aaKHiri bar zamane ko dikhaya gaya hun

aakhiri bar zamane ko dikhaya gaya hun
aisa lagta hai ki main dar pe laya gaya hun
sab mujhe dhundne nikle hain bujha kar aankhen
baat nikli hai ki main khwab mein paya gaya hun
ped bhi zard hue jate hain mujh se mil kar
jaane main kaisi udasi se banaya gaya hun
rah takti hai kisi aur jagah khush-khabari
main magar aur hi raste se bulaya gaya hun
kitni mushkil se mujhe dhup ne sarsabz kiya
kitni aasani se barish mein jalaya gaya hun

aasudgan-e-hijr se milne ki chah mein

aasudgan-e-hijr se milne ki chah mein
koi faqir baitha hai sahra ki rah mein
phir yun hua ki shauq se kholi na main ne aankh
ek khwab aa gaya tha meri khwab-gah mein
is bar kitni der yahan hun khabar nahin
aa to gaya hun phir se teri bargah mein
phir kar-e-zindagi ne mujhe chhodna nahin
kuchh din yahin guzar lun apni panah mein
yaron ne aa ke jaan bachai meri ki main
khud se ulajh pada tha yunhi khwah-makhwah main