qafas se chhuTne pe shad the hum ki lazzat-e-zindagi milegi

qafas se chhutne pe shad the hum ki lazzat-e-zindagi milegi
ye kya khabar thi bahaar-e-gulshan lahu mein dubi hui milegi
jin ahl-e-himmat ke raston mein bichhae jate hain aaj kante
unhi ke khun-e-jigar se rangin chaman ki har ek kali milegi
wo din bhi the jab andheri raaton mein bhi qadam rah-e-rast par the
aur aaj jab raushni mili hai to zist bhatki hui milegi
nai sahar ke hasin suraj tujhe gharibon se wasta kya
jahan ujala hai sim-o-zar ka wahin teri raushni milegi
kabhi to nasl-o-watan-parasti ki tirgi ko shikast hogi
kabhi to sham-e-alam mitegi kabhi to subh-e-khushi milegi
wo hum nahin hain ki sirf apne hi ghar mein shamen jala ke baithen
wahan wahan raushni karenge jahan jahan tirgi milegi
talash-e-manzil ka azm-e-mohkam dalil-e-manzil-rasi hai 'zahid'
qadam to apne badhao aage khuli hui rah bhi milegi

gaya to husn na diwar mein na dar mein tha

gaya to husn na diwar mein na dar mein tha
wo ek shakhs jo mehman mere ghar mein tha
najat dhup se milti to kis tarah milti
mera safar to miyan dasht-e-be-shajar mein tha
gham-e-zamana ki nagan ne das liya sab ko
wahi bacha jo teri zulf ke asar mein tha
khuli jo aankh to afsun-e-khwab tut gaya
abhi abhi koi chehra meri nazar mein tha
na aai ghar mein kabhi ek kiran bhi suraj ki
agarche mera makan wadi-e-sahara mein tha
mila na ghar se nikal kar bhi chain ai 'zahid'
khuli faza mein wahi zahr tha jo ghar mein tha

nai subh chahte hain nai sham chahte hain

nai subh chahte hain nai sham chahte hain
jo ye roz o shab badal de wo nizam chahte hain
wahi shah chahte hain jo ghulam chahte hain
koi chahta hi kab hai jo awam chahte hain
isi baat par hain barham ye sitamgaran-e-alam
ki jo chhin gaya hai hum se wo maqam chahte hain
kise harf-e-haq sunaun ki yahan to us ko sunna
na khawas chahte hain na awam chahte hain
ye nahin ki tu ne bheja hi nahin payam koi
magar ek wahi na aaya jo payam chahte hain
teri rah dekhti hain meri tishna-kaam aankhen
tere jalwe mere ghar ke dar-o-baam chahte hain
wo kitab-e-zindagi hi na hui murattab ab tak
ki hum intisab jis ka tere nam chahte hain
na murad hogi puri kabhi un shikariyon ki
mujhe dekhna jo 'zahid' tah-e-dam chahte hain

gila kis se karen aghyar-e-dil-azar kitne hain

gila kis se karen aghyar-e-dil-azar kitne hain
hamein malum hai ahbab bhi gham-khwar kitne hain
sakat baqi nahin hai qum be-iznillah kahne ki
masiha bhi hamare daur ke bimar kitne hain
ye socho kaisi rahon se guzar kar main yahan pahuncha
ye mat dekho mere daman mein uljhe khar kitne hain
jo sote hain nahin kuchh zikr un ka wo to sote hain
magar jo jagte hain un mein bhi bedar kitne hain
bahut hain muddai sach ki taraf-dari ke ai 'zahid'
magar jo jhut se hain bar-sar-e-paikar kitne hain