rab bhi taire jaisa hai man

By

shirin nirmal jharne jaisi
thandi taza hawa ke aisi
rim-jhim aur barkha ki tarah tu
suraj aur chanda si sakhi hai
jalti dhup mein baadal hai tu
rab ke pyar ki chhagal hai tu
han man bilkul aisi hai tu
to sita to mariyam hai man
rabiya aur safiya hai
tu hai yashodha tu hai halima
zainab tu hai fatima hai tu
parwati aur dewki hai
aamna aur hawwa hai tu
ye dharti ye duniya tujh se
duniya ki sab raunaq tujh se
tu duniya ki malik hai
ye duniya teri hai man
tu ne hum ko kya kya bakhshe
pair payambar bhai dost
aur phulon si bahna di
har sukh aur har gham ki sathi
bilkul apni hi jaisi
mahbuba bhi tu ne di
tu sach-much dewi hai man
sare rishte nate tujh se
rishton ki janani hai tu
han man bilkul aisi hai tu
tu hai karim aur tu hai halim
khaliq tu hai raaziq hai tu
sattari ghaffari tujh mein
rahmat aur azmat ki murat
rab ke sare gun hain tujh mein
man bilkul tu rab jaisi hai
ya shayad rab tere jaisa
kyun ki man ab rab bhi to
teri tarah majbur bahut hai
apnon ke zakhmon se wo bhi
lagta hai ki chor bahut hai
man bilkul tu rab jaisi hai
ya shayad rab tere jaisa

kai-bhare gumbad ka nauha

By

kash na hota to achchha tha
aisa bhi hota hai jag mein
rab ke ham-sae ki aise
rab ke pujari jaan lete hain
din bada ghamgin sa tha wo
suraj bhi roya tha pahron
sadiyon ki wo raat ajab thi
jaise ruhen chikh rahi hun
subh ki chanchal hawa jo aai
jaane kis ko dhund rahi thi
baulai baulai si
phul parinde sab gum-sum the
pedon ke patte tak sakit
faslon ki baalin bhi chup thin
saryu ki aankhon ke aansu
jaane kyun na thamte the
nari baalak pir faqir
giyani aur updeshak bhi
sab hairan the sahme the sab
dubidha mein tha har koi
kaise kis ko munh dikhlae
mard-e-muqaddas lauh-purush
tir dhanush jab le kar lauta
tut chuka ho khud wo jaise
sharminda afsurda tha
zalim ko paraje karne wala
ismat-e-sita ka rakhwala
apna sab kuchh tyagne wala
raj dharm ka rakshak khud hi
khud apni nagri ke andar
bebas aur ranjida tha
kyun ki khud is ke apnon ne
us ki hi nagri mein aa kar
us ka hi dil tod diya tha
aaj bhi jab wo din aata hai
suraj chanda din aur raat
phul parinde khet ki faslen
baalak giyani pir faqir
sab gum-sum ho jate hain
suraj saryu sita mil kar
pahron nir bahate hain
ki raj-dharm ke rakshak ka dil
phir se toda jata hai

jahan hum log rahte hain

By

abu-bakr abbaad
jahan hum log rahte hain
wahan achchhe-bhale likhe-padhe hi log baste hain
imarat-e-ilm aur daulat ki azmat husn ko do-baala karti hai
tabassum muskurahat hi-hello aur ba-zahir khush-dili ki barish hoti hai
ki jis tezi se yan fashion badalta hai
ghurur-e-husn aur
zehn-o-dil ki sakht bhi tabdil hoti hai
rizalat buzdili aur asbiyat ko yan
umda kapdon achchhe chehron mein chhupate hain
magar jab ganw jate hain
wahan ke kachche ghar kheton mein baghon mein zara aaram karte hain
uchhalte-kudte bachchon ko aazadi se mard-o-zan ko hanste-bolte jab dekh aate hain
ki har gham aur khushi achchhe-bure haalat mein wo sachche dil se sath rahte hain
na apne zahir-o-baatin mein koi bhed rakhte hain
jo nafrat hai to nafrat hai mohabbat dil se karte hain
ki man mein jo bhi hota hai zaban se saf kahte hain
magar phir laut kar jab shahr aate hain
amiron aalimon aur afsaron ke beach rahte hain
to ye mahsus hota hai
ki hum bimar hain lachaar hain tanha aur qallash hain
jahan hum log rahte hain
wahan sare hi aise log baste hain

