wo lamha jo mera tha

By

ek din
tum ne mujh se kaha tha
dhup kadi hai
apna saya sath hi rakhna
waqt ke tarkash mein jo tir the khul kar barse hain
zard hawa ke pathrile jhonkon se
jism ka panchhi ghayal hai
dhup ka jangal pyas ka dariya
aise mein aansu ki ek ek bund ko
insan tarse hain
tum ne mujh se kaha tha
samay ki bahti naddi mein
lamhe ki pahchan bhi rakhna
mere dil mein jhank ke dekho
dekho saton rang ka phul khila hai
wo lamha jo mera tha wo mera hai
waqt ke paikan be-shak tan par aan lage
dekho us lamhe se kitna gahra rishta hai

tum jo siyane ho gun wale ho

By

hire moti lal jawahar role bhar bhar thaali
apna kisa apna daman apni jholi khali
apna kasa para para apna gareban chaak
chaak gareban wale logo tum kaise gun wale ho
kanton se talwe zakhmi hain ruh thakan se chur
kuche kuche khushbu bikhri apne ghar se dur
apna aangan suna suna apna dil viran
phulon kaliyon ke rakhwalo tum kaise gun wale ho
tufanon se takkar le li jab thame patwar
pyar ke nate jis kashti ke lakhon khewan-haar
sahil sahil shahr basae sagar sagar dhum
manjhi apni nagri bhole tum kaise gun wale ho
aankhon kirnen mathe suraj aur kutiya andhiyari
kaise likh lut raja ho tum samjhen log bhikari
shisha sachcha ujla jab tak uncha us ka bhaw
apna mol na jaana tum ne kaise gun wale ho
jin kheton ka rang nikhaare jalti tapti dhup
sawan ki phuwaren bhi chahen in kheton ka rup
tum ko kya ghata dil walo
tum jo sachche ho gun wale ho

saz-e-suKHan bahana hai

By

ghubar-e-subh-o-sham mein
tujhe to kya
main apna aks dekh lun main apna ism soch lun
nahin meri majal bhi
ki ladkhada ke rah gaya mera har ek sawal bhi
mera har ek khayal bhi
main bhi be-qarar o khasta-tan
bas ek sharar-e-ishq mera pairahan
mera nasib ek harf-e-arzu
wo ek harf-e-arzu
tamam umr sau tarah likhun
mera wajud ek nigah-e-be-sukun
nigah jis ke panw mein hain bediyan padi hui

main saz DhunDti rahi

By

ehsas-e-awwalin
ek mauhum iztirab sa hai
ek talatum sa pech-o-tab sa hai
umde aate hain khud-ba-khud aansu
dil pe qabu na aankh par qabu
dil mein ek dard mitha mitha sa
rang chehre ka phika phika sa
zulf bikhri hui pareshan-haal
aap hi aap ji hua hai nidhaal
sine mein ek chubhan si hoti hai
aankhon mein kyun jalan si hoti hai
sar mein pinhan tasawwur-e-mauhum
hae ye aarzu-e-na-malum
ek nala sa hai baghair aawaz
ek halchal si hai na soz na saz
kyun ye haalat hai be-qarari ki
sans bhi khul ke aa nahin sakti
ruh mein intishaar sa kya hai
dil ko ye intizar sa kya hai

kyun

By

tum jo qatil na masiha thahre
na ilaj-e-shab-e-hijran na gham-e-chaaragaran
na koi dushna-e-pinhan
na kahin khanjar-e-sam-aluda
na qarib-e-rag-e-jaan
tum to us ahd ke insan ho jise
wadi-e-marg mein jine ka hunar aata tha
muddaton pahle bhi jab rakht-e-safar bandha tha
hath jab dast-e-dua the apne
panw zanjir ke halqon se kate jate the
lafz taqsir the
aawaz pe taziren thin
tum ne masum jasarat ki thi
ek tamanna ki ibaadat ki thi
pa barahna the tumhaare
yahi bosida qaba thi tan par
aur yahi surkh lahu ke dhabbe
jinhen tahrir-e-gul-o-lala kaha tha tum ne
har nazzara pe nazzargi-e-jaan tum ko
har gali kucha-e-mahbub nazar aai thi
raat ko zulf se tabir kiya tha tum ne
tum bhala kyun rasan-o-dar tak aa pahunche ho
tum na mansur na isa thahre

aashob-e-agahi

By

jaise dariya kinare
koi tishna-lab
aaj mere khuda
main ye tere siwa aur kis se kahun
mere khwabon ke khurshid o mahtab sab
mere aankhon mein ab bhi saje rah gae
mere hisse mein kuchh harf aise bhi the
jo faqat lauh-e-jaan par likhe rah gae