har ek daricha kiran kiran hai jahan se guzre jidhar gae hain

By

har ek daricha kiran kiran hai jahan se guzre jidhar gae hain
hum ek diya aarzu ka le kar ba-tarz-e-shams-o-qamar gae hain
jo meri palkon se tham na pae wo shabnamin mehrban ujale
tumhaari aankhon mein aa gae to tamam raste nikhar gae hain
wo dur kab tha harim-e-jaan se ki lafz o mani ke naz uthati
jo harf honton pe aa na pae wo ban ke khushbu bikhar gae hain
jo dard isa-nafas na hota to dil pe kya e'tibar aata
kuchh aur paiman kuchh aur paikan ki zakhm jitne the bhar gae hain
khazine jaan ke lutane wale dilon mein basne ki aas le kar
suna hai kuchh log aise guzre jo ghar se aae na ghar gae hain
jab ek nigah se kharash aai zamane bhar se gila hua hai
jo dil dukha hai to ranj sare na jaane kis kis ke sar gae hain
shikast-e-dil tak na baat pahunchi magar 'ada' kah sako to kahna
ki ab ke sawan dhanak se aanchal ke rang sare utar gae hain

har gam sambhal sambhal rahi thi

By

har gam sambhal sambhal rahi thi
yaadon ke bhanwar mein chal rahi thi
sanche mein khabar ke dhal rahi thi
ek khwab ki lau se jal rahi thi
shabnam si lagi jo dekhne main
patthar ki tarah pighal rahi thi
rudad safar ki puchhte ho
main khwab mein jaise chal rahi thi
kaifiyyat-e-intizar-e-paiham
hai aaj wahi jo kal rahi thi
thi harf-e-dua si yaad us ki
zanjir-e-firaq gal rahi thi
kaliyon ko nishan-e-rah dikha kar
mahki hui raat dhal rahi thi
logon ko pasand laghzish-e-pa
aise mein 'ada' sambhal rahi thi

Dhalke Dhalke aansu Dhalke

By

dhalke dhalke aansu dhalke
chhalke chhalke saghar chhalke
dil ke taqaze un ke ishaare
bojhal bojhal halke halke
dekho dekho daman uljha
thahro thahro saghar chhalke
un ka taghaful un ki tawajjoh
ek dil us par lakh tahlake
un ki tamanna un ki mohabbat
dekho sambhaal ke dekho sambhal ke
gham ne uthae saikdon tufan
dil ne bisara lakh machal ke
pal mein hansao pal mein rulao
pal mein ujale pal mein dhundalke
hum ne samjha tum ne jaana
dil ne machae lakh tahlake
lakh manaya lakh bhulaya
nain katore bhar bhar kar chhalke
kitne uljhe kitne sidhe
raste un ke rang-mahal ke

chaak-e-dil bhi kabhi silte honge

By

chaak-e-dil bhi kabhi silte honge
log bichhde hue milte honge
roz-o-shab ke unhi viranon mein
khwab ke phul to khilte honge
naz-parwar wo tabassum se kahin
silsile dard ke milte honge
hum bhi khushbu hain saba se kahiyo
ham-nafas rose na milte honge
subh zindan mein bhi hoti hogi
phul maqtal mein bhi khilte honge
ajnabi shahr ki galiyon mein 'ada'
dil kahan log hi milte honge

be-gangi-e-tarz-e-sitam bhi bahana-saz

By

be-gangi-e-tarz-e-sitam bhi bahana-saz
be-chaargi-e-karb-o-alam bhi bahana-saz
kuchh but bana liye hain chattanen tarash kar
dil bhi bahana-saz hai gham bhi bahana-saz
uzr-e-wafa ke sath jalate rahe charagh
khulta hai ab ki dida-e-nam bhi bahana-saz
pabandi-e-rusum-o-wafa bhi bahana-khu
tark-e-wafa-o-shewa-e-ram bhi bahana-saz
har lamha-e-hayat ka tanha raha wajud
dildari-e-nigah-e-karam bhi bahana-saz
kuchh dur sath sath the itna to yaad hai
sahra-e-gham mein naqsh-e-qadam bhi bahana-saz
sab se bada fareb hai khud zindagi 'ada'
is hila-ju ke sath hain hum bhi bahana-saz

aaKHiri Tis aazmane ko

By

aakhiri tis aazmane ko
ji to chaha tha muskurane ko
yaad itni bhi sakht-jaan to nahin
ek gharaunda raha hai dhane ko
sang-rezo mein dhal gae aansu
log hanste rahe dikhane ko
zakhm-e-naghma bhi lau to deta hai
ek diya rah gaya jalane ko
jalne wale to jal bujhe aakhir
kaun deta khabar zamane ko
kitne majbur ho gae honge
an-kahi baat munh pe lane ko
khul ke hansna to sab ko aata hai
log tarse hain ek bahane ko
reza reza bikhar gaya insan
dil ki viraniyan jatane ko
hasraton ki panah-gahon mein
kya thikane hain sar chhupane ko
hath kanton se kar liye zakhmi
phul baalon mein ek sajaane ko
aas ki baat ho ki sans 'ada'
ye khilaune the tut jaane ko