aag sinon mein jala kar rakhiye

aag sinon mein jala kar rakhiye
khwab aankhon mein basa kar rakhiye
rahaton se lage sadme bhi hain
dil ko mazbut bana kar rakhiye
id ka din hai gale mil lije
ikhtilafat hata kar rakhiye
nafraten dil se nikal jaengi
hath dushman se mila kar rakhiye
tab-e-zanjir nahin hai dil ko
zulf-e-pechan ko saja kar rakhiye
yaad aa jaegi diwane ki
phul jode mein laga kar rakhiye
jaane wala na kabhi aaega
dil mein yaadon ko basa kar rakhiye
ishq ki aag hai munh-zor 'salam'
apne daman ko bacha kar rakhiye

dil ki haalat bayan nahin hoti

dil ki haalat bayan nahin hoti
khamushi jab zaban nahin hoti
harf-e-hasrat hai tum ne kya samjha
zindagi dastan nahin hoti
kya muqabil ho husn-e-jaanan ke
chandni be-karan nahin hoti
tum jo aao to ho jawan mahfil
warna kab kahkashan nahin hoti
husn ki be-rukhi ada thahri
aashiqi bad-guman nahin hoti
be-qarari ki bas dawa tum ho
ye tabibon ke han nahin hoti
jo ye hindostan nahin hota
to ye urdu zaban nahin hoti
kuchh marasim 'salam' rahne de
dushmani jawedan nahin hoti