zamir-e-KHak shah-e-do-sara mein raushan hai

zamir-e-khak shah-e-do-sara mein raushan hai
mera khuda mere harf-e-dua mein raushan hai
wo aandhiyan thin ki main kab ka bujh gaya hota
charagh-e-zat bhi hamd-o-sana mein raushan hai
main apni man ke wasile se zinda-tar thahrun
ki wo lahu mere sabr-o-raza mein raushan hai
main badh raha hun udhar ya wo aa raha hai idhar
wahi khushi wahi khushbu hawa mein raushan hai
kahin bhi jaun sitara sa sath rahta hai
wo shab-charagh jo us ki hawa mein raushan hai

zamin ne kar diya is tarah raegan mujhko

zamin ne kar diya is tarah raegan mujh ko
nazar na aaya kabhi dard aur dhuan mujh ko
talash karta hai ek dusra jahan mujh ko
adhura lagta hai ye jaan ka ziyan mujh ko
bichhe hue hain tasalsul se jalte bujhte charagh
hujum-e-lala-o-gul le gaya kahan mujh ko
bhatak rahe hain nazar mein nuqush-e-gard-o-baad
jaga ke chhod gae pa-e-raftagan mujh ko
khud apni lauh-e-tamanna par khil ke dekhunga
kisi ke jabr ne likkha tha raegan mujh ko
ye kis ke izn-o-raza se bahak rahe hain badan
fareb-rang na de paya ye jahan mujh ko
siwa-e-huzn-o-hazimat jagah nahin dil mein
agar wo pher bhi de lashkar-o-nishan mujh ko
kisi ke bas mein nahin hai kushad-e-qalb-o-nigah
mila tha apni hi qismat ka saeban mujh ko
hate ye ghaza-e-shab-rang to use dekhun
pasand hi nahin aaina darmiyan mujh ko
tamam bar-e-alam dafatan gira sar se
ye raste mein mila kaun na-gahan mujh ko

zamin KHatm hui sar par aasman na raha

zamin khatm hui sar par aasman na raha
isi ke sath koi khauf-e-imtihan na raha
hamare ishq ka koi gawah zinda nahin
azab-e-hijr tha ab wo bhi darmiyan na raha
tamam-raat sitare hamin ko dekhte the
tilism-e-zat se nikle to ye jahan na raha
fasil-e-shahr pe shab-zinda-dar rahte the
hujum-e-shahr mein aisa koi jawan na raha
ye zindagi hai to hum zindagi se baz aae
wo jaan kya ki jahan jaan ka ziyan na raha
tamam lafz hain tafhim-e-nau pe aamada
qayamaton se guzarna bhi na-gahan na raha
bas ek saliqa-e-tajsim khwab tha magar ab
siwae sina-e-sad-chaak kuchh nishan na raha
miyan-e-gardish-e-aflak tu bhi khush ho ja
malal hum ko bhi ai sai-e-raegan na raha
kharab-o-khasta-o-asudagan-e-manzil bhi
nawed-e-jashn ki 'haqqi' ka karwan na raha

zabun-o-KHwar hui hai meri jibillat bhi

zabun-o-khwar hui hai meri jibillat bhi
mere nasib-o-wirasat mein se imamat bhi
ajab hiras mein tha mere mausamon se ghanim
ki de raha tha use bhagne ki mohlat bhi
wo jab bhi aaya kam-o-besh mujh pe war gaya
mujhe ye shauq ki lata kabhi zarurat bhi
main apne zahr se waqif hun wo samajhta nahin
hai mere kisa-e-sad-kaam mein sharafat bhi
samajh rahe the main tanha hun be-basirat log
pas-e-ghubar chali aa rahi thi khilqat bhi
agar saliqe se koi giraft mein lae
main odh leta hun aksar rida-e-tohmat bhi
main nind mein tha ki sargoshiyon ke raqs mein tha
udhar thi naqa-e-umr-r-rawan ko ujlat bhi
ai shahsawar mujhe baadshah bana ke to dekh
main kat dalunga sar-rishta-e-baghawat bhi
usi ne rakh diya mujh ko samet kar 'haqqi'
wo jis ke nam se mujh ko mili thi shohrat bhi

wo ab numaish-e-sair-o-safar se bahar hai

wo ab numaish-e-sair-o-safar se bahar hai
ye mere sath magar rahguzar se bahar hai
wahi muqim hai jo apne ghar se bahar hai
ki jitna saya hai sara shajar se bahar hai
mere khuda ye tab-o-tab-e-safha kaisi hai
jo likh raha hun wo kilk-e-hunar se bahar hai
zamir-e-khak ko ab zahar hi likho yani
ilaj us ka kaf-e-chaara-gar se bahar hai
chalo namaz padhen aur qarib le aaen
shajar dua ka hamari sahar se bahar hai
asir hai meri khinchi hui lakiron ka
ye wahm hai ki wo mere asar se bahar hai
ye ijz hai ki qanaat hai kuchh nahin khulta
bahut dinon se wo khair-o-khabar se bahar hai
na jaane kya hai kisi chaak par thaharti nahin
hamari khak gil-e-kuza-gar se bahar hai

tamanna ko gul-o-gulzar karna

tamanna ko gul-o-gulzar karna
mere dasht-e-talab ko par karna
mere malik mujhe aasan kar de
guzar har-samt se ek bar karna
mujhe bhi rafta rafta aa gaya hai
khud apne kaam ko dushwar karna
nahin yaron mein sach sunne ka yara
barahna masti-e-guftar karna
main tanhai mein baitha ro raha hun
bahut achchha laga tha pyar karna