agar wo be-adab hai be-adab likh

agar wo be-adab hai be-adab likh
kabhi jo likh nahin paya wo ab likh
tamazat hirs ki had se badhi hai
samundar khud hua hai tishna-lab likh
ana meri zaban khulne na degi
mujhe tu jitna chahe be-talab likh
kamina sari duniya tere aage
magar apna bhi to nam-o-nasab likh
meri qindil-e-jaan jalti hai shab bhar
zara apni bhi to rudad-e-shab likh
'tapish' tere liye meri dua hai
jo haq tu jaanta hai sab ka sab likh

garche nezon pe sar hai

garche nezon pe sar hai
maut to waqt par hai
kaun patthar uthae
ye shajar be-samar hai
ghonsla zindagi ka
sans ki shakh par hai
koi dushman nahin hai
mujh ko apna hi dar hai
shak bhi kije to kis par
wo bada mo'tabar hai
zad mein aandhi ke aksar
ek mera hi ghar hai
apni pahchan rakhna
bhid har mod par hai
mere maula 'tapish' ko
ishq-e-khair-ul-bashar hai