bahut tazkira dastanon mein tha

bahut tazkira dastanon mein tha
to kya wo kahin aasmanon mein tha
mujhe dekh kar kal wo hansta raha
to wo bhi mere raaz-danon mein tha
wo har shab chabaata raha azhdahe
suna hai ki wo naujawanon mein tha
ajib chiz hai lams ki tazgi
nasha hi nasha do jahanon mein tha
use zindagi mukhtasar hi mili
magar khanda-e-gul yaganon mein tha
wajud us ka dharti se chimta raha
dhyan us ka unchi udanon mein tha
parinde fazaon mein phir kho gae
dhuan hi dhuan aashiyanon mein tha

dhup chamki raat ki taswir pili ho gai

dhup chamki raat ki taswir pili ho gai
din gaya aur sard tariki nukili ho gai
jaane kis ki justuju mein is qadar ghuma kiye
hum jawan mardon ki har poshak dhili ho gai
mai-kada se ghar ki jaanib khud-ba-khud kyun aa gae
sard kamre ki faza kya phir nashili ho gai
hum sarabon ke safar ke is qadar aadi hue
jal-bhari nadiyon ki lazzat bhi kasili ho gai
khushnuma diwar-o-dar ke khwab hi dekha kiye
jism sahra zehn viran aankh gili ho gai

ehsas

lamhat ka hayula kuchh bhulne laga tha
aawaz ka sarapa kuchh unghne laga tha
sannata pa-shikasta kuchh bolne laga tha
wahshat-zada sa kamra kuchh dhundne laga tha
mera shuur zad mein taht-e-shuur ki tha

ek waqia

khush-bu ka ek jhonka aaya
us ne mud kar dekha
nange bazu ubhra sina
gori sidaul thirakti ranen
mini-skirt, chikhta jism
gol machalti ranen
us ne ghaur se dekha
labon se nikli siskari si
cigarette ek sulgaya
ulti samt ko bhagte kheton
aur khambon ko dekha
sab be kar hai koi bola
chikhen, lazzat, nasha
nafrat, lazzat, nasha
logon ne jab alag kiya to
dekha
garm ran mein khun ke qatre
thar thar kanp rahe the
aur munh mein lage khun ko wo
paiham chat raha tha