aankh thi suji hui aur raat bhar soya na tha

aankh thi suji hui aur raat bhar soya na tha
is tarah wo tut kar shayad kabhi roya na tha
un ke shauq-e-did mein tha is qadar khoya hua
main bhari mahfil mein tha aisa ki main goya na tha
imtihan zauq-e-safar ka tha to suraj sar pe tha
dhup thi diwar thi lekin kahin saya na tha
wo bada tha phir bhi wo is qadar be-faiz tha
us ghanere ped mein jaise koi saya na tha
shahrah par khun mein ek lash thi luthdi hui
aae din ka hadsa tha is liye charcha na tha
har nigah pyasi thi lekin waqt ki tahwil mein
ek sarab-asa zamin thi dur tak dariya na tha

abhi tak hausla Thahra hua hai

abhi tak hausla thahra hua hai
nafas ka silsila thahra hua hai
ragon par aaj bhi hai larza tari
nigah mein hadsa thahra hua hai
faqat qabil ne buniyaad dali
abhi tak silsila thahra hua hai
bas ek tar-e-nafas ka tutna hai
yahi ek hadsa thahra hua hai
nazar ki chuk thi bas ek lamha
sadi ka qafila thahra hua hai
jahan tak panw mere ja sake hain
wahin tak rasta thahra hua hai
wo hum se ruth kar bhi dur kab hain
dilon ka rabta thahra hua hai
wahi qatil wahi munsif bana hai
usi se faisla thahra hua hai

agar wo be-adab hai be-adab likh

agar wo be-adab hai be-adab likh
kabhi jo likh nahin paya wo ab likh
tamazat hirs ki had se badhi hai
samundar khud hua hai tishna-lab likh
ana meri zaban khulne na degi
mujhe tu jitna chahe be-talab likh
kamina sari duniya tere aage
magar apna bhi to nam-o-nasab likh
meri qindil-e-jaan jalti hai shab bhar
zara apni bhi to rudad-e-shab likh
'tapish' tere liye meri dua hai
jo haq tu jaanta hai sab ka sab likh

dekh kar meri ana kis darja hairani mein hai

dekh kar meri ana kis darja hairani mein hai
us ne samjha tha ki sab kuchh bab-e-imkani mein hai
mujh ko gham de de ke khush tha wo magar ye kya hua
waqt ke hathon wahi gham ki farawani mein hai
kis ko kis ko khush rakhe wo kis se jhagda mol le
faisla hai us ke hathon mein to hairani mein hai
har ghadi ab hasraton ki lash deti hai dhuan
ek ajab shamshan mere dil ki virani mein hai
main bhi tanha is taraf hun wo bhi tanha us taraf
main pareshan hun to hun wo bhi pareshani mein hai
barf bhi simab bhi sahil bhi hai girdab bhi
ye tazad-e-khasiyat ek shakl-e-insani mein hai

ek bhi chain ka bistar nahin hone deta

ek bhi chain ka bistar nahin hone deta
mere ghar ko wo mera ghar nahin hone deta
nit-naya ek shagufa wo dikhata hai mujhe
zulm ki had wo muqarrar nahin hone deta
sab ko dikhlata hai wo chhota bana kar mujh ko
mujh ko wo mere barabar nahin hone deta
kaisi sazish hai ye us ki zara main bhi dekhun
kyun mujhe wo sar-e-manzar nahin hone deta
khauf kaisa hai ye shahin ke qabile mein 'tapish'
kyun mamlun mein koi par nahin hone deta