mujhe sharminda rakhte hain

By

ye har shab soch kar sota hun aane wali subhon mein
gulon se pattiyon se os ki bunden churani hain
shah aakash ki nazren-numa kirnon se pahle jag jaana hai
saba-e-anbarin ke lams ko mahsus karna hai
libas-e-sabz mein malbus alhad pattiyon ki baaten sunni hain
hasin doshiza ki muskan si kaliyon se do ek baat kar lunga
magar kuchh kar nahin pata ki rahat roke rakhti hai
koi afsana padhna ho kisi ki shairi pe baat karni ho
kisi takhliq se pahle khayal-o-fikr ko aazad rakhna ho
kisi sariq kisi shatir kisi kam-fahm se sachchai kahni ho
badi masum shaklon mein chhupe ayyar ko makkar ko shisha dikhana ho
faqih-e-waqt amir-e-shahr ka qazzaq se malun se rishta batana ho
magar ye kar nahin sakta maslahat khamosh rakhti hai
harim-e-mai-kade mein khanqahon math madrason mein
barahman shaikh se pir-e-mughan se saqiyon se aur waiz se
ye aksar sochta hun ja ke kah dun main
riya-o-kibr tahi-ikhlas aur bad-atwari se tere
jahan mein ishq ukhuwwat ilm aur akhlaq marte hain
magar main kah nahin sakta aqidat baz rakhti hai
tassub khud-pasandi bughz se kibr-o-hasad se
bisat-e-zehn-o-dil ko chahta hun pak kar lun
zar-o-imlak ki khwahish se apne aap ko aazad kar lun
ki jab jab sai karta hun hawas inkar karti hai
magar iqan hai mera hamare ahd ke bachche
mere kizb-o-riya ko makr ko aur be-imani ko
nafaq-o-bad-qimashi ko mere zahir ko baatin ko
huwaida kar ke chhodenge alal-ailan kah denge
ki mere bap aise the mere ustaz aise the
so un ki baat se aamal se sharminda hun main bhi
ye kahne se unhen izzat na rokegi
na un ko khauf rokega
unhen kuchh bhi na rokega
chalan badla hua hoga
hamari sari izzat sari zillat dusron ke haq ki pamali
kitab-e-haq ke pannon par bahut wazeh likhi hongi

main na kahta tha tum se

By

main na kahta tha tum se rah mein chhod jaogi
ishq ek riyazat hai kaise thair paogi
aag ka ye dariya hai kyun kar tair paogi
main na kahta tha tum se
ishq ek ibaadat hai payambari amanat hai
kharon se ye pur rasta
kab talak chalogi tum
sath chhod jaogi
main na kahta tha tum se
khauf khata rahta hun
makr se dagha se main
aise dost se bhi jo
kashtiyan dubote hain
beach mein samundar ke
main na kahta tha tum se
pahle soch lo sau bar
baadban ke uthne se
tufan ke beach jaane se
chhod to na jaogi darmiyan samundar ke
aur tum ne har ek bar ye yaqin dilaya tha
sath jine marne ki lakh qasmen khai thin
aur main ki sada dil aa gaya tha baaton mein
aansuon mein aahon mein
jhut ki kathaon mein
jaan kar sabhi kuchh ki
pahle panch kashti mein chhed kar ke baithi ho
par tumhaari surat jo
taebon si lagti thi
de gai fareb aakhir
aur phir jo hona tha ho raha ek din
tum ko chhal hi karna tha
kaise baz rahti tum
sadha wade kar ke bhi
lakh qasmen kha ke bhi
darmiyan samundar ke
mauj mein thapedon ke
chhed kar ke kashti mein
satwen main ja baithi
main na kahta tha tum se
par nahin nahin ab to
ab main tum se kahta hun
ishq ek safina hai
bahr-e-be-karan ho ya
pur-khatar samundar ho
par khud utarna hai
tum karo ab apni fikr
kashtiyan badalne ki
aathwin ya nauwin ki
manjhi dhund lane ki
koi makr karne ki
main ki ek sada-dil
ishq par yaqin awwal ishq par yaqin aakhir