bhi teshe si naujawani ki
badan ki udne ko par taulta parinda sa
kisi kaman si chadhti nadi jawani ki
'kamal' main ne to dar se diye uthae nahin
uthai us ne hi diwar bad-gumani ki

apne hone ka ek ek pal tajraba karte rahe
nok-e-neza par bhi hum raqs-e-ana karte rahe
ek musalsal jang thi khud se ki hum zinda hain aaj
zindagi hum tera haq yun bhi ada karte rahe
hath mein patthar na tha chehre pe wahshat bhi na thi
phir wo kya tha jis pe hum yun qahqaha karte rahe
kuchh na kuchh to pesh-e-manzar mein bhi shayad tha kahin
kuchh pas-e-manzar bhi hum aab-o-hawa karte rahe
be-talab badhta raha har lamha qarz-e-jaan ka bojh
be-sabab hi har nafas khud ko ada karte rahe
dur tak phaila diye kohsar jangal wadiyan
rizq aankhon ko diya har pal naya karte rahe
tum to ai khushbu hawao us se mil kar aa gain
ek hum the zakhm-e-tanhai hara karte rahe
zahr khud bote rahe ujli hawaon mein 'kamal'
chand sanson ko bhi hum be-zaiqa karte rahe

apne wajud se pare ab
koi bhi rasta nahin hai