aaghosh-e-sitam mein hi chhupa le koi aa kar

aaghosh-e-sitam mein hi chhupa le koi aa kar
tanha to tadapne se bacha le koi aa kar
sahra mein uga hun ki meri chhanw koi pae
hilta hun ki patton ki hawa le koi aa kar
bikta to nahin hun na mere dam bahut hain
raste mein pada hun ki utha koi aa kar
kashti hun mujhe koi kinare se to khole
tufan ke hi kar jae hawale koi aa kar
jab khinch liya hai mujhe maidan-e-sitam mein
dil khol ke hasrat bhi nikale koi aa kar
do chaar kharashon se ho taskin-e-jafa kya
shisha hun to patthar pe uchhaale koi aa kar
mere kisi ehsan ka badla na chukae
apni hi wafaon ka sila le koi aa kar

aaya hun sang o KHisht ke ambar dekh kar

aaya hun sang o khisht ke ambar dekh kar
khauf aa raha hai saya-e-diwar dekh kar
aankhen khuli rahi hain meri intizar mein
aae na khwab dida-e-bedar dekh kar
gham ki dukan khol ke baitha hua tha main
aansu nikal pade hain kharidar dekh kar
kya ilm tha phisalne lagenge mere qadam
main to chala tha rah ko hamwar dekh kar
har koi parsai ki umda misal tha
dil khush hua hai ek gunahgar dekh kar

aisa bhi nahin us se mila de koi aa kar

aisa bhi nahin us se mila de koi aa kar
kaisa hai wo itna to bata de koi aa kar
ye bhi to kisi man ka dulara koi hoga
is qabr pe bhi phul chadha de koi aa kar
sukhi hain badi der se palkon ki zabanen
bas aaj to ji bhar ke rula de koi aa kar
barson ki dua phir na kahin khak mein mil jae
ye abr bhi aandhi na uda de koi aa kar
ye koh ye sabza ye machalti hui nadiyan
mar jaun jo manzil ka pata de koi aa kar
har ghar pe hai aawaz har ek dar pe hai dastak
baitha hun ki mujh ko bhi sada de koi aa kar
is khwahish-e-nakaam ka khun bhi mere sar hai
zinda hun ki is ki bhi saza de koi aa kar

baDa viran mausam hai kabhi milne chale aao

bada viran mausam hai kabhi milne chale aao
har ek jaanib tera gham hai kabhi milne chale aao
hamara dil kisi gahri judai ke bhanwar mein hai
hamari aankh bhi nam hai kabhi milne chale aao
mere hamrah garche dur tak logon ki raunaq hai
magar jaise koi kam hai kabhi milne chale aao
tumhein to ilm hai mere dil-e-wahshi ke zakhmon ko
tumhaara wasl marham hai kabhi milne chale aao
andheri raat ki gahri khamoshi aur tanha dil
diye ki lau bhi maddham hai kabhi milne chale aao
tumhaare ruth ke jaane se hum ko aisa lagta hai
muqaddar hum se barham hai kabhi milne chale aao
hawaon aur phulon ki nai khushbu batati hai
tere aane ka mausam hai kabhi milne chale aao

bas koi aisi kami sare safar mein rah gai

bas koi aisi kami sare safar mein rah gai
jaise koi chiz chalte waqt ghar mein rah gai
kaun ye chalta hai mere sath be-jism-o-sada
chap ye kis ki meri har rahguzar mein rah gai
gunjte rahte hain tanhai mein bhi diwar-o-dar
kya sada us ne mujhe di thi ki ghar mein rah gai
aur to mausam guzar kar ja chuka wadi ke par
bas zara si barf har sukhe shajar mein rah gai
raat dariya mein phir ek shoala sa chakraata raha
phir koi jalti hui kashti bhanwar mein rah gai
raat bhar hota raha hai kin khazanon ka nuzul
motiyon ki si jhalak har barg-e-tar mein rah gai
laut kar aae na kyun jate hue lamhe 'adim'
kya kami meri sada-e-be-asar mein rah gai