ye kahan jaenge

By

moajiza tha ajab
aahani chanchanahat se zanjir khud apne qadmon mein aa kar giri
bhaari-bharkam dahane khule
aur charkh chun ki fariyaad ke sath
patri par dabbe sarakne lage
subh ki dudhiya chhanw mein
aankh malte hue sab ye hairat-zada dekhte the
koi khinchne wala engine na tha
aur tarai utarti gai
un ki raftar badhti gai
khar-o-khas ko kuchalti hui
tez se tez-tar
tez tar tez-tar
ab ye patri jahan un ko le jae
jaenge
ab ye musafir
jo is fazl-e-rabbi pe nazan the
hairan hain
mashkuk nazron se
ek dusre se gurezan se
wahmon ko dil mein chhupae hue
tez raftar badhte chale jaenge
ye kahan jaenge

wusaten

By

baadal ke pardon se
tahdar kuhron mein duba hua
nur lipta hua
subh ki awwalin dudhiya chhanw mein ek jhalak
aasmanon ki wusat ki
rim-jhim tapakti hui
jhil ki pur-sukun sath par tairti
yun laga jaise meri pahunch mein yahin aa gai
sath-e-jaan se uthi ye dua
us hasin lamha-e-sahar-agin main khushiyon se bhar de
mere dil ki gahraiyon ko
to aawaz aai ki daman badha
aur jab dil ko wa kar diya main ne
tab apni kam-maigi pe bahut gham hua

wo baat

By

wo baat gai
ab raat
bhari barsat
barasti jhadi ki tap-tap
rag nahin
jo aur lipat kar sunen
muamme bhed
labon ke phul
machal ke khilen
lahakti aag pe
thandi barf
nashile barf
pahron katen
ab chand ki chham-chham lahar
chamakte shauq
umadte sail ka nasha nahin
ki jis ki khoj mein
sukhi ret pe
milon
raat gae tak chalen
ab khauf
pareshan zulf
dar-o-diwar pe
larzan sae
mein jaise reng raha hai
umr guzar gai jaanan

wijdan

By

ye khel gudiyon ke
ret mahlon ke
ped patthar pe nam likhne ke
tez sabqat ke
pesh-o-pas ke
jo sochiye to hansi bhi aae
madar-e-hasrat bikhar raha hai
badan ka kansa pighal raha hai
ye ruh bebak phir rahi hai
tamam-tar justuju ki dhadkan
tamam-tar aarzu ka indhan
kahin kisi se ulajh rahi hai
tu apni sari tapish mein us ko jala rahi hai
gale kisi ko laga liya
tu supurdagi ke uruj par jhilmila rahi hai
mere pighalte hue badan ko
nai khabar la ke de rahi hai

ulfat

By

tu mere pas rahe main teri ulfat mein fana
jaise angaron pe chhinton se dhuan
bint-e-mahtab ko haale mein liye
to farozan ho magar sari tapish meri ho
phaile aflak mein be-samt safar
sath mein waqt ka rahwar liye
jis taraf mauj-e-tamanna kah de
justuju shauq ka patwar liye
guftugu rabt ke ehsas se dur
khamushi ranj-e-mukafat se dur
chandni ki kabhi sargoshi si
phul ke narm labon ko chume
gard andesha ko shabnam dho de
qahqahe phutin tamul ke baghair
nur uble kabhi fawwaron mein
aur nuqte mein simat aae kabhi
tah-ba-tah khole rida zulmat ki
apni bebak nigahon se munawwar kar de
nuqta-e-wasl ye mitta hua dhabba hi sahi
hosh bahta hai to bah jaane de
to mere pas rahe main teri ulfat mein fana

udasi

By

abhi jang jari hai
jalne lagin bastiyan
uth raha hai dhuan
ek khun-rez dariya darakhton ko sairab karta hai
jangal mai-e-nab se kitna masrur hai
jangal jari kahan hai
wo dekho pahadon ke daron mein bhagdad machi hai
bikharti hui fauj ke surma
pith par zakhm khane ke shaida
unhin ki hai miras sari udasi
jo basti ke kheton mein
gandum ke khoshon mein chhup kar
shikam mein utarti hai
tarik kamron mein munh ko chhupati hai
aawaz de koi aawaz de
aao barfili choti pe dauden
samundar mein ghote lagaen
taaqub karen maut ka
aur aisa bhi ho
zindagi tohfa-e-jang
daudate ghode se
banhon mein le kar nikal jaen sarpat kahin
do-ghadi ke liye
abhi jang jari hai
jangal ko sairab karta hai khun-rez dariya
ki jangal ka qanun bhi to yahi hai