nazm

By

taht-e-shuur ki
tariki mein
ek pazh-murda
gul-e-lala ke
surkh o siyah
pankhudiyon ke reze
pichhle athaarah barson se
sisak rahe hain

gum-shuda

By

chalo
phir khud ko dhunden
zat ke nazare ki koshish karen
dekho
wo bhura dasht-e-imkan
dur tak phaila hua hai
samne hadd-e-nazar tak
gahri tariki ki nagan raqs-farma hai
bikharti ret par
koi bhi naqsh-e-pa nahin hai

ek waqia

By

khush-bu ka ek jhonka aaya
us ne mud kar dekha
nange bazu ubhra sina
gori sidaul thirakti ranen
mini-skirt, chikhta jism
gol machalti ranen
us ne ghaur se dekha
labon se nikli siskari si
cigarette ek sulgaya
ulti samt ko bhagte kheton
aur khambon ko dekha
sab be kar hai koi bola
chikhen, lazzat, nasha
nafrat, lazzat, nasha
logon ne jab alag kiya to
dekha
garm ran mein khun ke qatre
thar thar kanp rahe the
aur munh mein lage khun ko wo
paiham chat raha tha

ehsas

By

lamhat ka hayula kuchh bhulne laga tha
aawaz ka sarapa kuchh unghne laga tha
sannata pa-shikasta kuchh bolne laga tha
wahshat-zada sa kamra kuchh dhundne laga tha
mera shuur zad mein taht-e-shuur ki tha