shikast

mere kaleje ki rag rag se huk uthti hai
mujhe meri har shikaston ki dastan na suna
na puchh mujh se meri khamushi ka raaz na puchh
mere dimagh ka har gosha dukh raha hai abhi
faza-e-zulmat-e-mazi mein ai mere hamdam
dhake dhake se meri kaamraniyon ke nishan
udas udas nigahon ki shama se na tatol
har ek ke sina pe bar-e-shikast hai is waqt
tera khulus meri dastan ka unwan hai
mere habib mujhe ab to apni mohlat de
ki apne dard ko dil mein chhupa ke gham-khurda
jahan se dur kahin us taraf nikal jaun
wo dekh waqt ke chehre pe saf likkha hai
ki ye shikast meri aakhiri shikast nahin

raat

fasurda raat sitaron ke qafilon ko liye
khamosh rahon ki khwabida mastiyon ko salam
na jaane kaun si manzil ko hai rawan kab se
tamam dahr pe saya-fagan ye raat jise
kiya hai main ne muqaddar khayal-e-ghamgin ka
ek ek ashk se rah rah ke jis ko dhoya hai
udas udas surile surile naghmon se
ek ek naqsh sanwara hai jis ke chehre ka
kabhi jo lamha tasawwur se chhu gaya koi
gham-e-khayal bana kar samo diya jis mein
jo apne sath sitaron ke qafilon ko liye
na jaane kaun si manzil ko hai rawan kab se
ye aagahi ka koi khwab hi na ho warna
nazar pukar uthegi ki ahl-e-fikr-o-khayal
tamam soch isi raat ka andhera hai

ajnabi

waqt ki jadugari ek sal mein
har gali har mod mere shahr ka
puchhta hai mujh se sahab kaun ho
jis ko apna ghar kaha karta tha main
jis ki virani se dil manus tha
aaj us ki ek ek diwar se
ye sada aati hai sahab kaun ho
kya yahi gosha hai wo jis mein meri
sar-ba-zanu an-ginat raaten katin
jis se apna gham kaha karta tha main
jis mein mere dil ko milta tha sukun
aaj kyun us ki murawwat mar gai
dosto aisa bhi kya is sal mein
is qadar khud ko bhula baithe ho tum
main wahi hun ghaur se dekho zara
main jise tum ne hazaron gham diye
jis ke honton ka tabassum aaj bhi
tum se kahta hai mujhe pahchan lo

wo jo har rah ke har moD par mil jata hai

wo jo har rah ke har mod par mil jata hai
ab ke puchhenge ki us shakhs ka qissa kya hai
main wo patthar hun nahin jis ko mila sang-tarash
main ne har shakl ko apne mein samo rakkha hai
yunhi chup-chap bhala baithe rahoge kab tak
koi darwaza kahin yun bhi khula karta hai
jab bhi girti hai kisi kuche mein koi diwar
mujh ko lagta hai koi shakhs bahut roya hai
panw jalte hain yahan jism bhi jal jaega
tum ne kiya soch ke sahra mein qadam rakha hai
tutte bante hi ye umr guzar jaegi
meri har shakl mein ek naqs ubhar aata hai
hum ne har daur ke sine mein hain ghonpe khanjar
aur har daur ke sine se lahu tapka hai
tum ne puchha hai ki tum kya ho kahan ho kyun ho
ye to batlao ki is soch mein kya rakkha hai
dasht ke pedon se kya puchh rahe ho 'abid'
bhul jao ki tumhein koi sada deta hai

tumne jab ghar mein andheron ko bula rakkha hai

tum ne jab ghar mein andheron ko bula rakkha hai
uth ke so jao ki darwaze pe kya rakkha hai
phir kisi shakhs ke rone ki sada aati hai
phir kisi shakhs ne basti ko jaga rakkha hai
apni khatir bhi koi lafz tarashen yaro
hum ne kis waste yun khud ko bhula rakkha hai
dekhne ko hai badan aur haqiqat ye hai
ek malba hai jo muddat se utha rakkha hai
tu agar tha to bahut dur the hum tujh se ki ab
tu nahin hai to tujhe pas bitha rakkha hai
hum kisi tarah tujhe dhund len mumkin hi nahin
tu ne har rah ko sahra se mila rakkha hai

kya KHabar kab se pyasa tha sahra

kya khabar kab se pyasa tha sahra
sare dariya ko pi gaya sahra
log pagdandiyon mein khoe rahe
mujh ko rasta dikha gaya sahra
dhup ne kya kiya suluk us se
jaise dharti pe bojh tha sahra
badhti aati thi mauj dariya ki
main ne ghar mein bula liya sahra
jaane kis shakhs ka muqaddar hai
dhup mein tapta be-sada sahra
kho ke apna wajud andhere mein
raat kitna udas tha sahra
zehn ko wadiyan uthate phiren
aankh mein aa ke bas gaya sahra
mere qadmon ko chumne ke liye
raste raste se ja mila sahra
main samundar ko ghar mein le aaya
mere dar par pada raha sahra
mera is mein bikharna tha 'abid'
phir mujhe dhundhta phira sahra