ba-qadr-e-did na the teri anjuman ke charagh

ba-qadr-e-did na the teri anjuman ke charagh
meri nigah farozan hui hai ban ke charagh
hazar baad-e-hawadis hazar sarsar-e-gham
jala raha hun magar azmat-e-chaman ke charagh
nuqush-e-shahr-e-nigaran ubhaarte hi rahe
mere junun ke ujale teri lagan ke charagh
sawad-e-asr mein farda ki tabnaki hai
bujha diye gae andesha-e-kuhan ke charagh
hujum-e-gham mein hua tha ye kaun naghma-sara
jali hai tirgi-e-sham dard ban ke charagh
na baad-e-dasht-o-bayaban na sham-e-ranj-o-bala
lahu se apne jalate hain ham-watan ke charagh
jilau mein tabish-e-qindil-e-agahi le kar
bujha diye hain mohabbat ne ahrman ke charagh
zamana sham-e-bala se sawal karta hai
kidhar gae wo tere daur-e-pur-fitan ke charagh
sharar-e-nutq hua sarf-e-har-khayal 'uruj'
jale to bujh na sake shokhi-e-sukhan ke charagh

aaj yaadon ne ajab rang bikhere dil mein

aaj yaadon ne ajab rang bikhere dil mein
muskuraate hain sar-e-sham sawere dil mein
ye tabassum ka ujala ye nigahon ki sahar
log yun bhi to chhupate hain andhere dil mein
surat-e-baad-e-saba qafila-e-yaad aaya
zakhm-dar-zakhm khile phul se mere dil mein
yas ki raat kati aas ka suraj chamka
phir bhi chamke na kisi roz sawere dil mein
ek meri wahshat-e-be-nam pe is tarah na soch
kitni baaten hain jo khatki nahin tere dil mein
dhyan ki shama ki lau tez bhi kar dete hain
aksar auqat teri yaad ke phere dil mein
na mili fursat-e-asaish-e-tabir-e-uruj
ek muddat se hain khwabon ke basere dil mein