aage baDhne wale

aage badhne wale
badan ko kapdon par odhte
aur chhuriyan tez kar ke nikalte hain
bhid ko chir kar rasta banate
nakhunon se noch lete hain
libas aur izzaten-
surkh mirchon se har aankh ko andha kar dete hain
aur badh jate hain
raunat-bhari muskurahat ke sath
chikhte aur chup kara dete hain
sar-e-am raqs karte hain
aur gadiyan takra jati hain
ladke lad padte
mard, patlunen kas lete
aur budhe, tambaku mein
gud ki miqdar badha dete hain
koi mez un ke samne jama nahin rah sakta
aur koi mahfil
un ka dakhila rok nahin sakti
wo thokar se darwaza kholte hain
aur har kursi un ke liye khali ho jati hai
un ke dabdabe se
diwaron ke palastar ukhad jata hai
kaghaz, shor karna bhul jate hain
aur mausam, irada tabdil kar lete hain
aage badhne walon se panah mangte hain
un ke sath
darte hain
zamin par jhuk kar chalne wale
bojhal khamoshi se unhen dekhte
aur guzar jate hain
aage badhne wale nahin jaante
ki aage badha ja hi nahin sakta
phir bhi wo badhte hain
pahunch kar dam lete hain
be-hayai ki shiddat
aankhon mein
motiya utarne ki raftar tez kar deti hai
har tane ki chhaal
badan par an-mit kharashen chhod jati hai
phitkiri aur wezlin se chiknaya hua mas
haddiyon se hamesha juda nahin rah sakta
har badan aur har kursi ki
ek umr hua karti hai
aur phir hum unhen dekh sakte hain
ek din
lipte hue libas mein
khala ko ghurte hue
kisi nim-tarik nasheb mein
par-kate parinde ki tarah
mitti par lotte hue
aage badhne ki paiham koshish mein

aankhen taras gai hain

is ghar mein ya us ghar mein
tu kahin nahin hai
darwaze bajte hain
khali kamre
teri baaton ki mahkar se bhar jate hain
diwaron mein
teri sansen soi hain
main jag raha hun
kanon mein
koi gunj si chakraati phirti hai
bhule-bisre giton ki
chandni raat mein khilte hue
phulon ki damak hai, yahin kahin
tere khwab
meri be-saya zindagi par
baadal ki surat jhuke hue hain
yaad ke dasht mein
aankhen kante chunti hain
mere hath
tere hathon ki thandak mein
dube rahte hain
aakhir teri mitti se mil jaane tak
kitne pal
kitni sadiyan hain
is sarhad se
us sarhad tak
kitni masafat aur padi hai
un raston mein
kitni barishen baras gai hain
aankhen meri
teri raaton ko taras gai hain

aur kya rah gaya hai hone ko

aur kya rah gaya hai hone ko
ek aansu nahin hai rone ko
khwab achchhe rahenge an-dekhe
khak achchhi rahegi sone ko
tu kahin baith aur hukm chala
hum jo hain tera bojh dhone ko
chashm-e-nam chaar ashk aur idhar
dagh ek rah gaya hai dhone ko
baithne ko jagah nahin milti
kya karen odhne-bichhaune ko
ye mah o sal chand baqi hain
aur kuchh bhi nahin hai khone ko
na-rasai ka ranj lae hain
tere dil mein kahin samone ko
aaj ki raat jag lo yaro
waqt phir hashr tak hai sone ko
yaad bhi teri mit gai dil se
aur kya rah gaya hai hone ko

ek faramosh kahani mein raha

ek faramosh kahani mein raha
main jo us aankh ke pani mein raha
rukh se udta hua wo rang-e-bahaar
ek taswir purani mein raha
main ki madum raha surat-e-khwab
phir kisi yaad-dahani mein raha
dhang ke ek thikane ke liye
ghar-ka-ghar naql-e-makani mein raha
main thaharta gaya rafta rafta
aur ye dil apni rawani mein raha
wo mera naqsh-e-kaf-e-pa-e-talab
ahd-e-rafta ki nishani mein raha
main ki hagama-e-yak-khwab liye
koi din aalam-e-fani mein raha