jaane in aankhon ne us dasht mein dekha kya kya

jaane in aankhon ne us dasht mein dekha kya kya
mere sine mein koi shor utha tha kya kya
aaj tak parda-e-tabir se bahar na mila
aur hota hai shab-o-roz tamasha kya kya
shabnam-asar bhala chain se baitha kab hun
khud ko phailata raha aankh mein sahra kya kya
han wahi rang jo tartib na paya mujh mein
apni aankhon mein wo karta raha gahra kya kya
khub hote hi rahe sab khush-o-na-khush mujh mein
mujh se sharminda raha zakhm-o-mudawa kya kya
hath pairon mein kisi shauq ki halchal thi bahut
dekhta hi raha main jaanib-e-sahra kya kya
us ki be-mehri ka shikwa nahin hoga mujh se
main bhi rakhta tha kabhi dil mein irada kya kya
dur rahta hai magar jumbish-e-lab bos-o-kanar
dubta rahta hai dariya mein kinara kya kya

har shaKH pe thi wafa ki qindil

har shakh pe thi wafa ki qindil
ai shahr bata kahan wo ban hai
bajti hui khun ki rawani
khwahish ki giraft mein badan hai
ladte ladte bikhar gae hain
ab jo bhi jahan hai nara-zan hai
har jihat mujhe pukarti hai
har samt wo rang-e-pairahan hai
leta hai wajud garm sansen
ek shola-e-shauq wo badan hai
ye kaun dhanak naha ke nikli
gul-buta chaman chaman hai

ek masarrat mere atraf ko anjaani de

ek masarrat mere atraf ko anjaani de
nutq ko lab se utha aankh ko hairani de
hai tamanna ki chamakte rahen mehwar ke baghair
hawas-e-kham na de ishq tu la-fani de
naqsh to sare mukammal hain ab uljhan ye hai
kis ko aabaad kare aur kise virani de
dekh kar aae hain kuchh log wahan sabz lakir
main use dekh sakun itni giran-jaani de
ye to dekhen ki hai buniyaad mein kya kya mahfuz
ghar banaya hai to ab warta-e-tughyani de
aks-e-rukh kaisa yahan kuchh bhi nahin hai dil mein
hum ko shadab na kar hausla tufani de
samne tere hum is khak se sharminda na hon
maut aasan ho ya rizq mein arzani de
jaane kya kya nazar aata hai tamanna bar-kaf
mere malik mujhe do rose ki sultani de
hausla haar gai tishna-dahani 'haqqi'
ab tu mashkiza utha aur mujhe pani de

dil ko hum dariya kahen manzar-nigari aur kya

dil ko hum dariya kahen manzar-nigari aur kya
pursish-e-ahwal-e-aqa kam-ayari aur kya
apne manzar se alag hota nahin hai koi rang
apni aankhon ke siwa baad-e-bahaari aur kya
hum bhi kuchh kahte pa us ki guftugu ka silsila
khatm hota hi nahin hai hoshiyari aur kya
sab utha kar le gain meri junun-samaniyan
ab sataegi hamein be-akhtyari aur kya
meri wahshat bhi sukun na-ashna meri tarah
mere qadmon se bandhi se zimmedari aur kya
us ziyan-khane mein milti hi nahin dad-e-firaq
zabt ka paigham degi sogwari aur kya
ji mein aa jae to hum bhi muskura kar dekh len
aankh phir pahron na kholen shahryari aur kya
'haqqi' bechaara aakhir thak-thaka kar so gaya
apne zakhmon ki wo karta parda-dari aur kya

buland-o-past ka har-dam KHayal rakhna hai

buland-o-past ka har-dam khayal rakhna hai
hamesha hath mein kar-e-muhaal rakhna hai
wo mujh se talib-e-baiat hua hai aur mujhe
junun ke hath pe dast-e-sawal rakhna hai
koi to aa ke ginega jarahaten dil ki
hara-bhara hamein taq-e-malal rakhna hai
mere charagh ki lau se musabqat kaisi
mujhe usi pe uruj-o-zawal rakhna hai
kahin to khatm hua hoga raat ka afsun
wahin pe uqda-e-subh-e-visal rakhna hai
shikast-e-be-hunari ki sanad nahin milti
giraft mein abhi kilk-e-kamal rakhna hai
wo mehrban nahin hai to phir khafa hoga
koi to rabta us ko bahaal rakhna hai
bajae us ke ki hum be-hison mein gin liye jaen
sukhan ke sath hi husn-e-majal rakhna hai
nazar na aae qalam-rau mein koi harf-e-junun
tamam zer-o-zabar paemal rakhna hai