swagat

By

koi aawaz jab bhi sansanati hai
kabhi sunsan raaton mein
to ye ehsas hota hai ki jaise yak-ba-yak aa kar
hawa ka tez jhonka mere darwaze ki kundi
khatkhatata hai
magar pat kholta hun jab
meri mahrumiyan hathon ko phailae
swagat mera karti hain

safar par safar

By

bayaban-o-sahra ko main zer karta
chala ja raha hun
magar ye yaqin hai
ki tarik aankhon se parda hatega
andhere ujalon mein tabdil honge
nazar mujh ko aaega raushan sitara
ki chahat mein jis ki
azal se zamin par
safar par safar tai kiye ja raha hun

safar be-samt

By

zamin se aasman ke darmiyan
be-samt rahon mein
mere shahpar
sada parwaz karte hain
kahan parwaz par koi
meri qadghan lagata hai
aur un aankhon mein manzil hi
meri kab muskuraati hai

octopus

By

khwahish ka ek samundar
mere dil mein
dur tak apni jaden phailae
mujh ko apne ghere mein liye
apni maujon ke sahaare
chus lena chahta hai sab lahu
ghaaliban
ek octopus ke
ghane panjon ki zad mein hun main 'adil'

na-rasa

By

mujhe barbaad karne mein
maza aaya to kuchh hoga
siyahi pot di taqdir par
la kar mujhe tarikiyon ke ghaar mein chhoda
jahan main sath ek ek sans ke
maqdur-bhar koshish kiye jata hun lekin
mujhe milti nahin hai rah jis par
main qadam aage badhaun
apne hisse ki
wo chizen chhin lun
jin ko
chhupa kar meri aankhon se
mere hi waste rakkha gaya hai

manzar

By

raat jalti rahi
din pighalta raha
pyas ke karb se hont
sailab aankhon ka pite rahe
ek ummid par
sans chalti rahi
subh ki
thartharaati hui raushni mein magar
koi aisa nahin
sath tanhaiyon ke jo chalta rahe
ek suraj hai jo apni hi aag mein
jal raha hai magar
din ki lambi dagar
raushni mein hai us se nahai hui