ye nahin wo rahguzar kuchh aur hai

By

ye nahin wo rahguzar kuchh aur hai
mere khwabon ka nagar kuchh aur hai
rang the kal aankh mein kuchh aur hi
aaj bhi raqs-e-sharar kuchh aur hai
lab pe mere hai tabassum ka ghubar
han magar zakhm-e-jigar kuchh aur hai
khud ke hone ka guman hai bhi to kya
samne apne magar kuchh aur hai
shab mein thin chaaron taraf shadabiyan
hadisa waqt-e-sahar kuchh aur hai
ho gaya hai khatm 'adil' rasta
par tera azm-e-safar kuchh aur hai

sukun-e-dil fana hai aur main hun

By

sukun-e-dil fana hai aur main hun
ghamon ka qafila hai aur main hun
kahani kah rahi hai raat apni
muqabil aaina hai aur main hun
nisab-e-gardish-e-sham-o-sahar hai
sar-e-rah hadisa hai aur main hun
kahun kya hasti-e-na-moatabar hun
tera hi aasra hai aur main hun
wahi nairangi-e-rang-e-zamana
wahi dil ki sada hai aur main hun
agarche jism rakhta hun main 'adil'
badan sar se juda hai aur main hun

nahin koi KHabar karna nahin hai

By

nahin koi khabar karna nahin hai
hamein kuchh bhi asar karna nahin hai
bahut hi khubsurat zindagi hai
magar aasan basar karna nahin hai
hawa ko rasta gar mil bhi jae
charaghon par asar karna nahin hai
gharaunde hi mein apne laut jaun
ki khud ko dar-ba-dar karna nahin hai
hazaron raste to muntazir hain
takhayyul mein safar karna nahin hai
lubhate hain nae paude hamein bhi
magar sab ko shajar karna nahin hai
hain ab bhi ishq ki baaten gawara
lahu dil ko magar karna nahin hai
agar hai zindagi se pyar 'adil'
muhim koi bhi sar karna nahin hai

har ek jawab ki tah mein sawal aaega

By

har ek jawab ki tah mein sawal aaega
gae yugon ke buton ka zawal aaega
hunar ka aks bhi ho aaina bhi ban jao
phir us ke baad hi rang-e-kamal aaega
harif-e-jaan hai agar wo to phir kaho us se
gai jo jaan to dil ka sawal aaega
yaqin hai ki milega uruj hum ko bhi
yaqin hai ki tera bhi zawal aaega
abhi ummid ko mayusiyon ka rang na de
thahar thahar abhi us ka khayal aaega
usi ke shah pe bujhega charagh-e-dil 'adil'
nihan khulus mein jo ishtial aaega

dard-e-dil ke tabib hote hain

By

dard-e-dil ke tabib hote hain
baz dushman ajib hote hain
waswase uljhanen tamannaen
dil ke kitne raqib hote hain
hanste hanste bigadna ho jin ko
aise bhi to nasib hote hain
maut aur zindagi ke rishton mein
fasle kuchh ajib hote hain
din agar kat bhi jata hai 'adil'
shab ke sae muhib hote hain

bebasi ki dhup hai ghamgin kya

By

bebasi ki dhup hai ghamgin kya
phir raha hai dar-ba-dar miskin kya
hans raha hun bebasi ki dhup mein
ho rahi hai zauq ki taskin kya
aa rahi hain dastakon par dastaken
zindagi phir ho gai sangin kya
aankh hanste hanste kyun rone lagi
har khushi karti hai bas ghamgin kya
ashk 'adil' pi raha hun aaj-kal
ho gaya hai zaiqa namkin kya