ab tak ilaj-e-ranjish-e-be-ja na kar sake

ab tak ilaj-e-ranjish-e-be-ja na kar sake
ek umr mein bhi husn ko apna na kar sake
thi ek rasm-e-ishq so hum ne bhi ki ada
duniya mein koi kaam anokha na kar sake
kal raat dil ke sath bujhe is tarah charagh
yaadon ke silsile bhi ujala na kar sake
ab is se kya gharaz hai ki anjam kya hua
ye to nahin ki teri tamanna na kar sake
khud ishq hi ko de gae ruswaiyon ke dagh
wo raaz-e-husn hum jinhen ifsha na kar sake
zauq-e-junun ko ras nahin tang bastiyan
sahra na ho to kya koi diwana kar sake
har imtiyaz us ke liye hech hai 'sahar'
jo apni zindagi ko tamasha na kar sake

bastiyan luTti hain KHwabon ke nagar jalte hain

bastiyan lutti hain khwabon ke nagar jalte hain
hum wahan hain ki jahan sham-o-sahar jalte hain
dil ke aiwan mein afsurda charaghon ka dhuan
dur kuchh dur wo yaadon ke khandar jalte hain
phir kisi manzil-e-jaan-soz ki jaanib hain rawan
chob-e-sahra ki tarah ahl-e-safar jalte hain
yun to pur-amn hai ab shahr-e-sitamgar lekin
kuchh makan khud hi sar-e-rahguzar jalte hain
hai ba-zahir koi shoala na chamak aur sharar
hum kisi gham mein ba-andaz-e-digar jalte hain
aatish-e-talkhi-e-haalat mein kya kuchh na jala
ab gila kya hai jo ehsas ke par jalte hain
go ho barfab bhi taskin hai dushwar 'sahar'
apni hi aag mein arbab-e-hunar jalte hain

chand ka raqs sitaron ka fusun mangti hai

chand ka raqs sitaron ka fusun mangti hai
zindagi phir koi andaz-e-junun mangti hai
muddaten guzrin ki yakh-basta hue qalb-o-jigar
ghairat-e-ishq magar soz-e-darun mangti hai
faiz-e-mausam tha parinde hue aazad magar
khu-e-sayyaad wahi said-e-zabun mangti hai
fasl-e-gul ke liye kya jaan pe khele koi
ab to har mauj-e-hawa tohfa-e-khun mangti hai
kuchh to ai yurish-e-alam-o-hawadis dam le
gardish-e-waqt bhi thoda sa sakun mangti hai
khubi-e-fan nahin parwarda-e-awurd 'sahar'
ruh-e-takhliq dam-e-kun-fa-yakun mangti hai