dayar-e-jaan pe musallat ajab zamana raha

dayar-e-jaan pe musallat ajab zamana raha
ki dil mein dard labon par rawan tarana raha
kisi pe barq giri shakh-e-jaan sulag utthi
kisi pe sang chale sar mera nishana raha
qadam qadam pe mili garche sarsar-e-khun-rez
hujum-e-gul usi andaz se rawana raha
adu-e-dost kabhi mujh ko mo'atabar na hua
azal se apna ye mear-e-dostana raha
jo qadar-e-fan ka tayyun karo to dhyan rahe
isi sabab se adu mera ek zamana raha
jo baat kahni hui hum ne barmala kah di
'suhail' shikwa kisi se na ghaebana raha

dil unhen roe jo sail-e-tirgi mein gum hue

dil unhen roe jo sail-e-tirgi mein gum hue
ya unhen jo aap apni raushni mein jal-bujhe
husn ho jata hai jis lamhe zarurat ka asir
ek ho jate hain us dam khair-o-shar ke daere
sab hawa ke rukh par udte barg ke hain ham-nawa
kaun le us ki khabar rahta hai jo patthar tale
raushni darkar hai to khud hi rauzan wa karo
muntazir kab tak rahoge tum hawa-e-tez ke
koi to hota jo khun-e-fan ki qimat jaanta
dost nashir se to ab tak uzr-name hi mile

ek diwar si kohre ki khaDi hai har su

ek diwar si kohre ki khadi hai har su
par samete hue baithi hai chaman mein khushbu
ye andhere bhi hamare liye aaina hain
ru-ba-ru karte hain kirdar ke kitne pahlu
in sulagte hue lamhon se ye milta hai suragh
dam-ba-dam tut raha hai shab-e-gham ka jadu
dam-bardar koi dasht-e-wafa se guzra
surat-e-khwab hua husn-e-khiram-e-ahu
phir hua habs ka ehsas-e-giran-bar 'suhail'
phir mera dil hai talab-gar-e-hawa-e-gesu