zinda aadmi se kalam

By

kabhi waqt ki sans mein
hont uljha ke dekhe hain tum ne
ki is bad-guman mausamon ke mughanni ki tanen
nihan khana-e-dil mein
gahri khamoshi ki haibat giraati chali ja rahi hain
azal se abad tak bipharte hue
sail-e-be-maigi mein kabhi
dil ukhadte hue shahr girte hue
dekh pae ho tum
kabhi bhige bhige se diwar-o-dar mein
ki bachpan ki galiyon makanon mein
barish ki aawaz se dil dahalte hue
kisi mushtarak khauf ki aahaton se
dhadakte hue baam-o-dar aur zine
musalsal hawa aur barish ki aawaz chalti hui
kabhi munh-andhere ki taqdis mein
dur se aati gadi ki siti ko sunte hue
tum ne socha hai un ke liye
jin ke qadmon mein manzil
musalsal azab aur khwabon se tabir tak dur hai
kabhi sham ki sansanati hawa mein
thithurti khamoshi ki sahmi sada sun ke
darwaza khola hai un ke liye
jin ke hathon ki larzish mein dastak nahin
mujhe puchhna hai
ki khulte hue phul chalti hawa
aur guzre mah-o-sal ki dastakon par
na ho sakne walon pe aansu bahae hain tum ne
ki main
raat ki ek hichki mein thahri hui sans hun
aur tumhaari ghani nind ke bazuon se
phisalta hua lams hun

tum jo aate ho

By

din nikalte hain bikhar jate hain
shahr baste hain ujad jate hain
dastaken aahani darwaze par
sar ko takra ke palat jati hain
gumbad-e-khamushi girta hi nahin
chalti rahti hai hawa
kheton mein dalanon mein
aur apne hi talatum mein utar jati hai
har taraf phul bikhar jate hain
dil ki mitti pe koi rang utarta hi nahin
aankh nazzara-e-mauhum se hatti hi nahin
zehn us hajla-e-tariki-o-tanhai mein
apne kanton pe pada rahta hai
waqt aata hai guzar jata hai
tum jo aate ho to tartib ulat jati hai
dhund jaise kahin chhat jati hai
naram poron se koi haule se
dil ki diwar gira deta hai
ek khidki kahin khul jati hai
aankh ek jalwa-e-sad-rang se bhar jati hai
koi aawaz bulati hai hamein
tum jo aate ho
to is habs dukhan ke ghar se
ranj-e-ainda-o-rafta ki thakawat se
nikal lete hain
tum se milte hain
to duniya se bhi mil lete hain

teri duniya ke naqshe mein

By

teri duniya mein jangal hain
hare baghat hain
aur dur tak phaile bayaban hain
kahin par bastiyan hain
raushni ke mantaqe hain
pahadon par utarte baadalon mein
raqs karta hai samundar chaar-su
isi amboh ka hissa nahin hun main
kahan hun main
main tere lams se ek aag ban kar phailna
taskhir ki surat bipharna chahta tha
aur itra hun
kisi be-mehr sannate ke maidan mein
hazimat ki dahakti ret par
bikhra pada hun sham ki surat
main jina chahta tha teri duniya mein
tere honton pe khilte nam ki surat
kahin dushnam ki surat
kahin aaram ki surat
main aansu tha
tere chehre pe aa kar phul dharta tha
tere dukh par
gira karta tha qadmon mein
ai chashm-e-tar kahan hun main
andhere se bhari aankhon mein
chalti hai hawa har-su
aur udte ja rahe hain raste us mein
zamanon ke kinaron se
abad ke sard khanon tak
hawa chalti hai har-su
aur us ki ham-rahi mein
do-qadam chalta nahin hun main
hujum-e-roz-o-shab mein
kis jagah sahma hua hun main
kahan hun main
teri duniya ke naqshe mein
kahan hun main

qasbaati laDkon ka git

By

hum teri subhon ki os mein bhigi
aankhon ke sath
dinon ki is basti ko dekhte hain
hum tere khush-ilhan parinde
har jaanib teri munderen khojte hain
hum nikle the
tere mathe ke liye bosa dhundne
hum aaenge
bojhal qadmon ke sath
tere tarik hujron mein phirne ke liye
tere sine par
apni uktahaton ke phul bichhane
sar-phiri hawa ke sath
tere khali chaubaron mein phirne ke liye
tere sehnon se uthte dhuen ko
apni aankhon mein bharne
tere ujle bachchon ki maili aastinon se
apne aansu ponchhne
teri kai zada diwaron se
lipat jaane ke liye
hum aaenge
nind aur bachpan ki khushbu mein soi hui
teri raaton ki chhat par
ujli chaarpaiyan bichhane
motiye ke phulon se pare
apni chikhti tanhaiyan uthane
hum lautenge teri jaanib
aur dekhenge teri budhi inton ko
umron ke rat-jagon se dukhti aankhon ke sath
unche niche makanon mein ghire
guzishta ke gadhe mein
ek bar phir girne ke liye
lambi tan kar sone ke liye
hum aaenge tere mazafat mein
mitti hone ke liye

pichhle pahar ki dastak

By

tere shahr ki sard galiyon ki aahat
mere khun mein sarsarai
main chaunka
yahan kaun hai
main pukara magar
dur khali sadak par kahin
raat ke dubte pahar ki khamushi chal padi
rat-jagon ki thakawat mein dubi hui
aankh se khwab nikla koi
ladkhadata hua
raat ke sard aangan mein girta hua
khali shakhon mein atke hue
chand ki aankh se ek aansu gira
aur sine mein gum ho gaya
dhund ki narm poren
masamon mein chalne lagin
do taraf istada darakhton ke niche
bahe aansuon ki mahak mein mujhe
nind aane lagi