tanha udas shab ke siwa koi bhi na tha

By

tanha udas shab ke siwa koi bhi na tha
sannata aaya jhank ke ghar mein chala gaya
be-kaifiyon ki jhil mein be-his se kuchh parind
baithe the thodi der magar is se kya hua
chehron ke maile jismon ke jangal the har jagah
un mein kahin bhi koi magar aadmi na tha
wo ajnabi yahi to wo kahta tha chikh kar
mera adhura khwab kahin mujh se kho gaya
chhan chhan ke aa rahi hai kidhar se ye raushni
meri fasil-e-dard ki rifat ko kya hua

sannaTe ka dard nikhaara karta hun

By

sannate ka dard nikhaara karta hun
khud ko khamoshi se pukara karta hun
tanhai jab aaina dikhlati hai
apni zat ka pahron nazara karta hun
aawazon ka bojh uthae sadiyon se
banjaron ki tarah guzara karta hun
khwabon ke sunsan jaziron mein ja kar
virani se zikr tumhaara karta hun
jab se ninden laut gain taron ki taraf
jagte mein zakhmon ko sanwara karta hun

usne kal bhagte lamhon ko pakaD rakkha tha

By

us ne kal bhagte lamhon ko pakad rakkha tha
baat diwane ki lagti hai sitamgar jaisi
jism tha us ka bas ek jism koi baat na thi
han nigahon mein koi chiz thi tewar jaisi
kya kaha tu mera saya hai yaqin mujh ko nahin
shakl to kuchh nazar aati hai payambar jaisi
main ne kal toda ek aaina to mahsus hua
is mein poshida koi chiz thi jauhar jaisi

kis ka hai jurm kis ki KHata sochna paDa

By

kis ka hai jurm kis ki khata sochna pada
rahte hain kyun wo hum se khafa sochna pada
gul ki hansi mein raqs-e-nujum-o-qamar mein bhi
shamil hai kitni teri ada sochna pada
jab bhi meri wafaon ki baat aa gai kahin
un ko phir ek uzr-e-jafa sochna pada
ghunche udas gul hain fasurda chaman chaman
kis ka karam hai baad-e-saba sochna pada
shayad tumhaari yaad mere pas aa gai
ya hai mere hi dil ki sada sochna pada
jab bhi koi bhatak ke sar-e-rah aa gaya
kitni kathin hai rah-e-wafa sochna pada
zindan ki baat dar ke charche rasan ka zikr
kitni ajab hai tab-e-rasa sochna pada