nam sunta hun tera jab bhare sansar ke bich

By

nam sunta hun tera jab bhare sansar ke bich
lafz ruk jate hain aa kar meri guftar ke bich
ek hi chehra kitabi nazar aata hai hamein
kabhi ashaar ke bahar kabhi ashaar ke bich
ek dil tuta magar kitni naqaben paltin
jit ke pahlu nikal aae kai haar ke bich
koi mahfil ho nazar us ki hamin par thahri
kabhi apnon mein sataya kabhi aghyar ke bich
aise zahid ki qayaadat mein to tauba tauba
kabhi iman ki baaten kabhi kuffar ke bich
kabhi tahzib-o-tamaddun ka ye markaz tha miyan
tum ko basti jo nazar aati hai aasar ke bich
jis tarah tat ka paiwand ho makhmal mein 'adil'
maghribi chaal-chalan mashriqi aqdar ke bich

mohabbat ka faqir

By

aisi tanhai ki ghar dasht lage
aisa sannata agar patta hile
aankh darwaze ki aahat pe ja ke ruk jae
kash aa jae koi
phir mohabbat ka safir
meri anjaan si chahat ka asir
wo jo aa jae to aangan mein sitare aa jaen
is makan mein bhi ki jis mein tanha
rah raha hun main kai sadiyon se
aane wale ke muqaddar ke tufail
meri manzil mera ghar mere kinare aa jaen
jab bhi is aalam-e-kam-hoshi mein
dastak-e-dil se aankh khul jae
ghar ki dahliz par thahar jae
dur ek saya sa nazar aae
dil ye phir bar bar samjhae
han abhi bas abhi aata hoga
meri jaanib bhi koi
sirf mohabbat ka safir
meri chahat ka asir
jab bhi aahat si koi hoti hai
aur phir khud ko 'adil'
dastak-e-dil ke udhar
tanha khada pata hun
aur mera aks
mere apne hi aaine mein
thahre hue pani mein
har subh mujh ko nazar aata hai
rose ye samjhata hai
meri dahliz pe koi bhi nahin
bas mein hun
ek anjaan si chahat ka safir
ek gumnam mohabbat ka faqir

rah-e-hayat mein jo log jawedan nikle

By

rah-e-hayat mein jo log jawedan nikle
wahi wafa-o-mohabbat ke tarjuman nikle
ajib sehr ka aalam tha us ki mahfil mein
zaban pe naz tha jin ko wo be zaban nikle
wahan wahan pe wafa-dariyon ka zor badha
tumhaare chahne wale jahan jahan nikle
safar ki hasraten niklin bahut meri yarab
magar jo dil mein the arman wo kahan nikle
aziz yun to bahut hain aziz kya kahiye
kai aziz magar mujh se bad-guman nikle
yaqin bahut tha mohabbat pe tum ko apni 'adil'
yaqin ke badle wahan bhi faqat guman nikle

Khaali duniya mein guzar kya karte

By

khali duniya mein guzar kya karte
bin tere umr basar kya karte
tu ne manzil hi badal di apni
hum tere sath safar kiya karte
ek hi khwab-e-junun kafi tha
dekh kar bar digar kiya karte
apni hi uljhanon mein uljhe the
hum teri zulf ko sar kya karte
hum jo diwangi mein kar guzre
aql wale wo hunar kya karte
jo kiya tu ne khuda jaanta hai
hum tere sath magar kya karte
jabki raste mein bikharna hi tha
bandh kar rakht-e-safar kya karte
jism ka bojh liye laute the
shahr walon ko khabar kya karte
jo kiya tu ne khuda jaanta hai
hum tere sath magar kya karte
khud zamin odh li ki hum aage
aur be-samt safar kya karte

humne thama yaqin ko guman chhoD kar

By

hum ne thama yaqin ko guman chhod kar
ek taraf ho gae darmiyan chhod kar
dil na mana jien kahkashan chhod kar
ja ke baste kahan khandan chhod kar
apna ghar chhod kar bastiyan chhod kar
be-aman ho gae hum aman chhod kar
so gae beach mein dastan chhod kar
hum alag ho gae karwan chhod kar
kaise nadan the hum sab kahan aa gae
apne aabao-jad ke makan chhod kar
sath chalte rahe ye na socha kabhi
kaun jaega kis ko kahan chhod kar
aaj bhi muntazir hum wahin hain tere
kal gaya tha hamein to jahan chhod kar
rah apni nikali to manzil mili
hum chale jada-e-rahbaran chhod kar
hai ye malum gar jism-o-jaan se gae
sab chale jaenge mehrban chhod kar
gar tumhaari tamanna hai daim raho
jao zehnon mein raushan nishan chhod kar
tum to tanha hue jite-ji hi 'adil'
log jate hain tanha jahan chhod kar

Daraegi bhala kya teri gardish aasman mujhko

By

daraegi bhala kya teri gardish aasman mujh ko
mila rab se dua-e-fatima ka saeban mujh ko
chali hai chhod kar tu kyun bahaar-e-gulistan mujh ko
khuda jaane kahan le jae ab baad-e-khizan mujh ko
main shukr-e-rab ka qail hun hawa kaisi hi chalti ho
pata aasaniyon ka de gain hain sakhtiyan mujh ko
jala dunga husul-e-manzil-e-maqsud ki khatir
jalani pad gain gar sari apni kashtiyan mujh ko
na sham-e-anjuman mein hun na parwanon ka mela hai
kahan tha main kahan le aai hai umr-e-rawan mujh ko
suna hai sab bhula baithe 'adil'-e-dil-shikasta ko
na jaane aa rahi hain sham se kyun hichkiyan mujh ko