bekasi ka haal mayyat se ayan ho jaega

By

bekasi ka haal mayyat se ayan ho jaega
be-zaban hona mera goya zaban ho jaega
shauq se dil ko mita do lekin itna soch lo
is ke har zarre se paida ek jahan ho jaega
dil ke bahlane ko aao aaj nale hi karen
aasman ke zarf ka bhi imtihan ho jaega
waqt khud manus kar deta hai ai taza asir
chand din rah le qafas bhi aashiyan ho jaega
'abr' main kya kah sakunga un se haal-e-dard-e-dil
jo zaban se lafz niklega fughan ho jaega

hairan nahin hain hum ki pareshan nahin hain hum

By

hairan nahin hain hum ki pareshan nahin hain hum
is par bhi shaki-e-gham-e-dauran nahin hain hum
shikwa zaban pe laen wo insan nahin hain hum
tere sitam-ba-khair pareshan nahin hain hum
khak apni khak-e-kucha-e-jaanan mein ja mili
ehsanmand-e-gor-e-ghariban nahin hain hum
aankhon mein ashk dagh jigar mein labon pe aah
sab kuchh hai pas be-sar-o-saman nahin hain hum
gulha-e-ashk-e-khun se hai daman bhara hua
kis ne kaha ki khuld-bad-aman nahin hain hum
hum se gurez hum se ye be-eatinaiyan
ai dost bul-hawas ka to arman nahin hain hum
hasrat jo aa gai wo nikal hi nahin saki
wa ho sake jo 'abr' wo zindan nahin hain hum