jo diya tu ne hamein wo surat-e-zar rakh liya

By

jo diya tu ne hamein wo surat-e-zar rakh liya
tu ne patthar de diya to hum ne patthar rakh liya
siskiyon ne chaar sau dekha koi dhaaras na thi
ek tanhai thi us ki god mein sar rakh liya
ghut gaya tahzib ke gumbad mein har khwahish ka dam
jangalon ka mor hum ne ghar ke andar rakh liya
mere baalon pe saja di garm sahraon ki dhul
apni aankhon ke liye us ne samundar rakh liya
darz tak se ab na phutegi tamanna ki phuwar
chashma-e-khwahish pe hum ne dil ka patthar rakh liya
wo jo ud kar ja chuka hai dur mere hath se
us ki ek bichhdi nishani taq mein par rakh liya
did ki jholi kahin khali na rah jae 'adim'
hum ne aankhon mein tere jaane ka manzar rakh liya
phenk den galiyan birun-e-sahn sab is ne 'adim'
ghar ki jo manga tha main ne wo pas-e-dar rakh liya

shamil tha ye sitam bhi kisi ke nisab mein

By

shamil tha ye sitam bhi kisi ke nisab mein
titli mili hanut purani kitab mein
dekhunga kis tarah se kisi ko azab mein
sab ke gunah dal de mere hisab mein
phir bewafa ko bahr-e-mohabbat samajh liya
phir dil ki naw dub gai hai sarab mein
pahle gulab us mein dikhai diya mujhe
ab wo mujhe dikhai diya hai gulab mein
wo rang-e-atshin wo dahakta hua shabab
chehre ne jaise aag laga di naqab mein
barish ne apna aks kahin dekhna na ho
kyun aaine ubharne lage hain habab mein
gardish ki teziyon ne use nur kar diya
mitti chamak rahi hai yahi aaftab mein
us sang-dil ko main ne pukara to tha 'adim'
apni sada hi laut kar aai jawab mein

ek khilauna TuT jaega naya mil jaega

By

ek khilauna tut jaega naya mil jaega
main nahin to koi tujh ko dusra mil jaega
bhagta hun har taraf aise hawa ke sath sath
jis tarah sach-much mujhe us ka pata mil jaega
kis tarah rokoge ashkon ko pas-e-diwar-e-chashm
ye to pani hai ise to rasta mil jaega
ek din to khatm hogi lafz o mani ki talash
ek din to mujh ko mera muddaa mil jaega
chhod khali ghar ko aa bahar chalen ghar se 'adim'
kuchh nahin to koi chehra chand sa mil jaega

tamam umr ki tanhai ki saza de kar

By

tamam umr ki tanhai ki saza de kar
tadap utha mera munsif bhi faisla de kar
main ab marun ki jiyun mujh ko ye khushi hai bahut
use sukun to mila mujh ko bad-dua de kar
main us ke waste suraj talash karta hun
jo so gaya meri aankhon ko rat-jaga de kar
wo raat raat ka mehman to umr bhar ke liye
chala gaya mujhe yaadon ka silsila de kar
jo wa kiya bhi daricha to aaj mausam ne
pahad dhanp diya abr ki rida de kar
kati hui hai zamin koh se samundar tak
mila hai ghao ye dariya ko rasta de kar
chatakh chatakh ke jali shakh shakh jangal ki
bahut sharar mila aag ko hawa de kar
phir is ke baad pahad us ko khud pukarenge
tu laut aa use wadi mein ek sada de kar
sutun-e-reg na thahra 'adim' chhat ke tale
main dhah gaya hun khud apne ko aasra de kar

baDa viran mausam hai kabhi milne chale aao

By

bada viran mausam hai kabhi milne chale aao
har ek jaanib tera gham hai kabhi milne chale aao
hamara dil kisi gahri judai ke bhanwar mein hai
hamari aankh bhi nam hai kabhi milne chale aao
mere hamrah garche dur tak logon ki raunaq hai
magar jaise koi kam hai kabhi milne chale aao
tumhein to ilm hai mere dil-e-wahshi ke zakhmon ko
tumhaara wasl marham hai kabhi milne chale aao
andheri raat ki gahri khamoshi aur tanha dil
diye ki lau bhi maddham hai kabhi milne chale aao
tumhaare ruth ke jaane se hum ko aisa lagta hai
muqaddar hum se barham hai kabhi milne chale aao
hawaon aur phulon ki nai khushbu batati hai
tere aane ka mausam hai kabhi milne chale aao